ប្រសិនបើអ្នកប្រើស្រោមអនាម័យខាងក្រៅជាមធ្យោបាយពន្យារកំណើតតែមួយគត់ អ្នកត្រូវតែចាំថាអ្នកត្រូវប្រើស្រោមអនាម័យមួយរាល់ពេលរួមភេទម្តង មិនអាចប្រើមួយក្នុងសកម្មភាពរួមភេទលើសពីមួយទេ។
រឿងដំបូងដែលអ្នកត្រូវធ្វើគឺទិញប្រភេទស្រោមអនាម័យដែលអ្នកពេញចិត្ត ហើយមានទំហំសមស្រប ហើយបន្ទាប់មកពិនិត្យមើលកាលបរិច្ឆេទផុតកំណត់របស់វា។ ស្រោមអនាម័យដែលផុតកំណត់ងាយនឹងខូច ហើយការប្រើស្រោមអនាម័យដែលផុតកំណត់អាចធ្វើឲ្យអ្នកប្រឈមនឹងហានិភ័យនៃការឆ្លងមេរោគ ឬការមានផ្ទៃពោះ។
របៀបនៃការពាក់ស្រោមអនាម័យខាងក្រៅ
– នៅពេលដែលលិង្គឡើងរឹង ចូរហែកសំបកស្រោមអនាម័យចេញ។ អ្នកត្រូវប្រយ័ត្នកុំធ្វើឲ្យស្រោមអនាម័័យខាងក្នុងរហែក នៅពេលហែកសំបកវាចេញ។ ប្រសិនបើវារហែក ផុយ ឬរឹង ចូរបោះវាចោល ហើយប្រើថ្មីមួយទៀត។
– សង្កត់ប្រហែលកន្លះអ៊ីញនៃចុងស្រោមអនាម័យនៅចន្លោះមេដៃ និងម្រាមដៃចង្អុលរបស់អ្នក បន្ទាប់មកច្របាច់ខ្យល់ចេញ។ កន្លែងនៅចុងដែលនៅសល់នោះ វានឹងផ្ទុកទឹកកាមដែលនៅសល់បន្ទាប់ពីបញ្ចេញទឹកកាមហើយ។
– ដាក់មាត់ចំហរនៃស្រោមអនាម័យពីលើលិង្គ ហើយរំកិលវាពីលើលិង្គឲ្យខិតដល់គល់លិង្គតាមដែលអាចធ្វើទៅបាន។ ប្រសិនបើអ្នកពិបាករំកិលវា ចូរលាបទឹករំអិលដែលមានមូលដ្ឋានប្រេងមួយដំណក់ ឬពីរនៅក្នុងស្រោមអនាម័យ។ វានឹងជួយវារំកិលតាមលិង្គដោយរលូន ហើយវានឹងធ្វើឲ្យអ្វីៗកាន់តែស្រណុកស្រួលសម្រាប់ដៃគូរបស់អ្នក។ ដៃគូរបស់អ្នកក៏អាចជួយអ្នកក្នុងការពាក់ស្រោមអនាម័យផងដែរ។ ប្រសិនបើលិង្គមិនត្រូវបានកាត់ស្បែកនៅចុងនោះទេ វាជារឿងសំខាន់ក្នុងការទាញស្បែកគ្របក្បាលលិង្គចេញមុននឹងរំកិលស្រោមអនាម័យលើលិង្គ។
– ច្របាច់ខ្យល់ដែលចូលក្នុងស្រោមអនាម័យចេញឲ្យអស់។ ខ្យល់ដែលនៅសល់ក្នុងស្រោមអនាម័យអាចបណ្តាលឲ្យស្រោមអនាម័យបែកបាន។
– ប្រសិនបើអ្នកចូលចិត្ត អ្នកអាចលាបទឹករំអិលដែលមានមូលដ្ឋានទឹកនៅខាងក្រៅស្រោមអនាម័យបន្ថែមទៀត ដើម្បីជួយការពារការកកិត។
ឥឡូវនេះ អ្នកបានត្រៀមខ្លួនរួចហើយក្នុងការរួមភេទដោយមានការការពារ!
