តើគេដក IUD ស្ពាន់ចេញដោយរបៀបណា?

ដំណើរការនៃការដក IUD ស្ពាន់ចេញគឺស្រដៀងទៅនឹងការដក IUD អរម៉ូនចេញដែរ។ ខណៈពេលដែល IUD ស្ពាន់គឺជាមធ្យោបាយពន្យារកំណើតរយៈពេលវែងដែលមានប្រសិទ្ធភាពពី ៣​ ទៅ ១២ ឆ្នាំ វាអាចដកចេញបានគ្រប់ពេលដែលអ្នកចង់បាន។ ជាធម្មតា IUD ស្ពាន់នឹងត្រូវបានយកចេញដោយសារហេតុផលផ្សេងៗ មានដូចជាការផ្លាស់កងថ្មីបន្ទាប់ពីកងហួសកំណត់ អ្នកចង់មានផ្ទៃពោះ និងប្តូរទៅប្រើប្រាស់វិធីសាស្រ្តពន្យារកំណើតផ្សេង ក៏ដូចជាហេតុផលផ្សេងទៀតជាច្រើន ។ ការដក IUD ចេញគួរតែធ្វើឡើងដោយអ្នកផ្តល់សេវាថែទាំសុខភាពដែលមានការបណ្តុះបណ្តាលត្រឹមត្រូវ។
នៅឯកន្លែងថែទាំសុខភាព គេនឹងប្រាប់ឲ្យអ្នកគេងផ្ងារ ស្រដៀងទៅនឹងពេលធ្វើការត្រួតពិនិត្យរោគស្ត្រីដែរ។ អ្នកផ្តល់សេវានឹងលើកជើងរបស់អ្នកឡើង ដោយដាក់ប្រអប់ជើងទាំងសងខាងលើចន្ទល់ ហើយលាបទឹករំអិលលើឧបករណ៍ចំពុះទា ហើយប្រើប្រាស់វាដើម្បីទប់មាត់ស្បូនរបស់អ្នកឲ្យនៅបើកចំហ។ បន្ទាប់មក អ្នកផ្តល់សេវាថែទាំសុខភាពដែលបានទទួលការបណ្តុះបណ្តាលត្រឹមត្រូវនឹងប្រើកម្លាំងដៃថ្នមៗដើម្បីទាញខ្សែ IUD ចេញមក។ IUD នឹង​បត់​ទៅ​ក្រោយ ហើយ​នឹងងាយរអិលចេញ​ពី​ស្បូន​តាមរយៈ​មាត់ស្បូន។ ដំណើរការនេះនឹងចំណាយពេលប្រហែលពីរទៅប្រាំនាទី។ ក្នុងករណីដែល IUD មិនរអិលចេញដោយងាយ អ្នកផ្តល់សេវាថែទាំសុខភាពអាចប្រើថ្នាំដើម្បីបន្ទន់មាត់ស្បូន។ ក្នុងករណីដ៏កម្រដែល IUD ស្ពាន់នៅស្ទះដកមិនចេញតែម្តង អ្នកផ្តល់សេវាថែទាំសុខភាពរបស់អ្នកអាចដកវាចេញដោយការវះកាត់។ អ្នកនឹងត្រូវបានគេដាក់សន្តំ ដើម្បីគ្រប់គ្រងការឈឺចាប់ដែលមិនអាចទ្រាំបាន។

តើការដក IUD ស្ពាន់ចេញមានការឈឺចាប់ខ្លាំងប៉ុនណា?

ការដក IUD ស្ពាន់ ចេញគឺមានការឈឺចាប់តិចជាងការដាក់បញ្ចូលវា។ ខណៈពេលដែលស្ត្រីខ្លះមានអារម្មណ៍មិនស្រួល ឬឈឺចាប់ខ្លាំងអំឡុងពេលដកចេញ អ្នកខ្លះទៀតមិនមានអារម្មណ៍អ្វីសោះ។ ប្រសិនបើអ្នកមាន IUD ផុតកំណត់ដែលអ្នកចង់ផ្លាស់ប្តូរជាមួយនឹង IUD ស្ពាន់ថ្មី អ្នកអាចដាក់បញ្ចូលវាភ្លាមៗបាន។

តើមានអ្វីកើតឡើងប្រសិនបើខ្ញុំពន្យារពេលដក IUD ស្ពាន់ដែលហួសថ្ងៃផុតកំណត់?

នៅពេលដែល IUD ស្ពាន់បានដល់ពេលផុតកំណត់ វាមិនមានប្រសិទ្ធភាពក្នុងការជួយការពារអ្នកកុំឲ្យមានផ្ទៃពោះនោះទេ។ អ្នក​ក៏​មាន​ហានិភ័យ​នៃ​ការ​ឆ្លង​មេរោគ ​ដែល​អាច​បង្ក​ឲ្យ​អ្នកលែងមានកូនបានទៀត។ វាជារឿងល្អក្នុងការកត់ចំណាំកាលបរិច្ឆេទនៃការដាក់ IUD និងដក IUD របស់អ្នក ឬសុំឲ្យអ្នកផ្តល់សេវាថែទាំសុខភាពរបស់អ្នករំលឹកប្រាប់អ្នកនៅពេលដែលកាលបរិច្ឆេទដក IUD របស់អ្នកជិតមកដល់។

តើខ្ញុំអាចដក IUD ស្ពាន់បានដោយខ្លួនឯងបានទេ?

