ការវះកាត់បំពង់មេជីវិត

តើអ្វីទៅជាការវះកាត់បំពង់មេជីវិត?

ការវះកាត់បំពង់មេជីវិត ត្រូវបានគេស្គាល់ផងដែរថាជា «ការគ្រៀវ» ឬ «ការពន្យារកំណើតដោយវះកាត់សម្រាប់បុរស» គឺជាវិធីសាស្រ្តពន្យារកំណើតអចិន្ត្រៃយ៍ដែលរារាំងបំពង់ដែលដឹកជញ្ជូនមេជីវិតឈ្មោលចូលបំពង់បង្ហូរនោម។ ការធ្វើបែបនេះនឹងបង្ការមិនឲ្យនរណាម្នាក់មានផ្ទៃពោះបានទេ។ វាជាវិធីសាស្រ្តសាកសមសម្រាប់បុរសដែលមិនមានបំណងចង់មានកូន ឬកូនទៀតនោះទេ ក្នុងករណីដែលគាត់មានកូនរួចមកហើយ។ វា​មិន​រំខាន​ដល់​ការ​រួមភេទ​របស់បុរសទាល់តែសោះ។

ការ​វះកាត់​បំពង់មេជីវិតត្រូវ​បាន​ធ្វើ​ឡើង​តាម​រយៈ​នីតិវិធី​វះកាត់ដែលមានលក្ខណៈ​សាមញ្ញ និង​ប្រកបដោយ​សុវត្ថិភាព​ ដែល​ត្រូវ​បាន​ធ្វើឡើង​ដើម្បី​បង្ការ​ការ​មាន​ផ្ទៃពោះ​ជា​អចិន្ត្រៃយ៍ និង​មាន​ប្រសិទ្ធភាព​ខ្លាំងបំផុត (1)។

នៅពេល​ការ​វះបំពង់មេជីវិតរួចរាល់ហើយ ការ​មាន​កូន​​នឹងមិនរំពឹងថាអាច​ត្រឡប់​មក​វិញ​ទេ ព្រោះ​នីតិវិធី​គឺជាវិធីសាស្រ្តពន្យារកំណើត​អចិន្ត្រៃយ៍។ ទោះជាយ៉ាងណាក៏ដោយ ប្រសិនបើអ្នកចង់មានកូនឡើងវិញបន្ទាប់ពីការកាត់បំពង់មេជីវិតចេញហើយ អ្នកអាចតបំពង់មេជីវិតនោះឡើងិវិញ ឬធ្វើការយកមេជីវិតឈ្មោលដែលធ្វើឡើងជាផ្នែកមួយនៃការបង្កកំណើតសប្បនិម្មិត ។ ដំណើរការទាំងពីរនេះជាទូទៅមានតម្លៃថ្លៃ ពិបាកក្នុងការធ្វើ និងមិនអាចរកបាននៅកន្លែងជាច្រើន។ ប្រសិនបើអ្នកបានធ្វើការតបំពង់មេជីវិតឡើងវិញ ឬធ្វើការបង្កកំណើតសប្បនិម្មិត វាមិនធានាថាដឹងតែអាចមានកូនឡើងវិញនោះទេ (2)។

ហេតុអ្វីបានជាការវះកាត់បំពង់មេជីវិតជាជម្រើសដ៏ល្អ?

វាមានសារៈសំខាន់ណាស់ក្នុងការពិភាក្សាអំពីការវះកាត់​​បំពង់មេជីវិតជាមួយដៃគូរបស់អ្នក ហើយកំណត់ថាតើវាជាជម្រើសសមស្របសម្រាប់អ្នកដែរឬទេ។ ការវះកាត់បំពង់មេជីវិតអាចជាជម្រើសល្អ ប្រសិនបើ

