ការប្រើកងដាក់ក្រោមស្បែកជាមធ្យោបាយពន្យារកំណើតអាចមានផលល្អ និង ផលអាក្រក់។ ឧទាហរណ៍ បុគ្គលដែលមានមុនលើមុខអាចសង្កេតឃើញថាមុនលើមុខកាន់តែប្រសើរឡើង ឬកាន់តែយ៉ាប់ជាងមុនទៀត។ វាក៏មានគុណសម្បត្តិ និងគុណវិបត្តិផងដែរ ដែលទាក់ទងនឹងការផ្លាស់ប្តូររបត់នៃការមករដូវ ហើយអាចមានអំណោយផលសម្រាប់អ្នកដែលមានការមិនមករដូវទៀងទាត់។ ប្រសិនបើអ្នកចង់មករដូវទៀងទាត់ ការដាក់កងក្រោមស្បែកប្រហែលជាមិនមែនជាជម្រើសដ៏ល្អសម្រាប់អ្នកនោះទេ។
ផលរំខាននៃកងដាក់ក្រោមស្បែក
ផលរំខានទូទៅបំផុតនៃការផ្សាំពន្យារកំណើតគឺទាក់ទងទៅនឹងការផ្លាស់ប្តូរនៃការហូរឈាមតាមទ្វារមាស។
អ្នកប្រើវិធីពន្យារកំណើតបានរាយការណ៍ថាមានការធ្លាក់ឈាមមិនទៀងទាត់ ជាពិសេសរយៈពេល 6-12 ខែដំបូង (នេះអាចមានន័យថាឃើញនៅចន្លោះពេលមករដូវ ឬមានរដូវយូរជាង ធ្ងន់ជាងមុន ហូរឈាមមិនទៀងទាត់ពេញមួយពេលដែលការដាក់បញ្ចូល ឬមិនមានរដូវទាល់តែសោះ)។ អ្នកត្រូវតែមិនអីទេជាមួយនឹងរដូវមិនទៀងទាត់ ប្រសិនបើអ្នកកំពុងគិតអំពីការផ្សាំ។ អ្នកប្រើការផ្សាំទំនងជាមានការធ្លាក់ឈាមមិនទៀងទាត់ ឬមិនមានប្រចាំខែ ជាជាងការធ្លាក់ឈាមមិនទៀងទាត់ [8]។
ផលរំខាន់ផ្សេងទៀតមានដូចជា
- មុខមុន (អាចកាន់តែប្រសើរឡើង ឬកាន់តែយ៉ាប់ជាងមុន)
- មានបម្លាស់ប្តូរចំណង់អាហារ
- មានរមួលចុកពោះ និង/ឬ ហើមពោះ
- មានបម្លាស់ប្តូរចំំណង់ផ្លូវភេទ
- គីសដៃស្បូន
- ជម្ងឺបាក់ទឹកចិត្ត
- ស្បែកផ្លាស់ប្តូរពណ៌ និង បន្សល់នៅស្លាកស្នាមនៅត្រង់កន្លែងដែលដាក់កងក្រោមស្បែក (ស្រ្តីខ្លះអាចឡើងស្នាមផ្លែត្រង់ស្នាមវះនោះ)
- វិលមុខ
- ជ្រុះសក់
- ឈឺក្បាល
- ចង្អោរ
- ជម្ងឺព្រួយបារម្មណ៍
- ស្រគៀរសុដន់ និង
- មានការឈឺចាប់ ឬ ជាំនៅត្រង់កន្លែងដែលគេដាក់កងក្រោមស្បែកនោះ ប៉ុន្តែអាការៈនេះស្តែងចេញតែរយៈពេល មួយ ឬ ពីរសប្តាហ៍តែប៉ុណ្ណោះ។ [9]
