ថ្នាំសម្លាប់មេជីវិតឈ្មោល

តើអ្វីទៅជាថ្នាំសម្លាប់មេជីវិតឈ្មោល?

ថ្នាំសម្លាប់មេជីវិតឈ្មោល គឺជាថ្នាំដែលអាចធ្វើឲ្យមេជីវិតឈ្មោល លែងមានចលនា ឬស្លាប់នៅពេលដែលថ្នាំនេះប៉ះទៅលើវា។ វាជាវិធីសាស្រ្តពន្យារកំណើតបែបរបាំងការពារ ដែលអ្នកដាក់ចូលជ្រៅទៅក្នុងទ្វារមាស នៅជិតមាត់ស្បូន មុនពេលរួមភេទ ដើម្បីបំផ្លាញមេជីវិតឈ្មោល មុនពេលវាចូលទៅក្នុងស្បូន (1)។

មានប្រភេទ និងម៉ាកថ្នាំសម្លាប់មេជីវិតខុសៗគ្នាដែលមាននៅលើទីផ្សារ។ ថ្នាំសំលាប់មេជីវិតឈ្មោលដែលប្រើទូលំទូលាយបំផុតគឺថ្នាំដែលមានផ្ទុកសារធាតុ nonoxynol-9 ។ ថ្នាំសម្លាប់មេជីវិតឈ្មោលប្រភេទនេះ ត្រូវបានគេបង្ហាញថាមានប្រសិទ្ធភាព ការពារប្រឆាំងនឹងជម្ងឺប្រមេះទឹកបាយ និងការឆ្លងមេរោគប្រមេះទឹកថ្លាផងដែរ ។

ប្រភេទថ្នាំសំលាប់មេជីវិតឈ្មោលផ្សេងទៀត រួមមានថ្នាំដែលមានផ្ទុក Menfegol, benzalkonium chloride, octoxynol-9, chlorhexidine និង sodium docusate ។

ថ្នាំសម្លាប់មេជីវិតឈ្មោលមានទម្រង់ជាគ្រីម ចាហួយ ថ្នាំគ្រាប់ហ្វូម បន្ទះរលាយ​ក្នុងទឹក ថ្នាំស៊ុលរលាយ និងថ្នាំស៊ុលហ្វូម និងហ្វូមក្នុងកំប៉ុង។

ថ្នាំសម្លាប់មេជីវិតឈ្មោលដែលមានក្នុងទម្រង់ជាគ្រីម ចាហួយ និងហ្វូមពីកំប៉ុង អាចប្រើតែឯងក៏បាន ឬប្រើរួម ជាមួយស្រោមអនាម័យ ឬជាមួយសន្ទះពាំងមាត់ស្បូន។

ប្រភេទដែលមានក្នុងទម្រង់ជាថ្នាំសុលដែលរលាយនៅពេលដាក់ចូល បន្ទះរលាយក្នុងទឹក ថ្នាំគ្រាប់ដែលក្លាយជាហ្វូម ឬថ្នាំស៊ុលហ្វូមអាចប្រើតែឯង ឬជាមួយស្រោមអនាម័យបាន (2)។

តើថ្នាំសម្លាប់មេជីវិតឈ្មោលមានដំណើរការយ៉ាងដូចម្តេច?

ថ្នាំសម្លាប់មេជីវិតឈ្មោលមានប្រសិទ្ធភាពដោយធ្វើឲ្យភ្នាសនៃកោសិកាមេជីវិតឈ្មោលរលាយក្នុងរបៀបដែលសម្លាប់ពួកវា ឬធ្វើឲ្យចលនារបស់ពួកគេយឺត។ ការធ្វើបែបនេះរារាំងមេជីវិតឈ្មោលមិនឲ្យជួបជាមួយនឹងអូវ៊ុល។

តើថ្នាំសម្លាប់មេជីវិតឈ្មោលមានប្រសិទ្ធភាពកម្រិតណា?

