តើអ្វីទៅជាស្រោមអនាម័យបុរស?
ស្រោមអនាម័យខាងក្រៅ ជួនកាលគេហៅថាស្រោមអនាម័យបុរស “ឆ័ត្រ” “អាវភ្លៀង” “ស្បែក” ឬ “របស់ការពារ” គឺជាគម្រប ឬ ស្រោមដែលពាក់ពីលើលិង្គ ដើម្បីការពារមេជីវិតឈ្មោលក្នុងស្រោមអនាម័យមិនឲ្យចូលទៅក្នុងទ្វារមាស រន្ធគូថ ឬមាត់។ វាត្រូវបានចាត់ទុកថាជាវិធីពន្យារកំណើតដ៏ល្អបំផុត ស្រោមអនាម័យខាងក្រៅជាវិធីដ៏ពេញនិយមបំផុតមួយដែលត្រូវបានប្រើដើម្បីការពារពីការមានផ្ទៃពោះ និងការពារពីការឆ្លងមេរោគកាមរោគ (STIs)។ គ្រាន់តែស៊កវាលើលិង្គដែលឡើងរឹង ឬឧបករណ៍រួមភេទមុនពេលធ្វើសកម្មភាពរួមភេទណាមួយ។
ស្រោមអនាម័យខាងក្រៅមានរូបរាង និងទំហំរាប់រយប្រភេទ ហើយអ្នកអាចទិញប្រភេទដែលមានទឹករំអិល ឬគ្មាន។ ស្រោមអនាម័យខាងក្រៅទូទៅត្រូវបានផលិតចេញពីជ័រកៅស៊ូ ប៉ុន្តែស្រោមអនាម័យអាចផលិតពីវត្ថុធាតុផ្សេងទៀតដែរ រួមមានដូចជាស្បែកចៀម នីទ្រីល ប៉ូលីយូរេថេន និងប៉ូលីអ៊ីសូព្រីន។
ស្រោមអនាម័យខាងក្រៅមួយចំនួនត្រូវបានគេលាបថ្នាំសម្លាប់មេជីវិតឈ្មោល ដែលជាសារធាតុគីមីម្យ៉ាងដែលមានមុខងារសម្លាប់មេជីវិតឈ្មោលបាន។ ស្រោមអនាម័យដែលស្រោបដោយថ្នាំសម្លាប់មេជីវិតឈ្មោល មិនត្រូវបានណែនាំសម្រាប់ការរួមភេទតាមមាត់ ឬតាមរន្ធគូថនោះទេ។ ប្រសិនបើអ្នក ឬដៃគូរបស់អ្នកមានងាយនឹងប្រតិកម្មទៅនឹងថ្នាំសម្លាប់មេជីវិតឈ្មោល សូមរកមើលស្រោមអនាម័យដែលគ្មានថ្នាំសម្លាប់មេជីវិតឈ្មោលនេះ។
តើស្រោមអនាម័យខាងក្រៅមានដំណើរការយ៉ាងដូចម្តេច?