ខណៈពេលដែលស្រ្តីមួយចំនួនបានដក IUD ចេញដោយខ្លួនឯងបាន បច្ចុប្បន្ននេះវាមិនមានការស្រាវជ្រាវគ្រប់គ្រាន់ ឬ ការណែនាំវេជ្ជសាស្រ្ដដើម្បីគាំទ្រការដកដោយខ្លូនឯងនោះទេ។ យើងណែ​នាំឲ្យអ្នកយកវាចេញដោយអ្នកផ្តល់សេវាថែទាំសុខភាពវិញ។ ប្រសិនបើអ្នកមិនពេញចិត្តនឹង IUD របស់អ្នកទេ ការដែលអ្នកទៅជួបអ្នកផ្តល់សេវាថែទាំសុខភាពរបស់អ្នកដើម្បីយកវាចេញ នឹងអាចធានាថាការដកចេញប្រកបដោយសុវត្ថិភាព។ ការធ្វើបែបនេះធ្វើឲ្យងាយស្រួលក្នុងការគ្រប់គ្រងផលរំខានផ្សេងៗបន្ទាប់ពីការដកកងចេញ ហើយនឹងមានឱកាសដើម្បីនិយាយអំពីជម្រើសផ្សេងទៀតក្នុងការពន្យារកំណើត។ ប្រសិនបើអ្នកដកកងចេញដោយសារអ្នកចង់មានផ្ទៃពោះ អ្នកអាចពិភាក្សាជាមួយអ្នកផ្តល់សេវារបស់អ្នកអំពីអ្វីដែលអ្នកគួរធ្វើ ដើម្បីត្រៀមខ្លួនមានផ្ទៃពោះដែលមានសុខភាពល្អ។

IUD ដែលគ្មានអរម៉ូនរបស់ខ្ញុំវារបូតចេញមកក្រៅដោយខ្លួនឯង។ តើខ្ញុំត្រូវធ្វើដូចម្តេចទៅ?

ការរបូត IUD ចេញមកក្រៅកើតឡើងក្នុងចំណោម ២% ទៅ ១០% នៃស្រ្តីដែលដាក់វាក្នុងអំឡុងឆ្នាំដំបូងបន្ទាប់ពីការដាក់បញ្ចូល។ ការស្រាវជ្រាវដែលធ្វើឡើងដោយលោក Anthony និងសហសេវិក បង្ហាញថា ការរបូត IUD ចេញច្រើននឹងកើតឡើងលើស្រ្តីដែល៖
មិនធ្លាប់មានផ្ទៃពោះសោះ
មានអាយុក្មេង (អាយុតិចជាង ២០ ឆ្នាំ)
មានប្រវត្តិធ្លាក់ឈាមច្រើនពេលមករដូវ
ធ្លាប់បានដាក់បញ្ចូល IUD ស្ពាន់ភ្លាមៗបន្ទាប់ពីសម្រាលកូន ឬ បន្ទាប់ពី ការរំលូតកូននៅត្រីមាសទីពីរ
ជួនកាល ការរបូតចេញអាចកើតឡើងដោយសារតែ IUD ផ្លាស់ប្តូរពីទីតាំងរបស់វា ឬវាធ្លាក់ចូលផ្នែកខាងក្រោមនៃស្បូន ហើយចាប់ផ្តើមរអិលចេញ។ ការផ្លាស់ប្តូរទីតាំងរបស់ IUD អាចកើតឡើងជុំវិញពេលដែលដាក់បញ្ចូលកង ឬបណ្តាលមកពីលក្ខណៈនៃស្បូន រួមទាំងមុំរបស់វា ទំហំ ឬវត្តមាននៃលក្ខខណ្ឌមិនប្រក្រតីផ្សេងៗដូចជា ដុំសាច់ដែលអាចបណ្តាលឲ្យស្បូនមានរូបរាងមិនធម្មតា។ ស្ត្រីដែលមានការរបូតចេញ IUD ពីមុន មានឱកាស ២០% ទៅ​​​ ៣០% ក្នុងការរបូត IUD ចេញជាលើកទី២​ ។ ប្រសិនបើ IUD របស់អ្នកចេញមកតែពាក់កណ្តាល អ្នកគួរតែឲ្យអ្នកផ្តល់សេវាថែទាំសុខភាពរបស់អ្នកយកវាចេញឲ្យអ្នក។
នៅពេលដែលវារបូតចេញមកក្រៅហើយ អ្នកអាចពិភាក្សាជាមួយអ្នកផ្តល់សេវាថែទាំសុខភាពរបស់អ្នក ដើម្បីដាក់កងចូលមួយទៀតភ្លាមៗ ឬ ប្តូរទៅប្រើវីធីសាស្រ្តពន្យារកំណើតណាមួយក្រៅពីនេះ។

តើខ្ញុំអាចមានផ្ទៃពោះបាននៅពេលណាបន្ទាប់ពីខ្ញុំបានដក IUD ស្ពាន់ចេញហើយ?

ជាធម្មតា សមត្ថភាពក្នុងការមានកូន នឹងត្រលប់មកវិញភ្លាមៗ នៅពេលដែល IUD ស្ពាន់ ត្រូវបានដកចេញ។ ដូច្នេះ អ្នក​គួរ​តែអាចមាន​គភ៌ក្នុង​អំឡុង​ពេល​នៃ​ការ​បញ្ចេញ​អូវ៊ុលលើកបន្ទាប់របស់​អ្នក​។ ប្រសិនបើអ្នកមិនមែនកំពុងព្យាយាមមានផ្ទៃពោះទេ អ្នកគួរតែផ្លាស់ប្តូរ IUD ដែលបានដកចេញរួចជាមួយនឹង IUD ថ្មី ឬប្រើវិធីសាស្រ្តពន្យារកំណើតមួយទៀតភ្លាមៗ នៅពេលដែល IUD ស្ពាន់បានរបូតចេញ ឬ ត្រូវបានដកចេញ។