អ្នកអាចដាក់កងអរម៉ូនក្នុងស្បូននេះពេលណាក៏បានដែរក្នុងវដ្តរដូវរបស់អ្នក។ អ្នកផ្តល់សេវាសុខភាពខ្លះចូលចិត្តដាក់កងអរម៉ូនក្នុងស្បូននៅពេលដែលអ្នកមករដូវដោយសារពេលនោះមាត់ស្បូនរបស់អ្នកមានការបើកជាងធម្មតា ប៉ុន្តែតាមពិតទៅដាក់កងក្នុងស្បូនពេលណាក៏បានដែរឲ្យតែអ្នកមិនមែនកំពុងតែមានផ្ទៃពោះ។
តើអ្នកត្រូវរៀបចំខ្លួនអ្វីខ្លះដើម្បីត្រៀមខ្លួនដាក់កងអរម៉ូនក្នុងស្បូន?
ជំហានដំបូងក្នុងការដាក់កងអរម៉ូននៅក្នុងស្បូន គឺការពិភាក្សាសុខភាពជាមួយនឹងអ្នកផ្តល់សេវាសុខភាពរបស់អ្នក។ អ្នកនឹងត្រូវបានអ្នកផ្តល់សេវាសួរទាក់ទងនឹងប្រវត្តិសុខភាព និងអាការៈខ្លះៗ ហើយអ្នកនឹងត្រូវបានគេពិនិត្យមាត់ស្បូនដើម្បីសម្រេចថាការដាក់កងអរម៉ូននៅក្នុងស្បូនជាជម្រើសដែលត្រឹមត្រូវសម្រាប់អ្នកដែរឬទេ?[5]
ការធ្វើតេស្តពិនិត្យមុននឹងធ្វើការដាក់កងអរម៉ូននៅក្នុងស្បូនអាចនឹងមានតេស្តសម្រាប់រកជម្ងឺកាមរោគផងដែរ។
នៅពេលណាដែលប្រាកដថាអ្នកមិនមានផ្ទៃពោះ ហើយមិនមានការឆ្លងមេរោគណាមួយទេ នោះអ្នកផ្តល់សេវាសុខភាពរបស់អ្នកនឹងប្រាប់ឲ្យអ្នកគេងលើគ្រែហើយដាក់ជើងទាំងសងកន្ធែក ដោយដាក់បាតជើងនីមួយៗនៅលើកន្លែងដាក់ជើងនៅសងខាងខ្លួន។ នេះគឺមានសភាពស្រដៀងគ្នាទៅនឹងការពិនិត្យផ្នែករោគស្រ្តីផ្សេងដែរ។ សម្រាប់ការរក្សាការសម្ងាត់ គេដាក់គ្របក្រណាត់មួយនៅលើផ្នែកខាងក្រោមនៃខ្លួនរបស់អ្នក។ អ្នកផ្តល់សេវាសុខភាពនឹងពិនិត្យអាងត្រគៀករបស់អ្នកដោយការប្រើប្រាស់ម្រាមដៃរបស់គេ។ ការពិនិត្យនេះនឹងជួយឲ្យអ្នកផ្តល់សេវាសុខភាពកំណត់បាននូវរូបរាង ទំហំ និង ទីតាំង របស់ស្បូន និង អូវ៊ែរ។ ដើម្បីធ្វើឲ្យអ្នកមានផាសុកភាពជាងមុន អ្នកផ្តល់សេវាសុខភាពអាចនឹងឲ្យអ្នកលេបថ្នាំបំបាត់ការឈឺចាប់ ឬ ចាក់ថ្នាំស្ពឹកទៅលើមាត់ស្បូនរបស់អ្នក។
តើដំណើរការការដាក់កងអរម៉ូននៅក្នុងស្បូនចំណាយរយៈពេលប៉ុន្មានដែរ?
