មនុស្សម្នាក់អាចជ្រើសរើសយក IUD ចេញដោយហេតុផលផ្សេងៗ។ ទាំងនេះរួមមានការផុតកំណត់ និងការផ្លាស់ប្តូរ IUD ការមានផ្ទៃពោះ ឬការផ្លាស់ប្តូរទៅវិធីពន្យារកំណើតផ្សេងក្រៅពីនេះ។ ការសិក្សានេះធ្វើឡើងដោយ Gbagbo និង Kayi នៅប្រទេសហ្គាណា ពន្យល់ពីហេតុផលបន្ថែមទៀតសម្រាប់ការដក IUD ។ ពួកគេបាននិយាយទាក់ទងទៅនឹងកត្តាសង្គម និងវប្បធម៌។ ប្រសិនបើអ្នកចង់បញ្ឈប់ការប្រើប្រាស់ប្រភេទពន្យារកំណើត IUD នេះដោយហេតុផលណាមួយ អ្នកគប្បីគូរតែឲ្យអ្នកផ្តល់សេវាថែទាំសុខភាពដែលបានទទួលការបណ្តុះបណ្តាលជាអ្នកយកចេញ។
តើត្រូវការរយៈពេលប៉ុន្មានដែរក្នុងការដក IUD ចេញ?
ជាធម្មតា ដំណើរការនៃការដក IUD ចេញនឹងចំណាយពេលប្រហែល ២ទៅ ៥ នាទី។ ដូចនៅក្នុងដំណើរការស៊កបញ្ចូលដែរ តែនៅពេលនោះអ្នកផ្តល់សេវាថែទាំសុខភាពដែលបានទទួលការបណ្តុះបណ្តាលនឹងប្រាប់ឲ្យអ្នកដេកផ្ងារ ហើយដាក់ជើងទាំងសងខាងរបស់អ្នកលើចន្ទល់សងខាង។ ឧបករណ៍ចំពុះទានឹងត្រូវបានប្រើប្រាស់ដើម្បីទប់មាត់ស្បូនរបស់អ្នកឲ្យបើក ហើយអ្នកផ្តល់សេវានឹងប្រើដង្កៀបវេជ្ជសាស្រ្តដើម្បីទាញខ្សែ IUD ចេញដោយថ្នមៗ។ IUD អាចពត់បាន ហើយងាយនឹងរអិលចេញមកក្រៅ។ នៅក្នុងករណីកម្រមួយចំនួនដែល IUD មិនរអិលចេញដោយងាយៗនោះ អ្នកផ្តល់សេវាថែទាំសុខភាពរបស់អ្នកនឹងប្រើថ្នាំដើម្បីពង្រីកមាត់ស្បូនរបស់អ្នក ជូនថ្នាំបំបាត់ការឈឺចាប់ឲ្យអ្នក និងដក IUD ចេញ។ ប្រសិនបើអ្នកមាន IUD ចាស់ ហើយចង់ផ្លាស់ប្តូរដាក់ IUD ថ្មីអាច អ្នកអាចឲ្យគេស៊លចូលភ្លាមៗនៅពេលនោះបាន។
តើអ្នកនឹងមានការឈឺចាប់កម្រិតណាដែរនៅពេលដែលដក IUD ចេញ?
ខណៈពេលដែលស្ត្រីមួយចំនួនបានរាយការណ៍ថាមានអារម្មណ៍មិនស្រួល និងការចុកចាប់បន្តិច មានអ្នកផ្សេងទៀតមិនមានអារម្មណ៍អ្វីទាំងអស់។ ទោះជាយ៉ាងណាក៏ដោយ ការឈឺចាប់ដែលអ្នកមានអារម្មណ៍អំឡុងពេលដកចេញគឺតិចជាង ការឈឺចាប់នៅពេលដែលអ្នកស៊លចូល។ ការឈឺចាប់ដែលអ្នកមាន ក្នុងរយៈពេលពីរបីថ្ងៃបន្ទាប់ពីការបញ្ចូលអាចកាត់បន្ថយបានដោយការប្រើថ្នាំបំបាត់ការឈឺចាប់ដូចជាថ្នាំ ibuprofen ។
តើអ្នកនឹងមានការធ្លាក់ឈាមរយៈពេលប៉ុន្មានបន្ទាប់ពីការដក IUD ចេញ?