ប្រសិនបើបន្ទាប់ពីរយៈពេល ប្រាំមួយខែហើយ អ្នកនៅតែរងនូវផលរំខានទាំងអស់នេះ ហើយអ្នកមិនអាចទ្រាំទ្របាន អ្នកអាចឲ្យគេដកកងចេញឲ្យអ្នកបាន និងធ្វើការផ្លាស់ប្តូរទៅប្រើប្រាស់មធ្យោយបាយពន្យារកំណើតណាមួយផ្សេងទៀត។
អ្នកត្រូវចងចាំថា កងដាក់ក្រោមស្បែកមិនអាចការពារអ្នកពីជម្ងឺកាមរោគបាននោះទេ (STIs)។
ផលវិបាកអវិជ្ជមាននៃកងដាក់ក្រោមស្បែក
ផលវិបាកដែលមិនសូវមាន
ការឆ្លងមេរោគនៅកន្លែងស្បែកដែលគេបានវះដាក់កង ការឆ្លងមេរោគភាគច្រើននឹងបង្កឡើងក្នុងរយៈពេលពីរខែដំបូងបន្ទាប់ពីការដាក់បញ្ចូល។
មានភាពលំបាកនៃការយកកងចេញពីស្បែក។ ករណីនេះភាគច្រើនកម្រកើតមានណាស់ ប្រសិនបើអ្នកបានធ្វើការដាក់បញ្ចូលកងក្រោមស្បែកដោយអ្នកផ្តល់សេវាថែទាំសុខភាពមានជំនាញ និងការបណ្តុះបណ្តាលបានត្រឹមត្រូវ។
ផលវិបាកកម្រ
ការរបូតកងក្រោមស្បែកចេញពីស្បែក។ ប្រសិនបើវាកើតឡើងភាគច្រើនវានឹងកើតឡើងក្នុងរយៈពេល បួន ខែដំបូងបន្ទាប់ពីការដាក់បញ្ចូល។ ក្នុងករណីកម្រដែលកងក្រោមស្បែកនោះរបូតចេញមកដោយខ្លួនឯង អ្នកគួរតែចាប់ផ្តើមប្រើមធ្យោបាយពន្យារកំណើតមួយទៀតភ្លាមៗ ហើយទៅជួបអ្នកផ្តល់សេវាថែទាំសុខភាពរបស់អ្នក ដើម្បីរកដំណោះស្រាយ។[10]
ផលវិបាកដែលកម្រខ្លាំងមែនទែន
កងក្រោមស្បែកបម្លាស់ទីពីកន្លែងដើម ។ មានរបាយការណ៍មួយចំនួនដែលបានរាយការណ៍ថាគេបានរកឃើញកងក្រោមស្បែកផ្នែកផ្សេងទៀតនៃរាងកាយ ភាគច្រើនដោយសារតែការដាក់បញ្ចូលមិនត្រឹមត្រូវ។ នៅក្នុងអត្ថបទ នេះដែលត្រូវបានសរសេរដោយ Zhang និងសហសេវិក ដោយក្នុងនោះគេបានលើកឡើងថា បម្លាស់ប្តូរទីតាំងនៃពន្យារកំណើត គឺជារឿងដ៏កម្រមួយ ហើយនៅពេលដែលមានករណីនេះកើតឡើង វាមិនផ្លាស់ទីឆ្ងាយចេញពីដៃនោះទេ។ ក្នុងករណីដែលកម្របំផុតប៉ុណ្នោះ ដែលកងក្រោមស្បែកនេះ អាចផ្លាស់ទីទៅសួត តាមរយៈចរន្តឈាម។
ចុះបើខ្ញុំមិនចូលចិត្តការធ្លាក់ឈាមបន្តាកប្រឡាក់ខោក្នុង នោះតើខ្ញុំត្រូវធ្វើដូចម្តេច?
