ផលរំខាននៃថ្នាំចាក់ពន្យារកំណើត

ផលរំខានទូទៅដែលឧស្សាហ៍នឹងកើតឡើងបំផុត នៃការចាក់ថ្នាំពន្យារកំណើតគឺការផ្លាស់ប្តូររបត់នៃការមករដូវរបស់ពួកគេ។ ដូចទៅនឹងថ្នាំពន្យារកំណើតអរម៉ូនភាគច្រើនដែរ ជាធម្មតាការចាក់ថ្នាំផ្សេងៗគ្នានឹងឆ្លើយតបខុសគ្នាទៅនឹងរាងកាយផ្សេងៗគ្នា។ ប្រសិនបើអ្នកជាប្រភេទមនុស្សដែលចូលចិត្តការមករដូវទៀងទាត់ អ្នកប្រហែលជាឆ្ងល់ថាតើការចាក់ប្រភេទថ្នាំដែលអ្នកជ្រើសរើសនឹងធ្វើឲ្យអ្នកមករដូវទៀងទាត់ឬទេ។ ការផ្លាស់ប្តូរផ្សេងៗគឺអាស្រ័យលើប្រភេទថ្នាំចាក់ដែលអ្នកកំពុងប្រើ។

តើថ្នាំចាក់ពន្យារកំណើតអាចបញ្ឈប់ការមករដូវដែរឬទេ?

អ្នកប្រើប្រាស់ DMPA៖

អ្នក​អាច​មាន​ការ​មករដូវ​មិន​ទៀងទាត់ ឬ​មករដូវយូរ​ក្នុង​រយៈពេល​បី​ខែ​ដំបូង ហើយ​បន្ទាប់​ពី​មួយ​ឆ្នាំ​មក អ្នកអាចនឹងមានការ​មករដូវ​មិន​ទៀងទាត់ ឬ​មិន​ញឹកញាប់ ឬ​គ្មាន​មិនមានការមករដូវសោះតែម្តង ។

អ្នកប្រើប្រាស់ NET-EN៖

របត់នៃការមករដូវរបស់អ្នកអាចមានបម្លាស់ប្តូរតិចជាង អ្នកប្រើប្រាស់ DMPA អ្នកអាចនឹងមករដូវពីរបីថ្ងៃក្នុងរយៈពេលប្រាំមួយខែដំបូង និងការមករដូវប្រចាំខែ បន្ទាប់ពីរយៈពេលមួយឆ្នាំ។

អ្នកប្រើប្រាស់ថ្នាំចាក់ជារៀងរាល់ខែ៖

អ្នកអាចមានការមករដូវដែលតិច និង ខ្លឺជាងមុន អ្នកអាចមិនសូវមករដូវ ឬ មានរដូវមិនទៀងទាត់ ឬ ការមករដូវរយៈពេលយូរ ឬ មិនមករដូវសោះតែម្តង។

បើសិនជាអ្នកឈប់មករដូវប្រចាំខែ ក្រោយចាក់ថ្នាំពន្យារកំណើតអស់រយៈពេលមួយឆ្នាំ សូមកុំបារម្ភ! ការប្រែប្រួល​នៃ​ការ​មករដូវ​គឺ​ជា​រឿង​ធម្មតា ហើយ​មិន​មែនជាសញ្ញាគ្រោះថ្នាក់ទាំងអស់នោះទេ​។ ទោះជាយ៉ាងណាក៏ដោយ ប្រសិនបើអ្នកមកចាក់ថ្នាំយឺតជាងពេលកំណត់ ហើយអ្នកសង្ស័យថាអ្នកប្រហែលជាមានផ្ទៃពោះ ចូរធ្វើតេស្តពិនិត្យផ្ទៃពោះឱ្យបានឆាប់តាមដែលអាចធ្វើទៅបាន។ ប្រសិនបើអ្នកចាប់អារម្មណ៍ថាមានការប្រែប្រួលនៃការមករដូវដែលគួរឱ្យរំខាន អ្នកគួរតែពិគ្រោះជាមួយអ្នកផ្តល់សេវាថែទាំសុខភាពរបស់អ្នក ដើម្បីទទួលបានការណែនាំអំពីវិធីសាស្រ្តពន្យារកំណើតផ្សេងទៀតដែលមិនសូវបង្កផលរំខាន។

ផលរំខានផ្សេងទៀតនៃថ្នាំចាក់ពន្យារកំណើត

ផលរំខានដែលមិនសូវកើតមានឡើងនៃថ្នាំចាក់ពន្យារកំណើតមានដូចជា៖

១. ឈឺក្បាល
២. វិលមុខ
៣. បម្លាស់ប្តូរចំណង់ផ្លូវភេទ
៤. ជម្ងឺបាក់ទឹកចិត្ត
៥. មានការជ្រុះសក់ ឬ មានសក់/រោមច្រើននៅលើមុខ ឬ រាងកាយ
៦. បម្រែបម្រួលអារម្មណ៍ចុះឡើង
៧. ស្រគៀរសុដាន់ និង
៨. ហើមពោះ និង ចុកពោះ