មនុស្សម្នាក់អាចមាននូវការធ្លាក់ឈាមស្រាលៗ ឬហូរប្រឡាក់ខោតិចតួចបន្ទាប់ពីការដក IUD ចេញ។ ការធ្លាក់ឈាមនេះអាចបន្តពីរបីថ្ងៃទៀតបន្ទាប់ពីនោះ។ អ្នកដែលទើបតែដក IUD ចេញត្រូវបានណែនាំអោយប្រើក្រដាសអនាម័យយ៉ាងហោចណាស់ 48 ម៉ោង។ បន្ទាប់ពី 48 ម៉ោង អ្នកអាចប្រើផលិតផលអនាម័យសម្រាប់ទប់រដូវផ្សេងទៀតបានដែលមាន រួមទាំង តុមប៉ុង ឬពែងរដូវ។ ការធ្លាក់ឈាមខ្លាំងឬការធ្លាក់ឈាម (ជោគសំឡីអនាម័យ ឬ តមប៉ុងលើសពីមួយក្នុងរយៈពេល ១ម៉ោង ) ជាមួយនឹងដុំឈាមធំៗ (ទំហំប៉ិនកាក់ ឬធំជាងនឹង) គឺមិនធម្មតាមិនធម្មតានោះទេ។ ក្នុងករណីដែលអ្នកជួបប្រទះបញ្ហានេះ អ្នកគួរតែទៅពិគ្រោះជាមួយអ្នកផ្តល់សេវាថែទាំសុខភាពរបស់អ្នកជាបន្ទាន់។
បន្ទាប់ពីការដក IUD អរម៉ូនចេញ តើអ្នកអាចមានការទម្លាក់អ៉ូវុលបាននៅពេលណា?
បន្ទាប់ពីការដក IUD អរម៉ូនចេញ អ្នកអាចចំណាយពេលរហូតដល់ ៣ ខែ មុនពេលវដ្តរដូវធម្មតារបស់អ្នកចាប់ផ្តើមឡើងវិញ។ ទោះជាយ៉ាងណាក៏ដោយ អ្នកនឹងអាចមានកូនភ្លាមៗបន្ទាប់ពីការដក IUD ចេញ។ ប្រសិនបើអ្នកមិនព្យាយាមមានផ្ទៃពោះទេ អ្នកផ្តល់សេវាថែទាំសុខភាពរបស់អ្នកនឹងណែនាំអ្នកឲ្យយចាប់ផ្តើមប្រើវិធីសាស្រ្តពន្យារកំណើតថ្មីយ៉ាងហោចណាស់ប្រាំពីរថ្ងៃមុនពេលដក IUD ចេញ។ នេះនឹងធានាថាអ្នកនឹងមានវិធីសាស្ត្រការពារការមានផ្ទៃពោះដ៏មានប្រសិទ្ធភាពនៅពេលដែលអ្នកដក IUD ចេញ។ ជម្រើសផ្សេងទៀតគឺការស៊កបញ្ចូល IUD ថ្មីភ្លាមៗ។ អ្នកក៏អាចប្រើស្រោមអនាម័យរហូតដល់មធ្យោបាយពន្យារកំណើតផ្សេងទៀតចាប់ផ្តើមមានប្រសិទ្ធភាព។
ការរួមភេទបន្ទាប់ពីការដក IUD អរម៉ូនចេញ