ដំណើរការការដាក់កងអរម៉ូននៅក្នុងស្បូនប្រើប្រាស់រយៈពេលប្រមាណជា ៥ ទៅ ១០នាទី។ អ្នកផ្តល់សេវាសុខភាពនឹងពន្យល់អ្នកទាក់ទងទៅនឹងដំណាក់កាលនីមួយៗនៃដំណើរការនេះ ក៏ដូចជាបង្ហាញឲ្យអ្នកឃើញនូវកងអរម៉ូនក្នុងស្បូន និងឧបករណ៍ដែលត្រូវប្រើប្រាស់នៅពេលធ្វើការដាក់ចូលស្បូន។ បន្ទាប់មក អ្នកផ្តល់សេវានឹងបើកទ្វារមាសអ្នកដោយប្រើឧបករណ៍ចំពុះទា ដើម្បីមើលឃើញមាត់ស្បូនឲ្យបានច្បាស់។ ដំណាក់កាលបន្ទាប់គឺការលាងសម្អាតទ្វារមាស និង មាត់ស្បូនដោយការប្រើប្រាស់ថ្នាំសម្លាប់មេរោគ។ អ្នកផ្តល់សេវាសុខភាពនឹងប្រើប្រាស់ឧបករណ៍ស៊កកងអរម៉ូនពិសេសម្យ៉ាងដើម្បីដាក់កងចូលទៅក្នុងស្បូនរបស់អ្នក។ នៅពេលដែលកងអរម៉ូនត្រូវបានដាក់ដោយជោគជ័យហើយ គេនឹងដកឧបករណ៍ស៊កចេញពីទ្វារមាសវិញ។ បន្ទាប់ពីគេសារ៉េកាត់ចុងកន្ទុយរបស់កងអរម៉ូនឲ្យសមល្មមទៅស្បូនរបស់អ្នកហើយ គេនឹងដកចំពុះទាចេញ។ អ្នកផ្តល់សេវាសុខភាពរបស់អ្នកនឹងប្រាប់អ្នកនៅពេលធ្វើការដាក់កងចូលស្បូនចប់សព្វគ្រប់ហើយ ភាគច្រើនគាត់នឹងប្រាប់អ្នកឲ្យសម្រាកបន្តិចសិន ហើយសឹមងើបយឺតៗបន្តិចម្តងៗ ហើយពាក់ខោអាវ។ ក្រោយពីនេះ គេនឹងប្រាប់អ្នកពីអ្វីដែលគួររំពឹងទុកបន្ទាប់ពីការដាក់កងហើយ។
តើអ្នកគួររំពឹងទុក
វាជារឿងធម្មតាទេដែលមានអារម្មណ៍រមួលចុក និងឈឺខ្នង នៅពេលអ្នកបញ្ចូលកងអរម៉ូនក្នុងស្បូន ប៉ុន្តែអារម្មណ៍នេះនឹងបាត់ទៅវិញយ៉ាងឆាប់រហ័សបន្ទាប់ពីអ្នកបានសម្រាក ឬបន្ទាប់ពីការប្រើប្រាស់ថ្នាំបំបាត់ការឈឺចាប់។ ស្ត្រីខ្លះអាចនឹងមានអារម្មណ៍វិលមុខ ដូច្នេះការសម្រាកឲ្យបានគ្រប់គ្រាន់បន្ទាប់ពីការដាក់បញ្ចូលគឺជារឿងសំខាន់។ វាអាចនឹងមានការធ្លាក់ឈាមតិចតួច ឬការធ្លាក់ឈាមល្មមបន្ទាប់ពីការបញ្ចូល។ ទោះបីជាការបញ្ចូលកងអរម៉ូនក្នុងស្បូន មិនមែនជានីតិវិធីស្មុគស្មាញ ច្បាប់នៅក្នុងប្រទេសរបស់អ្នកអាចតម្រូវឲ្យអ្នកមានអ្នកកំដរមកជាមួយដើម្បីយកអ្នកទៅផ្ទះបាន។ អ្នកត្រូវបញ្ជាក់ពីច្បាប់នេះជាមួយអ្នកផ្តល់សេវាថែទាំសុខភាពរបស់អ្នក នៅពេលអ្នកកក់ការណាត់ជួបទទួលសេវាដាក់កង។ ប៉ុន្តែទោះបីជាមិនចាំបាច់ក៏ដោយ តែនៅពេលដែលអ្នកមានអ្នកជូនអ្នកទៅវិញទៅមក វានឹងសម្រួលដល់ការជាសះស្បើយ និងការសម្រាករបស់អ្នក ដើម្បីកាត់បន្ថយផលវិបាកអវិជ្ជមានពីការធ្វើការដាក់កង។
តើការរមួលចុក នឹងបន្តដល់រយៈពេលនប៉ុន្មានបន្ទាប់ពីការដាក់កងអរម៉ូនក្នុងស្បូន?