ប្រសិទ្ធភាព​នៃ​ថ្នាំ​សម្លាប់​មេ​ជីវិត​ឈ្មោល​គឺ​អាស្រ័យ​យ៉ាង​ខ្លាំង​ទៅ​លើ​ថាតើអ្នកបានប្រើប្រាស់វា​ត្រឹមត្រូវ និង​ជាប់លាប់ឬអត់។ ហានិភ័យ​នៃ​ការ​មាន​ផ្ទៃពោះ​កើនឡើង​នៅពេលដែល​ថ្នាំ​សម្លាប់​មេ​ជីវិត​ឈ្មោល​មិន​ត្រូវ​បាន​ប្រើ​រាល់េពេលដែលមានសកម្មភាព​ផ្លូវភេទ​។ ថ្នាំសម្លាប់មេជីវិតឈ្មោលជាធម្មតាត្រូវបានលាបភ្លាមៗមុនពេលរួមភេទ ហើយប្រសិទ្ធភាពរបស់វាមានរយៈពេលត្រឹមតែមួយម៉ោងប៉ុណ្ណោះ។ ខណៈពេលដែលវាអាចត្រូវបានប្រើជាវិធីសាស្ត្រពន្យារកំណើតបឋម ឬបន្ទាប់បន្សំ ថ្នាំសម្លាប់មេជីវិតឈ្មោលមានប្រសិទ្ធភាពបំផុតនៅពេលប្រើប្រាស់រួមគ្នាជាមួយវិធីសាស្រ្តពន្យារកំណើតដើរតួរជារបាំងផ្សេងទៀត ដូចជា សន្ទះពាំងមាត់ស្បូន គម្របមាត់ស្បូន ឬស្រោមអនាម័យ។ នៅពេលប្រើតែម្នាក់ឯង ថ្នាំសម្លាប់មេជីវិតឈ្មោលតាមទ្វារមាសផ្តល់ការការពារដែលមានកម្រិតប្រឆាំងនឹងការឆ្លងជម្ងឺកាមរោគ (STIs) ហើយមិនការពារប្រឆាំងនឹងការឆ្លងមេរោគអេដស៍នោះទេ។

តាមការប្រើប្រាស់បែបធម្មតា ថ្នាំសម្លាប់មេជីវិតឈ្មោលមានអត្រាប្រសិទ្ធភាព ៧៩% ក្នុងអំឡុងមួយឆ្នាំដំបូងនៃការប្រើប្រាស់។ នេះមានន័យថាស្ត្រី ២១ នាក់ក្នុងចំណោម ១០០ នាក់ដែលប្រើថ្នាំសម្លាប់មេជីវិតឈ្មោលនឹងមានផ្ទៃពោះ។ ជាមួយនឹងការប្រើប្រាស់តាមរបៀបត្រឹមត្រូវសម្រាប់គ្រប់សកម្មភាពផ្លូវភេទទាំងអស់ ថ្នាំសម្លាប់មេជីវិតឈ្មោលអាចទទួលបានប្រសិទ្ធភាព ៨៤% ក្នុងការការពារពីមានផ្ទៃពោះ។ នេះ​មាន​ន័យ​ថា ស្ត្រី​តែ ១៦ នាក់​ក្នុង​ចំណោម ១០០ នាក់ប៉ុណ្ណោះ​ដែល​ប្រើ​ថ្នាំ​សម្លាប់​មេ​ជីវិត​ឈ្មោល​នឹង​មាន​ផ្ទៃពោះ (3)។

សរុបមក ប្រសិទ្ធភាពនៃថ្នាំសម្លាប់មេជីវិតឈ្មោលអាចមានកម្រិតទាបរហូតត្រឹម ៥០% ឬខ្ពស់រហូតដល់ ៩៩.៩% ដោយផ្អែកលើថាតើវាត្រូវបានគេប្រើប្រាស់បានត្រឹមត្រូវ ឬប្រើតែឯង ឬរួមបញ្ចូលគ្នាជាមួយវិធីសាស្ត្រពន្យារកំណើតជារបាំងផ្សេងទៀត។ ការលាបថ្នាំសម្លាប់មេជីវិតឈ្មោលឲ្យបានត្រឹមត្រូវទៅលើមាត់ស្បូន និងអនុញ្ញាតឲ្យវាមានពេលវេលាគ្រប់គ្រាន់ដើម្បីឲ្យវាសាយភាយបានល្អ គឺជាកត្តាសំខាន់ដែលអាចប៉ះពាល់ដល់ប្រសិទ្ធភាពរបស់ថ្នាំសម្លាប់មេជីវិតឈ្មោល។ ការប្រើប្រាស់ថ្នាំសម្លាប់មេជីវិតឈ្មោល រួមផ្សំជាមួយនឹងវិធីសាស្ត្រពន្យារកំណើតជារបាំងការពារផ្សេងទៀត បង្កើនប្រសិទ្ធភាពរបស់ថ្នាំនេះយ៉ាងខ្លាំង។ ការ​ប្រើ​ថ្នាំ​សម្លាប់​មេជីវិត​ឈ្មោល​ជាមួយ​ស្រោម​អនាម័យ​ត្រូវបានគេរកឃើញថាមានការពាក់ព័ន្ធ​ជាមួយ​ការទទួលបានប្រសិទ្ធភាពពន្យារកំណើត ៩៩.៩% (4)។