វាមានសុវត្ថិភាពក្នុងការរួមភេទ មួយថ្ងៃមុន ឬក្រោយការដក IUD អរម៉ូន ចេញ។ ទោះជាយ៉ាងណាក៏ដោយ ប្រសិនបើអ្នកមិនមែនដក IUD ចេញក្នុងគោលបំណងចង់ផ្ទៃពោះទេ អ្នកផ្តល់សេវាថែទាំសុខភាពរបស់អ្នកនឹងណែនាំឲ្យអ្នកជៀសវាងការរួមភេទ ក៏ដូចជាការប្រើស្រោមអនាម័យអំឡុងពេលរួមភេទ ឬចាប់ផ្តើមប្រើមធ្យោបាយពន្យារកំណើតផ្សេងទៀតសម្រាប់រយៈពេល 7 ថ្ងៃមុនពេលដក IUD ចេញ។ នេះគឺដោយសារតែមេជីវិតឈ្មោលអាចរស់បានក្នុងប្រដាប់បន្តពូជរបស់ស្ត្រីរហូតដល់រយៈពេលប្រាំថ្ងៃ ហើយអ្នកអាចនឹងមានផ្ទៃពោះបានភ្លាមៗបន្ទាប់ពី IUD ត្រូវបានដកចេញ។ នៅពេលដែល IUD ត្រូវបានដកចេញ អ្នកអាចស៊កបញ្ចូលIUD មួយទៀតភ្លាមៗ ឬអ្នកអាចប្រើស្រោមអនាម័យការពារការមានផ្ទៃពោះរហូតដល់មធ្យោបាយពន្យារកំណើតផ្សេងទៀត ចាប់ផ្តើមមានប្រសិទ្ធភាព។
តើបន្ទាប់ពីដក IUD អរម៉ូនរយៈពេលប៉ុន្មានទើបអ្នកអាចមករដូវវិញបាន?
ប្រសិនបើវដ្តរដូវរបស់អ្នកមានលក្ខណៈធម្មតាមុនពេលបញ្ចូល IUD អ័រម៉ូន អ្នកគួរតែរំពឹងថាវានឹងត្រលប់ទៅកាលវិភាគធម្មតារបស់អ្នកវិញបន្ទាប់ពី IUD ត្រូវបានដកចេញ។ សម្រាប់មនុស្សមួយចំនួន រដូវនឹងត្រលប់មកវិញភ្លាមៗ ចំណែកអ្នកខ្លះទៀតអាចចំណាយពេលដល់ទៅ ៣ ខែឯណោះ។
តើខ្ញុំអាចដក IUD អរម៉ូនចេញបានដោយខ្លួនឯងនៅផ្ទះបានដែរឬទេ?
អ្នកប្រហែលជាអាចរកឃើញរឿងមួយចំនួននៅលើបណ្តាញអ៊ីនធឺណិតអំពីបទពិសោធន៍នៃអ្នកដែលបានដក IUD របស់ពួកគេហើយ។ យើងមិនណែនាំឲ្យអ្នកសាកល្បងដកវាដោយខ្លួនឯងនោះទេ។ មិនមានការស្រាវជ្រាវគ្រប់គ្រាន់នាពេលបច្ចុប្បន្ននេះដើម្បីដឹងឲ្យច្បាស់ថាតើការធ្វើបែបនេះមានសុវត្ដិភាពដែរឬអត់ទេ។ ប្រសិនបើអ្នកមិនពេញចិត្តនឹង IUD របស់អ្នកទេ ការដែលអ្នកទៅជួបអ្នកផ្តល់សេវាថែទាំសុខភាពរបស់អ្នកដើម្បីយកវាចេញ នឹងអាចធានាថានីតិវិធីនៃការដកចេញប្រកបដោយសុវត្ថិភាព។ វាក៏នឹងផ្តល់ឲ្យអ្នកនូវឱកាសដើម្បីនិយាយអំពីជម្រើសផ្សេងទៀតសម្រាប់ការការពារការមានផ្ទៃពោះ។ ប្រសិនបើអ្នកត្រៀមខ្លួនដើម្បីមានផ្ទៃពោះ អ្នកអាចពិភាក្សាជាមួយអ្នកផ្តល់សេវារបស់អ្នកអំពីអ្វីដែលអ្នកគួរធ្វើ ដើម្បីរៀបចំសម្រាប់ការមានផ្ទៃពោះដែលមានសុខភាពល្អ។