មិនមានវិធីណាអាចបញ្ឈប់រោគសញ្ញានៃថ្នាំចាក់ពន្យារកំណើតបាននោះទេ។ ប្រសិនបើអ្នកមិនអាចទ្រាំទ្រនឹងផលរំខានរបស់វាបាន អ្នកអាចផ្លាស់ប្តូរវិធីសាស្រ្តពន្យារកំណើត។

ហេតុអ្វីបានជាខ្ញុំនៅតែមានការធ្លាក់ឈាមបន្ទាប់ពីការចាក់ថ្នាំពន្យារកំណើត?

ប្រសិនបើអ្នកកំពុងប្រើប្រាស់ DMPA អ្នកទំនងជានឹងមានបម្លាស់ប្តូរនៃរបត់នៃការមករដូវច្រើនជាងប្រភេទថ្នាំចាក់ផ្សេងទៀត។ យោងទៅតាម Pfizer អ្នកប្រើប្រាស់ DMPA ៥៤% អាចជួបប្រទះនូវការធ្លាក់ឈាមមិនទៀងទាត់ ឬធ្លាក់ឈាមបន្តាកប្រឡាក់ខោក្នុង នៅក្នុងឆ្នាំដំបូង ខណៈដែល ៣២% នឹងមានការធ្លាក់ឈាមនេះរហូតដល់រយៈពេល ពីរឆ្នាំឯណោះ។ នៅពេលដែលអ្នកប្រើ DMPA កាន់តែយូរទៅ ការធ្លាក់ឈាមបន្តាកប្រឡាក់ខោក្នុងក៏កាត់បន្ថយតាមនឹងដែរ។

តើថ្នាំចាក់ពន្យារកំណើតអាចនាំឲ្យឡើងទម្ងន់បានដែរឬទេ?

ជាធម្មតាស្ត្រីឡើងទម្ងន់ពីមួយទៅពីរគីឡូក្រាមក្នុងមួយឆ្នាំ ប៉ុន្តែស្ត្រីខ្លះទៀតអាចស្រកគីឡូ ឬ មិនមានបម្រែបម្រួលទម្ងន់ទាល់តែសោះតែម្តង។ ស្ត្រីអាស៊ីត្រូវជាទូទៅថាមិនមានការឡើងទម្ងន់ពីការប្រើប្រាស់ DMPA នោះទេ[9] ។

ស្ត្រីដែលឡើងទម្ងន់ក្នុងរយៈពេលប្រាំមួយខែដំបូងនៃការប្រើប្រាស់ អាចមានហានិភ័យខ្ពស់ក្នុងការបន្តការឡើងទម្ងន់ទៀតនៅពេលដែលកំពុងចាក់ថ្នាំពន្យារកំណើត។ ខណៈពេលដែល​ស្ត្រី​ខ្លះ​ប្រហែល​ជា​មិន​ខ្វល់ខ្វាយ​ពី​រឿង​នេះ​ទេ ស្រ្តី​ផ្សេង​ទៀតអាច​នឹង​មិន​សប្បាយ​ចិត្ត​ឡើយ។ ប្រសិនបើ​អ្នក​ចង់​រក្សា​ទម្ងន់ សូម​ព្យាយាមធ្វើ​លំហាត់ប្រាណ​ ក្នុង​ទម្លាប់​ប្រចាំថ្ងៃ​របស់អ្នក ឬ​ប្រឹក្សា​ជាមួយ​អ្នក​ផ្តល់សេវា​អំពី​ទម្លាប់នៃការញ៉ាំរបស់អ្នក។

តើថ្នាំចាក់ពន្យារកំណើតអាចបង្កឲ្យមានភាពអាទិ៍ដែរឬទេ?