ការធ្លាក់ឈាមបន្តាកប្រឡាក់ខោ ឬការធ្លាក់ឈាមមិនប្រក្រតី គឺជាផលរំខានដែលឧស្សាហ៏កើតមានឡើង ប៉ុន្តែវាមិនបង្កឲ្យមានគ្រោះថ្នាក់នោះទេ។ ចំពោះស្ត្រីភាគច្រើន ការធ្លាក់ឈាមនឹងកាន់តែស្រាលទៅៗ ឬបាត់ទៅទាំងស្រុងតែម្តង បន្ទាប់ពីរយៈពេលមួយឆ្នាំដំបូងនៃការដាក់បញ្ចូលកងក្រោមស្បែក។ ប្រសិនបើអ្នកមិនអាចសម្របខ្លួនទៅនឹង ផលរំខានដែលទាក់ទងនឹងកងក្រោមស្បែក រួមទាំងការមករដូវមិនទៀងទាត់ ឬការធ្លាក់ឈាមបន្តាកប្រឡាក់ខោក្នុង អ្នកគួរតែទៅពិគ្រោះជាមួយអ្នកផ្តល់សេវាថែទាំសុខភាពរបស់អ្នកអំពីផ្លាស់ប្តូរទៅប្រើប្រាស់មធ្យោបាយពន្យារកំណើតណាមួយផ្សេងទៀត។
ប្រសិនបើខ្ញុំមានកងដាក់ក្រោមស្បែក ហើយខ្ញុំមិនមករដូវ តើខ្ញុំកំពុងតែមានផ្ទៃពោះឬអត់?
វាជារឿងធម្មតាទេដែលមានការបាត់រដូវមួយឆ្នាំដំបូងបន្ទាប់ពីការដាក់បញ្ចូលកងក្រោមស្បែក។ នេះមិនមែនជាសញ្ញានៃការមានផ្ទៃពោះទេ។ ក្នុងអំឡុងឆ្នាំទី១ នៃការប្រើប្រាស់កងក្រោមស្បែក មានស្រ្តីតិចជាង 1% ដែលមានផ្ទៃពោះ ហើយស្រ្តីដែលមានផ្ទៃពោះនោះមានភាគរយជាកូនក្រៅស្បូន។ ការមានកូនក្រៅស្បូន កើតឡើងនៅពេលដែលអូវ៊ុលដែលបានបង្កកំណើតហើយ វាទៅកាច់សំបុកនៅក្រៅស្បូន ភាគច្រើនគឺវាស្ថិតនៅដៃស្បូននេះឯង ។ ប្រសិនបើអ្នកសង្ស័យថាអ្នកកំពុងមាន សញ្ញាដំបូងនៃការមានផ្ទៃពោះអ្នកគប្បីគួរតែធ្វើតេស្តពិនិត្យផ្ទៃពោះដើម្បី បញ្ជាក់ ថាអ្នកពិតជាមានផ្ទៃពោះមែនឬអត់។
សញ្ញាដំបូងនៃការមានកូនក្រៅស្បូនគឺស្រដៀងទៅនឹងការមានផ្ទៃពោះធម្មតាដែរ។ នៅពេលដែលផ្ទៃពោះមានអាយុកាន់តែច្រើនសប្តាហ៍ អ្នកអាចចាប់ផ្តើមមានសញ្ញាផ្សេងទៀតដូចជា ការធ្លាក់ឈាមតាមទ្វារមាសខុសធម្មតា ការឈឺចាប់ធ្ងន់ធ្ងរកើតឡើងភ្លាមៗនៅផ្នែកខាងក្រោមនៃពោះ ឈឺស្មា និងឈឺខ្នងផ្នែកខាងក្រោម។ ប្រសិនបើការធ្វើតេស្តរបស់អ្នកចេញមកវិជ្ជមាន អ្នកគួរតែទៅជួបអ្នកផ្តល់សេវាថែទាំសុខភាពជាបន្ទាន់ ដើម្បីធ្វើការវាយតម្លៃឲ្យបានត្រឹមត្រូវ។ ដោយសារសារធាតុចិញ្ចឹមដែលមាននៅក្នុងស្បូនមិនអាចទៅដល់ដៃស្បូនបាន គភ៌ដែលនៅដៃស្បូននោះមិនអាចមានជីវិតរស់នៅទេ។ ការមានកូនក្រៅស្បូនជាធម្មតាអាចព្យាបាលបានដោយប្រើថ្នាំបញ្ឈប់ការលូតលាស់របស់គភ៌។ ក្នុងករណីខ្លះដែលដៃស្បូនរហែក អ្នកនឹងត្រូវធ្វើការវះកាត់ដើម្បីយកគភ៌ចេញ។