អ្នកនឹងអាចមានអារម្មណ៍រមួលចុកបន្ទាប់ពីការស៊កកងអរម៉ូននៅក្នុងស្បូន។ សម្រាប់មនុស្សខ្លះ ការឈឺចាប់អាចនឹងខ្លាំងជាងការចុក ប៉ុន្តែអាមរ្មណ៍នេះនឹងបាត់ទៅវិញក្នុងប្រមាណរយៈពេល ២នាទី។ អ្នកអាចមានអារម្មណ៍ចុក និងឈឺចាប់ត្រង់កន្លែងនោះ ប៉ុន្មានថ្ងៃបន្ទាប់មកទៀត។ តែការឈឺចុកចាប់នេះ អ្នកអាចគ្រប់គ្រងវាដោយងាយដោយការប្រើប្រាស់ថ្នាំបំបាត់ការឈឺចាប់ដូចជា Ibuprofen និង Paracetamol។
តើអ្នកនឹងមានអាការៈធ្លាក់ឈាមរយៈពេលប៉ុន្មានបន្ទាប់ពីការដាក់បញ្ចូលកងអរម៉ូននៅក្នុងស្បូន?
បម្លាស់ប្តូរលក្ខណៈការមករដូវកើតឡើងជាញឹកញាប់បន្ទាប់ពីការដាក់កងអរម៉ូននៅក្នុងស្បូន ប៉ុន្តែការធ្លាក់ឈាមនឹងមកដូចដើមវិញក្នុងប្រមាណពេល បី ទៅ ប្រាំមួយខែ។ កងអរម៉ូននៅក្នុងស្បូនមានឥទ្ធិពលធ្វើឲ្យការមករដូវមិនសូវចុក ឬ ធ្លាក់ឈាមរដូវច្រើន។ មានមនុស្សមួយចំនួនបាននិយាយថាមិនមានការមករដូវប្រមាណជា ១ ទៅ ២ ឆ្នាំបន្ទាប់ពីការដាក់កងផងដែរ។ ប្រសិនបើលក្ខណៈនៃការមករដូវរបស់អ្នកមានការផ្លាស់ប្តូរខ្លាំងពេកដែលធ្វើឲ្យអ្នកមិនអាចទ្រាំទ្របាន អ្នកគប្បីគួរតែពិភាក្សាជម្រើសនៃការពន្យាកំណើតជាមួយនឹងអ្នកផ្តល់សេវាថែទាំសុខភាព។
តើអ្នកអាចឆែកមើលថាតើទីតាំងនៃកងក្នុងស្បូនត្រឹមត្រូវឬអត់តាមរបៀបណា?
