ហានិភ័យនៃការមានផលប៉ះពាល់ធ្ងន់ធ្ងរបន្ទាប់ពីការវះកាត់បំពង់មេជីវិតគឺទាបណាស់។ ទោះយ៉ាងណាក៏ដោយ ផលវិបាកខ្លះនៅតែអាចកើតឡើង។ ទាំងនេះអាចរួមបញ្ចូលដូចជា
– ការឆ្លងមេរោគនៅកន្លែងវះកាត់។ ផលប៉ះពាល់នេះកើតឡើងតែជាមួយការវះកាត់ដោយប្រើកាំបិតឆូតស្បែកប៉ុណ្ណោះ វាកម្រនឹងកើតឡើងណាស់ក្នុងការវះកាត់ដោយគ្មានកាំបិត។ ទោះជាយ៉ាងណាក៏ដោយ គឺកម្រមានការឆ្លងមេរោគនៅក្នុងថង់ពងស្វាសណាស់។
– ការឈឺចាប់ធ្ងន់ធ្ងររយៈពេលវែង (អាចបន្តជាច្រើនខែ ឬច្រើនឆ្នាំ) ការឈឺចាប់ក្នុងថង់ពងស្វាស ឬពងស្វាស។ ការសិក្សាដ៏ធំមួយទៅលើបុរសរាប់ពាន់នាក់បានបង្ហាញថា មានតែ ១% នៃអ្នកដែលបានវះកាត់បំពង់មេជីវិតប៉ុណ្ណោះដែលមានការឈឺចាប់បែបនេះ។ ការសិក្សាតូចមួយលើបុរស ២០០ នាក់បានបង្ហាញថា ៦% បានជួបប្រទះការឈឺចាប់ប្រភេទនេះ។ ការសិក្សាក៏បានបង្ហាញផងដែរថាក្រុមបុរសដែលមិនធ្លាប់បានវះកាត់បំពង់មេជីវិតប្រមាណ ២% មានការឈឺចាប់ស្រដៀងគ្នាដែរ។
មូលហេតុនៃការឈឺចាប់នេះមិនត្រូវបានគេដឹងច្បាស់នោះទេ ប៉ុន្តែគេសង្ស័យថាវាអាចកើតមានឡើងនៅពេលដែលមានសម្ពាធដែលបណ្តាលមកពីការលេចធ្លាយនៃមេជីវិតឈ្មោលចេញពីបំពង់ដែលបិទ ឬ ដុតមិនបានត្រឹមត្រូវ ឬប្រសិនបើការប៉ះពាល់សរសៃប្រសាទនៅកន្លែងនោះបានកើតឡើងនៅអំឡុងពេលវះកាត់។
ការព្យាបាលវាខុសៗគ្នា ហើយរួមមានការវះទាញពងស្វាសមកលើ ថ្នាំបំបាត់ការឈឺចាប់ ការចាក់ថ្នាំស្ពឹកទៅលើបំពង់ទឹកកាម ដើម្បីឲ្យស្ពឹកសរសៃប្រសាទដែលរត់ទៅកាន់ពងស្វាស និងការវះកាត់យកកន្លែងដែលមានការឆ្លងមេរោគចេញ ឬតភ្ជាប់បំពង់មេជីវិតឡើងវិញ។
– ហូរឈាមនៅក្រោមស្បែក (hematoma) ដែលអាចបណ្តាលឲ្យមានការហើមឬជាំ។ នេះជាផលវិបាកដ៏កម្រមួយ ប៉ុន្តែប្រសិនបើរឿងនេះកើតឡើង សូមទាក់ទងអ្នកផ្តល់សេវាថែទាំសុខភាពរបស់អ្នកជាបន្ទាន់ដើម្បីទទួលការព្យាបាល។
– ប្រតិកម្មទៅនឹងការប្រើថ្នាំស្ពឹក។
– ហានិភ័យដ៏កម្រមួយគឺ បំពង់មេជីវិតរបស់អ្នកអាចភ្ជាប់ខ្លួនវាឡើងវិញ ដែលអាចនាំឲ្យមានផ្ទៃពោះបាន (11) ។
តើអ្វីជាគុណវិបត្តិនៃការវះកាត់បំពង់មេជីវិត?
– ការតភ្ជាប់បំពង់មេជីវិតឡើងវិញ ទោះជាអាចធ្វើទៅបានក៏ដោយ ជាធម្មតាវាមានភាពលំបាក និងមានតម្លៃថ្លៃ ហើយមិនធានាការវិលត្រឡប់ទៅរកការមានកូនវិញនោះទេ។ មុនពេលអ្នកទទួលការវះកាត់ អ្នកត្រូវប្រាកដ ១០០% ថាអ្នកមិនចង់មានកូនបង្កើតទៀតនោះទេ។
– វាត្រូវចំណាយពេលរហូតដល់ទៅបីខែបានវិធីសាស្រ្តពន្យារកំណើតនេះចាប់ផ្តើមមានប្រសិទ្ធិភាពហើយប្រសិនបើអ្នកចង់បង្ការការមានគភ៌ អ្នកត្រូវតែប្រើវិធីសាស្រ្តពន្យារកំណើតបម្រុងក្នុងអំឡុងពេលរង់ចាំឲ្យវាមានប្រសិទ្ធភាព។
– វាមិនការពារអ្នកពីមេរោគអេដស៍ និងជម្ងឺកាមរោគទេ។
តើកត្តាណាខ្លះដែលអាចបង្កើនហានិភ័យនៃការមានផលវិបាកបន្ទាប់ពីការវះកាត់បំពង់មេជីវិត?
– ការវះកាត់ពីលើកមុន ត្រូវបានធ្វើនៅកន្លែងតែមួយ។
– ការឆ្លងមេរោគ។ កុំប្រើវិធីនេះ ប្រសិនបើអ្នកមានការឆ្លងមេរោគនាពេលបច្ចុប្បន្ននៅក្នុងពងស្វាស លិង្គ ឬក្រពេញប្រូស្តាត (ឧទាហរណ៍ ជម្ងឺកាមរោគ)។
– អ្នកជក់បារី។
– អ្នកមានវិបត្តិហូរឈាមមិនប្រក្រតី។