របៀបនៃការដោះស្រោមអនាម័យខាងក្រៅចេញ
-ភ្លាមៗបន្ទាប់ពីបញ្ចេញទឹកកាមរួច ចូរចាប់ផ្នែកខាងលើនៃស្រោមអនាម័យឲ្យជាប់ទៅនឹងលិង្គដែលកំពុងនៅរឹង ហើយត្រូវចាប់វាឲ្យជាប់ នៅពេលដែលដកស្រោមអនាម័យចេញពីលិង្គ។ ត្រូវដកស្រោមអនាម័យមុនពេលដែលលិង្គទន់។
– សង្កត់លើគល់នៃស្រោមអនាម័យ ពេលអ្នកដកស្រោមអនាម័យចេញ។ ការធ្វើបែបនេះនឹងជួយការពារទឹកកាមពីការហៀរចេញពីស្រោមអនាម័យពេលអ្នកដកវាចេញ។
– ដើម្បីកុំឲ្យទឺកកាមចេញពីស្រោមអនាម័យ ចូរគួចចងផ្នែកចំហរបស់ស្រោមអនាម័យឲ្យជិត។
– ពិនិត្យស្រោមអនាម័យឲ្យច្បាស់ដើម្បីរកមើលរប្រហោងរហែក ឬការខូចខាត។ ប្រសិនបើអ្នកឃើញថាមានការខូចខាតណាមួយ ឬប្រសិនបើស្រោមអនាម័យរបូតចេញអំឡុងពេលរួមភេទ ដៃគូរដែលជាស្ត្រីគួរតែពិចារណាប្រើថ្នាំពន្យារកំណើតបន្ទាន់ (ក្នុងរយៈពេល ៧២ ម៉ោងក្រោយពេលរួមភេទ)។ ប្រសិនបើអ្នកព្រួយបារម្ភការរួមភេទនោះមានសុវត្ថិភាពឬអត់ សូមធ្វើការណាត់ជួបដើម្បីធ្វើការពិនិត្យរកជម្ងឺកាមរោគ និង រកវិធីសាស្រ្តការពារដែលចាំបាច់ណាមួយផ្សេងទៀត ដូចជាការប្រើថ្នាំការពារមេរោគអេដស៍ក្រោយការប្រឈម (PEP)។ អ្នកត្រូវប្រុងប្រយ័ត្ន និងការពារខ្លួនផងដែរប្រសិនបើស្រោមអនាម័យរបូតនៅពេលកំពុងរួមភេទ។
– យកក្រដាសជូតមាត់ទៅរុំស្រោមអនាម័យដែលបានប្រើប្រាស់ហើយ រួចបោះចោលក្នុងធុងសម្រាម ឬបង្គន់ជីកក្នុងដី (កន្លែងដែលមាន)។ កុំបោះវាចោលក្នុងបង្គន់ ព្រោះវានឹងធ្វើឲ្យស្ទះ។ អ្នកត្រូវចងចាំជានិច្ចថាត្រូវទុកស្រោមអនាម័យឲ្យឆ្ងាយពីកុមារ និងសត្វចិញ្ចឹម។
– លាងសម្អាតលិង្គជាមួយសាប៊ូ និងទឹកមុនពេលរួមភេទម្តងទៀត (3)។
គន្លឹះបន្ថែមក្នុងការប្រើប្រាស់ស្រោមអនាម័យខាងក្រៅឲ្យបានត្រឹមត្រូវ
ស្រោមអនាម័យខាងក្រៅគឺងាយស្រួលក្នុងការប្រើប្រាស់ ប៉ុន្តែទាំងនេះជាគន្លឹះមួយចំនួនដើម្បីជួយឲ្យអ្នកប្រើវាឲ្យបានត្រឹមត្រូវ៖
– ប្រើស្រោមអនាម័យថ្មីរាល់ពេលរួមភេទទាំងអស់។
– តែងតែអានការណែនាំនៅលើសំបកស្រោមអនាម័យ ហើយកុំភ្លេចពិនិត្យមើលកាលបរិច្ឆេទផុតកំណត់ផង។ ស្រោមអនាម័យដែលផុតកំណត់ ឬខូចខាតនឹងរហែកយ៉ាងងាយ។
– ត្រូវពិនិត្យមើលកន្លែងរហែក ឬការខូចខាតមុនពេលប្រើស្រោមអនាម័យ។
– ត្រូវប្រាកដថាអ្នកពាក់ស្រោមអនាម័យ នៅមុនពេលលិង្គប៉ះយោនីរបស់អ្នក។ Pre-cum សារធាតុរាវដែលហូរចេញពីលិង្គមុនពេលបុរសបញ្ចេញទឹកកាម សារធាតុរាវនេះអាចផ្ទុកមេជីវិតឈ្មោលដែលនៅដល់ពីការបញ្ចេញទឹកកាមពីលើកមុន។
– កុំពាក់ស្រោមអនាម័យជាន់គ្នាលើសពីមួយ។ ការប្រើស្រោមអនាម័យលើសពីមួយ មិនផ្តល់ការការពារបន្ថែមទេ។ ផ្ទុយទៅវិញ វាធ្វើឲ្យស្រោមអនាម័យកាន់តែងាយរបូត ហើយនេះបង្កើនហានិភ័យនៃការមានផ្ទៃពោះ ឬការឆ្លងជម្ងឺកាមរោគ។
– ជៀសវាងការប្រើផលិតផលដែលមានមូលដ្ឋានប្រេងជាមួយស្រោមអនាម័យដូចជា ឡេ ប្រេងទារក ប្រេងសំណល់ប្រេងឆៅ (petroleum jelly) ឬប្រេងឆា។ ពួកវានឹងធ្វើឲ្យស្រោមអនាម័យរហែក។
– កុំយកស្រោមអនាម័យដែលប្រើហើយយកមកប្រើម្តងទៀត។ ប្រើស្រោមអនាម័យមួយសម្រាប់ការឡើងរឹងម្តង ហើយអ្នកត្រូវមានស្រោមអនាម័យបម្រុងទុកថែមទៀត។
– រក្សាទុកស្រោមអនាម័យក្នុងកន្លែងត្រជាក់ និងស្ងួតជានិច្ច។
– ជៀសវាងការរក្សាទុកស្រោមអនាម័យនៅក្នុងកាបូបរបស់អ្នក។ ការកកិតនិងកំដៅដែលបណ្តាលមកពីចលនាអាចធ្វើឲ្យស្រោមអនាម័យខូចខាត (4) ។