នៅពេលដែលកងអរម៉ូនបានស៊កចូលទៅក្នុងស្បូនហើយ អ្នកនឹងចាប់អារម្មណ៍ថាមានខ្សែមួយដែលមានប្រវែងប្រមាណ ២អ៊ីញដែលធ្លាក់ចេញពីស្បូនចូលក្នុងទ្វារមាសខាងលើ(ខ្សែនេះវាមិនធ្លាក់ចេញមកក្រៅទ្វារមាសអ្នកនោះទេ)។ គេដាក់ខ្សែនៅទីនោះដើម្បីងាយស្រួលក្នុងការដកវាចេញវិញ [6]។ នៅពេលដែលបានដាក់វានៅក្នុងហើយ អ្នកគប្បីគួរតែឆែកមើលចុងខ្សែនោះ ពីរទៅបីដងក្នុងមួយឆ្នាំដើម្បីឲ្យប្រាកដថាកងអរម៉ូនក្នុងស្បូននៅរក្សាទីតាំងដដែល។
– លាងដៃជាមួយនឹងសាប៊ូ និង ទឹក ហើយអង្គុយចោងហោង។
– លូកម្រាមដៃចូលទៅក្នុងទ្វារមាសរបស់អ្នករហូតដល់អ្នកអាចប៉ះមាត់ស្បូនរបស់អ្នកបាន អ្នកអាចដឹងបានដោយមាត់ស្បូនមានលក្ខណៈណែន ហើយដូចជ័រ ស្រដៀងទៅចុងច្រមុះរបស់អ្នកដែរ។
– ស្ទាបឲ្យប៉ះខ្សែរបស់កង។ ប្រសិនបើអ្នកនៅអាចប៉ះខ្សែនោះនៅក្នុងទ្វារមាសរបស់អ្នកបាននោះមានន័យថាកងរបស់អ្នករក្សាទីតាំងបានល្អ។ ប៉ុន្តែ ប្រសិនបើអ្នកប៉ះចំផ្នែកដែលរឹងរបស់កងអ្នកនៅមាត់ស្បូននោះ មានន័យថាអ្នកត្រូវទៅទាក់ទងអ្នកផ្តល់សេវាថែទាំដើម្បីឲ្យគេដាក់វាឲ្យត្រូវកន្លែងវិញ។
ចូរអ្នកកុំទាញខ្សែកងអរម៉ូននោះឲ្យសោះ! ប្រសិនបើអ្នកទាញវា កងអរម៉ូនរបស់អ្នកអាចផ្លាស់ទីខុសពីទីតាំងដើមបាន។
– ប្រសិនបើអ្នកមិនចង់លូកទ្វារមាសដើម្បីឆែកមើលទីតាំងវានោះទេ អ្នកផ្តល់សេវាថែទាំសុខភាពរបស់អ្នកអាចឆែកវាបានមួយខែក្រោយពីពេលស៊កកងអរម៉ូននៅក្នុងស្បូនហើយ បន្ទាប់ពីនេះអ្នកអាចឆែកវាជារៀងរាល់ឆ្នាំ។
ដើម្បីកាត់បន្ថយភាគរយនៃការឆ្លងមេរោគ អ្នកផ្តល់សេវាថែទាំសុខភាពរបស់អ្នកនឹងផ្តល់អនុសាសន៍ឲ្យអ្នកចៀសវាងការប្រើប្រាស់ពែងត្រងរដូវ តមប៉ុងទប់រដូវ ឬការរូមភេទតាមទ្វារមាស មុជទឹក (មុជទឹកជ្រមុជទាំងខ្លួន) និងការហែលទឹករយៈពេល ២៤ ម៉ោងបន្ទាប់ពីការដាក់កងហើយ។
តាមការណែនាំ អ្នកគប្បីគួរតែពិភាក្សាជាមួយអ្នកផ្តល់សេវាថែទាំសុខភាពរបស់អ្នកភ្លាមៗ ប្រសិនបើអ្នកមានរោគសញ្ញាខាងក្រោមអំឡុងពេល ២០ថ្ងៃបន្ទាប់ពីការដាក់កងអរម៉ូនក្នុងស្បូន៖
មានការធ្លាក់សមិនប្រក្រតីចេញពីទ្វារមាស
អាការៈក្តៅខ្លួន ញាក់
ការឈឺចាប់យ៉ាងខ្លាំងក្លានៅពេលរួមភេទ
ចង្អោរ ឬ ក្អួត និង
ការឈឺចាប់់នៅផ្នែកខាងក្រោមនៃពោះ