– គ្រួសាររបស់អ្នកធំល្មមហើយ អ្នកមានកូនគ្រប់គ្រាន់ហើយ ឬអ្នកមិនចង់បានកូនទាល់តែសោះ។
– អ្នក និង/ឬដៃគូរបស់អ្នកមានជម្ងឺទាក់ទងនឹងហ្សែនដែលអ្នកមិនចង់ឲ្យតំណពូជទៅកាន់កូនរបស់អ្នក។
– ការ​មាន​ផ្ទៃពោះ​អាច​បង្ក​បញ្ហា​សុខភាព​ធ្ងន់ធ្ងរដល់ដៃគូរបស់អ្នក​។ ប្រសិនបើមានហេតុផលវេជ្ជសាស្រ្តណាមួយ ដែលតម្រូវមិនឲ្យអ្នក ឬដៃគូរបស់អ្នកមានផ្ទៃពោះនោះទេ ការវះកាត់បំពង់មេជីវិតអាចជាជម្រើសដ៏ល្អ។

លក្ខខណ្ឌ​ដែលអាចផ្តល់សេវា​វះកាត់​បំពង់មេជីវិត​​ខុស​គ្នា​ពី​ប្រទេស​មួយ​ទៅ​ប្រទេសមួយ ដោយ​ប្រទេស​ខ្លះ​អនុញ្ញាត​ឲ្យ​ទទួលបានសេវានេះក្នុងករណីជាច្រើន​ តែ​ប្រទេស​ខ្លះ​ទៀត​មាន​ការ​រឹតត្បិត​ និងមានលក្ខខណ្ឌតឹងតែងជាង។ ប្រទេសខ្លះមិនមានច្បាប់ច្បាស់លាស់ ហើយទុកការសម្រេចចិត្តក្នុងការផ្តល់សេវានេះដល់អ្នកផ្តល់សេវាថែទាំសុខភាពរបស់អ្នក។ ប្រសិនបើអ្នកកំពុងពិចារណាធ្វើការវះកាត់បំពង់មេជីវិត វាមានសារៈសំខាន់ណាស់ក្នុងការស្រាវជ្រាវអំពីច្បាប់ និងលក្ខខណ្ឌនៅក្នុងប្រទេសរបស់អ្នកអាចអនុញ្ញាតឲ្យអ្នកទទួលសេវាវះកាត់បំពង់មេជីវិតបាន (3) ។

តើអ្នកណាខ្លះអាចធ្វើការវះកាត់បំពង់មេជីវិតបាន?

ជាមួយនឹងការប្រឹក្សាត្រឹមត្រូវ បុរសណាក៏អាចវះកាត់បំពង់មេជីវិតបាន។ នេះរួមបញ្ចូលទាំង

– បុរសរៀបការឬមិនទាន់រៀបការ
– បុរសដែលមានឬគ្មានកូន
– បុរសទាំងក្មេង និងចាស់ (បុរសណាក៏ដោយដែលមានអាយុលើសពី ១៨ ឆ្នាំអាចធ្វើការវះកាត់បំពង់មេជីវិតបាន ហើយដរាបណាអ្នកកំពុងតែសកម្មខាងផ្លូវភេទ និងមានសុខភាពផ្លូវចិត្ត និងរាងកាយល្អ នោះមិនមានកំណត់ព្រំដែនអាយុដែលលែងឲ្យធ្វើការវះកាត់នោះទេ ហើយលក្ខខណ្ឌអនុញ្ញាតឲ្យត្រៀមខ្លួនសម្រាប់ការវះកាត់ គឺផ្អែកលើការវិនិច្ឆ័យរបស់អ្នកផ្តល់សេវាថែទាំសុខភាពរបស់អ្នក);
– មានឬមិនមានការអនុញ្ញាតពីដៃគូ;
– បុរសដែលមានជម្ងឺវិបត្តិរូបរាងកោសិកាឈាមក្រហម (sickle cell disease);
– បុរសដែលមានហានិភ័យខ្ពស់នៃការឆ្លងជម្ងឺកាមរោគ (STIs) ជម្ងឺកាមរោគ រួមទាំងមេរោគអេដស៍ និង
– បុរសដែលមានផ្ទុកមេរោគអេដស៍ មិនថាពួកគេកំពុងព្យាបាលដោយថ្នាំប្រឆាំងមេរោគអេដស៍ឬអត់នោះទេ។