តើថ្នាំសម្លាប់មេជីវិតឈ្មោលត្រូវបានប្រើប្រាស់យ៉ាងដូចម្តេច?

សម្រាប់ការប្រើប្រាស់ឲ្យបានត្រឹមត្រូវ អ្នកត្រូវប្រាកដថាអ្នកបានអានការណែនាំនៅលើកញ្ចប់ឲ្យបានត្រឹមត្រីវ និងពិនិត្យមើលកាលបរិច្ឆេទផុតកំណត់។ ថ្នាំសម្លាប់មេជីវិតឈ្មោលងាយស្រួលប្រើ ដោយអ្នកគ្រាន់តែដាក់បញ្ចូលវាទៅក្នុងទ្វារមាសរបស់អ្នកដោយប្រើម្រាមដៃរបស់អ្នក ឬឧបករណ៍ដាក់បញ្ចូល។

– លាប ឬបញ្ចូលថ្នាំសម្លាប់មេជីវិតឈ្មោលឲ្យជ្រៅចូលទៅក្នុងទ្វារមាស ដើម្បីឲ្យវាពាសលើមាត់ស្បូនឲ្យបានល្អ។
– អ្នកត្រូវប្រើប្រាស់ថ្នាំសម្លាប់មេជីវិតឈ្មោលក្នុងបរិមាណគ្រប់គ្រាន់ទើបវាអាចមានប្រសិទ្ធភាពបាន។
– អ្នកត្រូវដាក់បញ្ចូលថ្នាំសម្លាប់មេជីវិតឈ្មោលបន្ថែមទៀតរាល់ដងដែលអ្នកធ្វើសកម្មភាពផ្លូវភេទ។
– អ្នកត្រូវរង់ចាំតាមពេលវេលាដែលបានណែនាំចន្លោះពេលដែលលាបថ្នាំ និងការរួមភេទ។ ថ្នាំ​សម្លាប់​មេ​ជីវិត​ឈ្មោល​មួយ​ចំនួន​តម្រូវ​ឲ្យ​អ្នក​រង់ចាំ ១០-១៥ នាទី​មុន​ពេល​រួម​ភេទ។ ការរងចាំនេះអនុញ្ញាតឲ្យថ្នាំសំលាប់មេជីវិតឈ្មោលសាយភាយ និង ពាសមាត់ស្បូនបានល្អ។ ប្រភេទថ្នាំសម្លាប់មេជីវិតឈ្មោលទាំងនេះមានប្រសិទ្ធភាពត្រឹមតែមួយម៉ោងបន្ទាប់ពីអ្នកលាបវាប៉ុណ្ណោះ។ ប្រសិនបើវាលើសពីបីម៉ោងក្រោយពេលលាបហើយអ្នកត្រូវរួមភេទ ចូរលាបថ្នាំសម្លាប់មេជីវិតឈ្មោលម្តងទៀត។
– បន្ទះថ្នាំសម្លាប់មេជីវិតឈ្មោល (សន្លឹក ២ គុណ ២ អ៊ីញ ដែលមានផ្ទុក nonoxynol-9 ២៨%) ត្រូវបានបញ្ចូលយ៉ាងហោចណាស់ ១៥ នាទីមុនពេលរួមភេទ ដើម្បីឲ្យវាសាយភាយ និងពាសពេញមាត់ស្បូន។ ប្រសិនបើលើសពីបីម៉ោងបានកន្លងផុតទៅ អ្នកត្រូវដាក់បញ្ចូលថ្នាំសម្លាប់មេជីវិតឈ្មោលមួយបន្ទះទៀត។
– ហ្វូមសម្លាប់មេជីវិតឈ្មោលដែលមានផ្ទុក nonoxynol-9 ១២.៥% មានប្រសិទ្ធភាពភ្លាមៗបន្ទាប់ពីការលាបវាទៅលើមាត់ស្បូន និងមានប្រសិទ្ធភាពរហូតដល់មួយម៉ោងបន្ទាប់ពីការលាប។ វា​ត្រូវ​បាន​បញ្ចូល​ទៅក្នុង​ទ្វារមាស​ដោយ​ប្រើ​ឧបករណ៍​លាប ហើយ​អ្នក​នឹង​ត្រូវ​លាប​វា​ម្តងទៀត មុនពេល​ការធ្វើ​សកម្មភាព​រួមភេទណាមួយបន្តបន្ទាប់ទៀត។
– ចូរកុំបាញ់លាងទ្វារមាស​យ៉ាងតិច​៦​ម៉ោង​ក្រោយពេល​រួមភេទ​។
– អ្នកត្រូវតែមានថ្នាំសម្លាប់មេជីវិតឈ្មោលនៅជាប់ខ្លួនអ្នករហូត (5)