រោគសញ្ញាទាំងអស់នេះអាចចង្អុលបង្ហាញពីជម្ងឺរលាកសរីរាង្គអាងត្រគៀក ឬ PID។ PID កើតឡើងនៅពេលដែលគេដាក់កងអរម៉ូនក្នុងស្បូនរបស់អ្នកដែលមានជម្ងឺប្រមេះទឹកបាយ ឬ ប្រមេះទឹកថ្លា។ ប្រសិនបើអ្នកមិនចង់ឲ្យគេដកកងអរម៉ូនចេញនោះទេ អ្នកថែទាំសុខភាពរបស់អ្នកអាចព្យាបាលជម្ងឺរលាកសរីរាង្គអាងត្រគៀក និងជម្ងឺកាមរោគដទៃទៀតដោយមិនចាំបាច់ដកកងចេញ។ ប៉ុន្តែប្រសិនបើការរលាកសរីរាង្គអាងត្រគៀកមិនឆ្លើយតបទៅនឹងការព្យាបាល គេនឹងណែនាំឲ្យអ្នកដកកងអរម៉ូនចេញពីក្នុងស្បូន ហើយបានបន្តធ្វើការព្យាបាលទៀត។ អ្នកគប្បីគួរតែប្រើប្រាស់ស្រោមអនាម័យក្នុងអំឡុងពេលទទួលការព្យាបាលជម្ងឺប្រមេះទឹកបាយ ឬប្រមេះទឹកថ្លា ហើយដូរទៅប្រើប្រាស់មធ្យោបាយពន្យាកំណើតផ្សេងទៀតប្រសិនបើអ្នកបានដកកងចេញនៅពេលកំពុងទទួលការព្យាបាល។ អ្នកអាចស៊កកងអរម៉ូនចូលក្នុងស្បូនវិញបន្ទាប់ពីអ្នកបានបញ្ចាប់ការព្យាបាលជម្ងឺរលាកសរីរាង្គក្នុងអាងត្រគៀកបានរួចរាល់ហើយ។
តើនៅពេលណាដែរដែលកងអរម៉ូនក្នុងស្បូនចាប់ផ្តើមដំណើរការ?
ប្រសិនបើអ្នកស៊កកងអរម៉ូនចូលក្នុងស្បូនក្នុងរយៈពេល ៧ ថ្ងៃដំបូងនៃវដ្តរដូវរបស់អ្នក កងអរម៉ូនរបស់អ្នកនឹងដំណើរការភ្លាមៗ និងមានប្រសិទ្ធភាពក្នុងការបង្ការការមានផ្ទៃពោះ។ ប្រសិនបើអ្នកស៊កវានៅពេលដែលអ្នកមិនមករដូវ វានឹងមានប្រសិទ្ធភាព ប្រាំពីរថ្ងៃបន្ទាប់ពីថ្ងៃដែលអ្នកស៊កវា។
តើរយៈពេលប៉ុន្មានបន្ទាប់ពីការស៊កកងអរម៉ូនក្នុងស្បូនដែលអ្នកអាចចាប់ផ្តើមរួមភេទបាន?
នៅពេលដែលអ្នកបានស៊កកងអរម៉ូនចូលក្នុងស្បូនហើយ អ្នកអាចរួមភេទពេលណាក៏បាន។ យ៉ាងណាមិញប្រសិនបើកងអរម៉ូនមិនបានស៊កចូលនៅអំឡុងពេលដែលអ្នកកំពុងមករដូវនោះទេ អ្នកនឹងត្រូវប្រើមធ្យោបាយពន្យារកំណើតផ្សេងណាមួយដើម្បីការពារបន្ថែមពីលើកងអរម៉ូននោះទៀតរយៈពេល ៧ ថ្ងៃ នៅពេលដែលអ្នករង់ចាំឲ្យកងអរម៉ូនរបស់អ្នកដំណើរការ។
តើនៅពេលណាដែរដែលខ្ញុំអាចប្រើតមប៉ុងទប់រដូវបន្ទាប់ពីការស៊កកងអរម៉ូនក្នុងស្បូន?
ដើម្បីកាត់បន្ថយភាគរយនៃការឆ្លងមេរោគ អ្នកផ្តល់សេវាថែទាំសុខភាពរបស់អ្នកនឹងផ្តល់អនុសាសន៍ឲ្យអ្នកចៀសវាងការប្រើប្រាស់ពែងត្រងរដូវ តមប៉ុងទប់រដូវ ឬការរូមភេទតាមទ្វារមាស មុជទឹករយៈពេល ២៤ ម៉ោងបន្ទាប់ពីការដាក់កងហើយ។