កត្តាសំខាន់បំផុតគឺថា ការវះកាត់បំពង់មេជីវិតគួរតែត្រូវបានធ្វើឡើងចំពោះតែបុគ្គលដែលប្រាកដថាពួកគេនឹងមិនស្តាយក្រោយចំពោះការវះកាត់បំពង់មេជីវិតចេញតែប៉ុណ្ណោះ (4) ។

តើការវះកាត់បំពង់មេជីវិតមានដំណើរការដូចម្តេច?

គេនឹងធ្វើការឆូតវះតូចមួយ ឬចោះទៅលើថង់ពងស្វាស ដើម្បីអនុញ្ញាតឲ្យអ្នកផ្តល់សេវាថែទាំសុខភាពចូលទៅដល់បំពង់មេជីវិតទាំងពីរ (vasa deferentia) ដែលនាំមេជីវិតឈ្មោលទៅកាន់លិង្គ។ បន្ទាប់មកបំពង់ទាំងនោះត្រូវបានកាត់ និងចងបិទជិត ឬបិទតាមរយៈការដុត (ការប្រើប្រាស់អគ្គិសនី ឬកំដៅដើម្បីដុត)។

ការកាត់បំពង់មេជីវិត​ការពារ​ការ​មាន​ផ្ទៃពោះ​ដោយ​ការ​ទប់មិនឲ្យ​មេ​ជីវិត​ឈ្មោល​ចូលទៅក្នុង​ទឹកកាមដែលបញ្ចេញមកពេលរួមភេទ។ នៅពេលដែលអ្នកបានវះកាត់បំពង់មេជីវិតហើយ ទឹកកាមនៅតែត្រូវបានបញ្ចេញដដែល ប៉ុន្តែវាមិនអាចធ្វើឲ្យមានផ្ទៃពោះបានទេ (5)។

តើការវះកាត់បំពង់មេជីវិតមានប្រសិទ្ធភាពយ៉ាងដូចម្តេចដែរ?

ការវះកាត់បំពង់មេជីវិត គឺជាវិធីសាស្រ្តពន្យារកំណើតដ៏មានប្រសិទ្ធភាពបំផុតមួយ។ ក្នុងរយៈពេលមួយឆ្នាំដំបូងនៃការប្រើប្រាស់ វិធីសាស្ត្រនេះមានប្រសិទ្ធភាព ៩៩% ក្នុងការការពារការមានផ្ទៃពោះ។ ទោះជាយ៉ាងណាក៏ដោយ ប្រសិទ្ធភាពនៃវិធីសាស្រ្តនេះវាមិនមានភ្លាមៗបន្ទាប់ពីការវះកាត់នោះទេ។ អ្នកត្រូវតែប្រើវិធីសាស្រ្តពន្យារកំណើតមួយផ្សេងទៀតយ៉ាងហោចណាស់បីខែបន្ទាប់ពីការវះកាត់ ឬរហូតដល់អ្នកប្រាកដថាមិនមានមេជីវិតឈ្មោលនៅក្នុងទឹកកាមរបស់អ្នក។ មូលហេតុចម្បងនៃការមានគភ៌ក្នុងកំឡុងឆ្នាំដំបូងបន្ទាប់ពីការវះកាត់បំពង់មេជីវិតនោះគឺការប្រើវិធីសាស្រ្តពន្យារកំណើតមិនទៀងទាត់ក្នុងអំឡុងពេលបីខែបន្ទាប់ពីការវះកាត់។