គុណសម្បត្តិនៃថ្នាំសម្លាប់មេជីវិតឈ្មោល

– វាងាយស្រួលប្រើ និងអាចរកបានយ៉ាងស្រួល។ អ្នកមិនត្រូវការជំនាញពិសេសអ្វីដើម្បីប្រើវានោះទេ។
– វាអាចត្រូវដាក់បញ្ចូលទៅក្នុងទ្វារមាសជាផ្នែកមួយនៃការបបោសអង្អែលមុនរួមភេទ។
– វាគ្មានអរម៉ូននោះទេ។
– មិនចាំបាច់មានវេជ្ជបញ្ជាក្នុងការទិញវានោះទេ។ អ្នកមិនចាំបាច់ទៅជួបគ្រូពេទ្យដើម្បីប្រើថ្នាំសម្លាប់មេជីវិតឈ្មោលទេ។
– អ្នកអាចប្រើវាបានក្នុងពេលបំបៅដោះ។

តើអ្នកអាចប្រើថ្នាំសម្លាប់មេជីវិតឈ្មោលបន្ទាប់ពីការរួមភេទដែរឬទេ?

អត់ទេ។ ដើម្បីឲ្យវាមានប្រសិទ្ធភាពក្នុងការការពារការមានគភ៌ ថ្នាំសម្លាប់មេជីវិតឈ្មោលអាចដាក់បញ្ចូលបានតែមុនពេលរួមភេទតែប៉ុណ្ណោះ។

តើខ្ញុំអាចប្រើថ្នាំសម្លាប់មេជីវិតឈ្មោលពេលខ្ញុំកំពុងមករដូវបានដែរឬទេ?

អាចប្រើបាន។ អ្នក​អាច​ប្រើ​ថ្នាំ​សម្លាប់​មេ​ជីវិត​ឈ្មោល​បាន នៅ​ពេល​អ្នក​មកកំពុងមក​រដូវ។ ទោះជាយ៉ាងណាក៏ដោយ ក្នុងអំឡុងពេលនេះ គេមិនណែនាំឲ្យអ្នកប្រើប្រាស់វារួមផ្សំជាមួយនឹងសន្ទះពាំងមាត់ស្បូន ឬ គម្របមាត់ស្បូន ព្រោះអ្នកមានហានិភ័យនៃការកើតជម្ងឺ Toxic Shock Syndrome។ អ្នកមានជម្រើសក្នុងការប្រើវារួមផ្សំជាមួយស្រោមអនាម័យបាន។ ថ្នាំសម្លាប់មេជីវិតឈ្មោលមិនប៉ះពាល់ដល់ការមករដូវ ឬអរម៉ូនរបស់អ្នកនោះឡើយ។