អត់ទេ។​ ប៉ុន្តែអ្នកដែលឈប់ចាក់ថ្នាំពន្យារកំណើតដោយមូលហេតុចង់យកកូន អាចនឹងជួបនឹងរយៈពេលពន្យារ មុនពេលដែលអ្នកអាចមានផ្ទៃពោះវិញបាន។ ស្ត្រីដែលឈប់ប្រើ Depo ដោយមូលហេតុចង់យកកូន អាចមានកូនវិញបានក្រោយរយៈពេលលើសពីមួយឆ្នាំ។ Depo មានអរម៉ូនមួយដែលការពារអ្នកពីការមានផ្ទៃពោះរហូតដល់ ៣ ខែដោយមានអំពើលើការរារាំងមិនឲ្យបញ្ចេញអូវ៊ុល។ ទោះបីជាអរម៉ូននេះឈប់មានប្រសិទ្ធភាពបន្ទាប់ពីបីខែក៏ដោយ ប៉ុន្តែសំណល់នៅក្នុងរាងកាយ ជាធម្មតានៅជាប់ក្នុងជាលិកាសាច់ដុំរយៈពេលយូរ និងអាចនៅមានឥទ្ធិពលពន្យារការមានកូន។ ជាមធ្យម វាត្រូវចំណាយពេល ៤ ទៅ​ ១២ ខែបន្ទាប់ពីការបញ្ឈប់ការចាក់ថ្នាំ Depo ដើម្បីឲ្យរាងកាយចាប់ផ្តើមបញ្ចេញអូវ៊ុលបានឡើងវិញ។ ទោះយ៉ាងណាក៏ដោយ មនុស្សខ្លះនឹងមានរយៈពេលពន្យារមានកូន រហូតដល់ ២ ឆ្នាំ។ គេមិនណែនាំឱ្យប្រើ Depo ទេប្រសិនបើអ្នកចង់មានផ្ទៃពោះឆាប់ៗបន្ទាប់ពីពេលដែលអ្នកបញ្ឈប់ការចាក់ថ្នាំ។

តើការចាក់ថ្នាំពន្យារកំណើតមានសុវត្ថិភាពកម្រិតណាដែរ?

ដូចមធ្យោបាយពន្យារកំណើតអរម៉ូនផ្សេងទៀត ការចាក់ថ្នាំពន្យារកំណើត គឺជាមធ្យោបាយដ៏មានសុវត្ថិភាព និងមានប្រសិទ្ធភាពក្នុងការការពារការមានផ្ទៃពោះ ហើយក៏មានហានិភ័យដែលអាចកើតមានមួយចំនួនផងដែរ រួមមាន៖

• បាត់បង់ដង់ស៊ីតេឆ្អឹង។ ការប្រើ Depo-Provera ប៉ះពាល់ដល់កម្រិតអរម៉ូន estrogen ធម្មជាតិរបស់អ្នក ដែលអាចបណ្តាលឱ្យកំហាប់នៃឆ្អឹងទាប។ ទោះជាយ៉ាងណាក៏ដោយ ឆ្អឹងរបស់់អ្នកនឹងទៅជាដូចដើមវិញ​ នៅពេលឈប់ប្រើថ្នាំចាក់ប្រភេទនេះ។
• មានម្ជុលពាក់ព័ន្ធ។ ប្រសិនបើអ្នកខ្លាចម្ជុល ថ្នាំចាក់ពន្យារកំណើតគឺមិនមែនជាជម្រើសល្អសម្រាប់អ្នកទេ។

មានហានិភ័យតិចតួចនៃការឆ្លងមេរោគនៅកន្លែងចាក់ថ្នាំ។ ក្នុង​ករណី​កម្រខ្លះ មានមនុស្ស​ខ្លះ​អាច​មាន​ប្រតិកម្ម​នឹង​ថ្នាំចាក់ផងដែរ។

• វាមិនការពារការឆ្លងជំងឺកាមរោគ (STIs)នោះទេ។

តើខ្ញុំអាចបញ្ចេញជាតិពុលដែលមានក្នុងថ្នាំចាក់ពន្យារកំណើតបានទេ?

អរម៉ូនដែលមាននៅក្នុងការថ្នាំចាក់ពន្យារកំណើតមិនមានជាតិពុលទេ។ ហើយ​មិនមាន​ហេតុផល​វិទ្យាសាស្ត្រ ឬ​វិធី​ដើម្បី​បន្សាប​ជាតិពុល​អរម៉ូន​ពន្យារកំណើត​ចេញពីរាងកាយនោះទេ។ នៅពេលដែលរយៈពេលជិតដល់ពេលអស់ប្រសិទ្ធភាព អរម៉ូនសកម្មនឹងចេញខ្លួនរបស់យើងតាមកម្រិតរហូតដល់អស់។ ខណៈពេលប្រភេទ DMPA អាចត្រូវការរយៈពេលយូរជាងប្រភេទផ្សេងក្នុងការបន្សាប វាគឺជាដំណើរការធម្មតា និងមានសុវត្ថិភាព ដែលមិនត្រូវការអន្តរាគមន៍ណាមួយឡើយ។ ប៉ុន្តែប្រសិនបើអ្នកចង់សម្របខ្លួនបានដោយរលូន អ្នកគួរតែទទួលទានរបបអាហារដែលមានតុល្យភាព ហាត់ប្រាណ ជៀសវាងការជក់បារី និងគ្រឿងស្រវឹង និងគេងឱ្យបានគ្រប់គ្រាន់។