គម្របមាត់ស្បូន

តើអ្វីទៅជាគម្របមាត់ស្បូន?

គម្របមាត់ស្បូនគឺជាស្រោមធ្វើពីជ័រកៅស៊ូ ឬពែងកៅស៊ូប្លាស្ទិកដែលអាចបត់បែនបាន ដែលគ្របមាត់ស្បូនយ៉ាងល្អ។ វាត្រូវបានដាក់បញ្ចូលទៅក្នុងទ្វារមាសយ៉ាងជ្រៅ ដើម្បីការពារកុំឲ្យមេជីវិតឈ្មោលចូលស្បូនរបស់អ្នក។ គម្របមាត់ស្បូនមានទំហំខុសៗគ្នា ដែលកំណត់ដោយប្រវត្តិផ្ទៃពោះរបស់អ្នក។

– ទំហំតូចត្រូវបានណែនាំសម្រាប់ស្ត្រីដែលមិនធ្លាប់មានផ្ទៃពោះ។
– ទំហំមធ្យមត្រូវបានណែនាំសម្រាប់ស្ត្រីដែលបានរំលូត ធ្លាប់រលូត ឬសម្រាលកូនដោយការវះកាត់។
– ទំហំធំត្រូវបានណែនាំសម្រាប់ស្ត្រីដែលបានសម្រាលកូនតាមទ្វារមាស។

ដើម្បីធានាថាអ្នកបានជ្រើសរើសទំហំត្រឹមត្រូវ អ្នកប្រហែលជាត្រូវឲ្យអ្នកផ្តល់សេវាថែទាំសុខភាពដែលបានទទួលការបណ្តុះបណ្តាលជាពិសេសធ្វើការបំពាក់ឲ្យទំហំដែលត្រឹមត្រូវ។ ធនធានផ្សេងទៀត ដូចជាការណែនាំក្នុងទម្រង់វីដេអូ ក៏អាចជួយអ្នករៀនអំពីវិធីដាក់បញ្ចូលគម្របមាត់ស្បូនដោយខ្លួនអ្នកផងដែរ។

ដើម្បី​ឲ្យ​គម្រប​មាត់ស្បូន​មាន​ប្រសិទ្ធភាព អ្នក​ត្រូវ​ពាក់​វា​រាល់​ពេល​រួមភេទ​។

តើគម្របមាត់ស្បូនមានដំណើរការដូចម្តេច?

គម្របមាត់ស្បូនដើរតួនាទីជារបាំងការពាររវាងមេជីវិតឈ្មោល និងមាត់ស្បូន (កន្លែងដែលត្រូវបានគ្របដោយគម្របមាត់ស្បូន)។ គម្របមាត់ស្បូនមានប្រសិទ្ធភាពខ្លាំងបំផុតនៅពេលដែលវាត្រូវបានប្រើប្រាស់រួមគ្នាជាមួយនឹងថ្នាំសម្លាប់មេជីវិតឈ្មោល ដូច្នេះមេជីវិតឈ្មោលទាំងឡាយណាដែលព្យាយាមចូលទៅមាត់ស្បូននឹងងាប់ ឬធ្វើឲ្យលែងមានសកម្មភាពមុនពេលវាចូលក្នុងមាត់ស្បូនបាន។

តើគម្របមាត់់ស្បូនមានប្រសិទ្ធភាពកម្រិតណា?

គម្របមាត់ស្បូនមានប្រសិទ្ធភាពក្នុងការបង្ការការមានគភ៌ភ្លាមៗបន្ទាប់ពីការស៊កបញ្ចូល។ ទោះជាយ៉ាងណាក៏ដោយ គម្របមាត់ស្បូនមិនមែននៅក្នុងចំណោមវិធីពន្យារកំណើតដែលមានប្រសិទ្ធភាពបំផុតនោះទេ។ វាមានប្រសិទ្ធភាពបំផុតនៅពេលប្រើរួមគ្នាជាមួយថ្នាំសម្លាប់មេជីវិតឈ្មោល។ ប្រសិទ្ធភាពរបស់វាក៏អាស្រ័យទៅលើថាតើអ្នកធ្លាប់សម្រាលកូនពីមុនឬអត់។ ប្រសិទ្ធភាពនៃគម្របមាត់ស្បូនគឺមានកម្រិតខ្ពស់ជាងចំពោះស្ត្រីដែលមិនទាន់សម្រាលកូន។