ស្រោមអនាម័យខាងក្រៅការពារការមានផ្ទៃពោះដោយបង្កើតជារបាំងដែលរារាំងមេជីវិតឈ្មោលមិនឲ្យចូលក្នុងទ្វារមាស។ វាក៏ការពារការឆ្លងមេរោគពីលិង្គ ទឹកកាម យោនី ទ្វារមាស ឬរន្ធគូថពីការឆ្លងទៅដៃគូ។
ដើម្បីទទួលបានប្រសិទ្ធភាពខ្ពស់បំផុត ស្រោមអនាម័យខាងក្រៅតម្រូវឲ្យប្រើប្រាស់ឲ្យបានត្រឹមត្រូវរាល់ពេលដែលប្រព្រឹត្តិទង្វើផ្លូវភេទណាមួយក៏ដោយ (1)។
ប្រភេទនៃស្រោមអនាម័យខាងក្រៅ
ស្រោមអនាម័យជ័រកៅស៊ូ។ ស្រោមអនាម័យដែលធ្វើឡើងពីជ័រកៅស៊ូ ហើយអាចយឺតបានរហូតដល់ ៨០០%។ នេះគឺជាប្រភេទស្រោមអនាម័យដែលគេប្រើប្រាស់ច្រើនជាងគេបំផុត។ កុំប្រើវាជាមួយនឹងទឹករំអិលដែលមានមូលដ្ឋានប្រេង ព្រោះវាអាចបណ្តាលឲ្យស្រោមអនាម័យខូច ឬរបូតចេញ ដែលអាចបង្កើនហានិភ័យនៃការមានផ្ទៃពោះ ឬឆ្លងជម្ងឺកាមរោគ។
ស្រោមអនាម័យមិនផលិតពីជ័រកៅស៊ូ ។ ប្រសិនបើអ្នកមានប្រតិកម្មទៅនឹងជ័រកៅស៊ូ ឬចូលចិត្តទឹករំអិលដែលមានមូលដ្ឋានប្រេង នោះអ្នកអាចស្វែងរកស្រោមអនាម័យដែលមិនមែនជាជ័រកៅស៊ូវិញ។ ពួកវាជាធម្មតាត្រូវបានផលិតចេញពីប៉ូលីអ៊ីសូព្រីន (កៅស៊ូសំយោគ) ឬប៉ូលីយូរេថេន (ប្លាស្ទិក)។ ដូចស្រោមអនាម័យជ័រកៅស៊ូដែរ ពួកវាអាចការពារអ្នកពីការមានផ្ទៃពោះ និងជម្ងឺកាមរោគបាន។ សម្រាប់ប្រភេទស្រោមអនាម័យក្រៅពីស្រោមអនាម័យជ័រកៅស៊ូ អ្នកអាចប្រើទឹករំអិលដែលមានមូលដ្ឋានប្រេង ឬទឹកក៏បានដែរដោយមិនមានបញ្ហា។ ជាទូទៅ ទឹករំអិលដែលមានមូលដ្ឋានប្រេងជាទឹកត្រូវបានណែនាំឲ្យប្រើប្រាស់ នៅពេលអ្នកកំពុងប្រើស្រោមអនាម័យប្រភេទនេះ ដោយប្រភេទទឹករំអិលនេះអាចបង្កើនអារម្មណ៍ស្រណុកស្រួលខាងផ្លូវភេទបាន។
ស្រោមអនាម័យស្បែកសត្វ។ ស្រោមអនាម័យនេះត្រូវបានគេស្គាល់ផងដែរថាជាស្រោមអនាម័យស្បែកចៀម ពួកវាត្រូវបានផលិតចេញពីភ្នាសពោះវៀនរបស់សត្វចៀម។ ពួកវាជាជម្រើសដ៏ល្អសម្រាប់អ្នកដែលមានប្រតិកម្មទៅនឹងស្រោមអនាម័យជ័រកៅស៊ូ។ ទោះជាយ៉ាងណាក៏ដោយ ត្រូវដឹងថា ស្រោមអនាម័យប្រភេទនេះជួយការពារការមានផ្ទៃពោះ ប៉ុន្តែវាមិនអាចការពារពីជម្ងឺកាមរោគបានទេ។ ជាមួយនឹងស្រោមអនាម័យប្រភេទនេះ អ្នកអាចប្រើទឹករំអិលធាតុផ្សំចំបងជាប្រេង ឬ ទឹកក៏បាន។
តើស្រោមអនាម័័យខាងក្រៅមានប្រសិទ្ធភាពកម្រិតណាដែរ?
ប្រសិទ្ធភាពនៃស្រោមអនាម័យខាងក្រៅសឹងតែផ្អែកទាំងស្រុងទៅលើរបៀបដែលអ្នកប្រើប្រាស់វា។ អ្នកមានហានិភ័យខ្ពស់នៃការមានផ្ទៃពោះ និង/ឬឆ្លងជម្ងឺកាមរោគនៅពេលដែលអ្នកមិនប្រើស្រោមអនាម័យគ្រប់សកម្មភាពរួមភេទទាំងអស់។ ការមានផ្ទៃពោះដែលបណ្តាលមកពីស្រោមអនាម័យគឺដោយសារតែការប្រើប្រាស់មិនត្រឹមត្រូវ ការរហែកស្រោមអនាម័យ ឬរបូតចេញពេលកំពុងរួមភេទ។
