តើអ្វីជាកងអរម៉ូនដាក់ក្នុងស្បូន (IUD)?
កងអរម៉ូនដាក់ក្នុងស្បូន ឬ IUD ឬ ជាឧបករណ៍អរម៉ូន lenvonorgestrel ដាក់ក្នុងស្បូន គឺជាមធ្យោបាយពន្យាកំណើតរយៈពេលយូរដែលវាមានផ្ទុកប្រភេទអរម៉ូនពពួក progestin មួយដែលមានឈ្មោះថា levonorgestrel។
វិធីសាស្រ្តពន្យាកំណើតអរម៉ូនមួយនេះមានសណ្ឋានតូច ធ្វើឡើងពីជ័រហើយមានរាងដូចអក្សរ T។ វាភាគច្រើនត្រូវបានគេដាក់ចូលក្នងស្បូនតាមរយៈទ្វារមាស និង មាត់ស្បូនដោយអ្នកផ្តល់សេវាសុខភាពដែលមានវិជ្ជាជីវៈ និងការបញ្ជាក់ត្រឹមត្រូវ។
តើកងអរម៉ូនដាក់ក្នុងស្បូន (IUD) មានដំណើរការយ៉ាងដូច?
“កងអរម៉ូនក្នុងស្បូន៖
– វាមានអំពើទៅលើភ្នាសស្បូន ធ្វើឲ្យភ្នាសស្បូនស្តើង ក៏ដូចជាមានអំពើធ្វើឲ្យទឹករំអិលក្នុងមាត់ស្បូនខាប់ផងដែរ ដើម្បីរារាំងស្ពែម(មេជីវិតឈ្មោល) កុំឲ្យបង្កកំណើតជាមួយនឹងអូវ៊ុល(មេជីវិតញី)។
- បញ្ឈប់អូវ៉ែរមិនឲ្យបញ្ចេញអូវ៊ុលផងដែរ ដូចនេះស្ពើមមិនមានអ្វីបង្កកំណើតនោះទេ [1]។”
កងអរម៉ូនដាក់់ក្នុងស្បូនអាចដាក់ចូលទៅក្នុងស្បូនពេលណាក៏បានដែរ ដាក់បានទាំងស្រ្តីដែលកំពុងបំបៅដោះកូន និងស្រ្តីដែលមិនបំបៅដោះកូន ឬ ភ្លាមៗបន្ទាប់ពីការរំលូតគភ៌ក៏បាន។ កងនេះក៏អាចដាក់បានក្រោយពីស្រ្តីសម្រាលកូនបាន ៤៨ ម៉ោង រួមទាំងការសម្រាលកូនដោយការវះកាត់ ដែលក្នុងករណីនោះគេដាក់កងភ្លាមបន្ទាប់ពីដេរបិទស្បូនហើយ [2]។
តើកងអរម៉ូនដាក់់ក្នុងស្បូន (IUD) មានប្រសិទ្ធភាពរយៈពេលប៉ុន្មានដែរ?
អាស្រ័យលើប្រភេទនៃកង កងអរម៉ូនដាក់់ក្នុងស្បូនអាចការពារការមានផ្ទៃពោះបានរយៈពេល បីឆ្នាំ ប្រាំឆ្នាំ ឬ ប្រាំពីរឆ្នាំ។ នៅប្រទេសខ្លះ ការប្រើប្រាស់កងអរម៉ូនដាក់់ក្នុងស្បូនម៉ាក Mirena អាចមានប្រសិទ្ធភាពដល់ប្រាំបីឆ្នាំ។