ប្រសិនបើអ្នកធ្លាប់សម្រាលកូនរួច គម្របមាត់ស្បូនគឺជាវិធីសាស្រ្តពន្យារកំណើតដ៏មានប្រសិទ្ធភាពមួយ។ សម្រាប់ការប្រើប្រាស់តាមធម្មតានៃស្ត្រីដែលធ្លាប់មានកូនហើយ​ ប្រសិទ្ធភាពរបស់វាគឺ ៦៨%។ នេះមានន័យថា ៣២ នាក់ក្នុងចំណោម ១០០ នាក់ដែលប្រើគម្របមាត់ស្បូន មានផ្ទៃពោះក្នុងរយៈពេលមួយឆ្នាំដំបូងនៃការប្រើប្រាស់វា។ ជាមួយនឹងការប្រើប្រាស់ឥតខ្ចោះ វាមានប្រសិទ្ធភាព ៧៩%ក្នុងការបង្ការការមានផ្ទៃពោះ។​ នេះមានន័យថា មានស្ត្រី​​ ២៦ នាក់ក្នុងចំណោម ១០០ នាក់ដែលប្រើប្រាស់វិធីសាស្រ្តនេះបានត្រឹមត្រូវ នឹងមានផ្ទៃពោះក្នុងមួយឆ្នាំដំបូងក្នុងការប្រើប្រាស់វា។

ប្រសិនបើអ្នកមិនធ្លាប់សម្រាលកូនទេ គម្របមាត់ស្បូនមានប្រសិទ្ធភាព ៨៤% ជាមួយនឹងការប្រើប្រាស់ធម្មតា មានន័យថាស្ត្រី ១៦ នាក់ក្នុងចំណោម ១០០ នាក់ដែលប្រើវិធីសាស្រ្តនេះទំនងជាមានផ្ទៃពោះក្នុងឆ្នាំដំបូងនៃការប្រើប្រាស់វា។ ជាមួយនឹងការប្រើប្រាស់ត្រឹមត្រូវវាមានប្រសិទ្ធភាព ៩១% ។ នេះមានន័យថាមានតែស្ត្រី ៩ នាក់ប៉ុណ្ណោះក្នុងចំណោម ១០០ នាក់ដែលប្រើវិធីនេះទំនងជាមានផ្ទៃពោះក្នុងឆ្នាំដំបូងនៃការប្រើប្រាស់។

អ្នកនឹងអាចមានកូនភ្លាមៗបន្ទាប់ពីអ្នកដកគម្របមាត់ស្បូនចេញ (2)។

តើអ្នកណាខ្លះអាចប្រើប្រាស់គម្របមាត់ស្បូនបាន?

– វាជាជម្រើសដ៏ល្អសម្រាប់ស្ត្រីដែលមិនអាចប្រើវិធីពន្យារកំណើតដែលមានអរម៉ូនដោយសារហេតុផលសុខភាព ឬ ចំណង់ចំណូលចិត្ត។
– គូស្វាមីភរិយាដែលមិនខ្វល់ពីការមានផ្ទៃពោះដោយចៃដន្យ។
– ស្ត្រី​ដែល​មិន​រួម​ភេទ​ជា​ប្រចាំ ហើយ​គ្រាន់តែប្រើប្រាស់វិធីសាស្រ្តពន្យារកំណើតយូរៗម្តង។
– ស្ត្រីដែលត្រូវការវិធីសាស្ត្រពន្យារកំណើតបម្រុងទុក ក្នុងករណីដែលពួកគេភ្លេចលេបថ្នាំពន្យារកំណើតតាមពេលកំណត់ ឬកំពុងរង់ចាំឲ្យវិធីសាស្ត្រពន្យារកំណើតផ្សេងទៀតចាប់ផ្តើមមានប្រសិទ្ធភាព ឬកំពុងប្រើប្រាស់ថ្នាំដែលអាចរំខានដល់វិធីសាស្រ្តពន្យារកំណើតដែលប្រើប្រាស់ជាប្រចាំ។
– ស្ត្រីដែលទើបតែសម្រាលកូនហើយក្រោមប្រាំមួយសប្តាហ៍។ គម្របមាត់ស្បូនទំនងជាមិនសូវមានប្រសិទ្ធភាពក្រោយពេលសម្រាលកូនភ្លាមៗនោះទេ។ ប្រាំមួយសប្តាហ៍បន្ទាប់ពីការសម្រាល មាត់ស្បូននឹងត្រលប់មកទំហំធម្មតាវិញ ហើយវានឹងមានសុវត្ថិភាពក្នុងការប្រើគម្របពន្យារកំណើត។ វាមិនប៉ះពាល់ដល់ការបំបៅកូន ឬការលូតលាស់របស់ទារកនោះទេ។ អ្នក​នឹង​ត្រូវ​ឲ្យអ្នកផ្តល់សេវាសុខភាពរបស់អ្នកស្វែងរកគម្របមាត់ស្បូនដែលត្រូវនឹងទំហំមាត់ស្បូនរបស់អ្នក​មួយ​ទៀត​ក្រោយ​ពេល​សម្រាល។
– ម្តាយដែលបំបៅដោះកូនដែលមានប្រតិកម្មជាមួយនឹងជ័រកៅស៊ូ។