ដូចគ្នានឹងការចងដៃស្បូនដែរ ហានិភ័យនៃការមានផ្ទៃពោះនៅតែមានបន្តិចបន្តួចមួយឆ្នាំដំបូងបន្ទាប់ពីការវះកាត់ហើយ រហូតដល់ពេលដែលដៃគូរបស់បុរសនោះដល់អាយុអស់រដូវ។

ក្នុងរយៈពេលបី ឆ្នាំនៃការប្រើប្រាស់ ប្រសិទ្ធភាពរបស់វិធីសាស្រ្តនៃមានរហូតដល់ ៩៨% ។ នេះគឺដោយសារតែកត្តាមួយចំនួនដូចជាមិនមានការប្រើប្រាស់វិធីសាស្រ្តពន្យារកំណើតបានត្រឹមត្រូវក្នុងអំឡុងពេករង់ចាំ។ ចុងនៃបំពង់មេជីវិត vas deferens ដែលបានកាត់ហើយវាអាចតភ្ជាប់ជាមួយគ្នាវិញ ឬប្រសិនបើអ្នកផ្តល់សេវាមានកំហុសក្នុងអំឡុងពេលធ្វើការវះកាត់ (6) ។

តើការវះកាត់បំពង់មេជីវិតនឹងនឹងចាប់ផ្តើមមានប្រសិទ្ធភាពនៅពេលណា?

យោងតាមវិទ្យាស្ថានសុខភាពជាតិអាមេរិក (National Institute of Health) វាត្រូវការការបញ្ចេញទឹកកាម ១៥ ទៅ ២០ ដង ឬរយៈពេលបីខែដើម្បីឲ្យទឹកកាមអស់មេជីវិតឈ្មោល។ លើសពីនេះ ប្រមាណជាបុរសម្នាក់ក្នុងចំណោមប្រាំនាក់ អាចនឹងរង់ចាំយូរជាងនេះក្នុងការឲ្យវិធីសាស្រ្តនេះមានប្រសិទ្ធភាព។

ដូច្នេះហើយ អ្នក​ត្រូវតែ​បន្ត​ប្រើ​វិធីសាស្រ្ត​ពន្យារកំណើត​មួយទៀត​រហូត​ដល់​មេជីវិត​ឈ្មោល​លែងមាននៅក្នុងទឹកកាម​។ ប្រសិនបើដៃគូរូមភេទទាំងពីរ មិនបានប្រើវិធីសាស្រ្តពន្យារកំណើតដែលមានប្រសិទ្ធភាពក្នុងរយៈពេល បី ខែដំបូងបន្ទាប់ពីការកាត់បំពង់មេជីវិតនោះ វាមានហានិភ័យខ្ពស់នៃការមានផ្ទៃពោះ ដែលអាចនឹងកើតឡើងមុនពេលការកាត់បំពង់មេជីវិតមានប្រសិទ្ធភាពពេញលេញ។

មានមធ្យោបាយប្រាកដតែមួយគត់ដើម្បីបញ្ជាក់ថាការកាត់បំពង់មេជីវិតមានប្រសិទ្ធភាពឬអត់នោះ គឺត្រូវពិនិត្យទឹកកាមរបស់អ្នកដើម្បីរកមើលមេជីវិត បីខែបន្ទាប់ពីការវះកាត់។ សំណាកតូចមួយនៃទឹកកាមរបស់អ្នកនឹងត្រូវបានប្រមូល និងធ្វើតេស្តរកមេជីវិតឈ្មោល។ ប្រសិនបើគ្មានមេជីវិតឈ្មោលនៅក្នុងសំណាកនោះទេ នោះមានន័យថាកាត់បំពង់មេជីវិតរបស់អ្នកនឹងមានប្រសិទ្ធភាព ៩៩% ក្នុងការការពារការមានផ្ទៃពោះ។ វាត្រូវបានណែនាំឲ្យអ្នកធ្វើការវិភាគទឹកកាមយ៉ាងហោចណាស់ពីរដង។

ការវិភាគទឹកកាមដំបូងអាចធ្វើឡើងនៅពីរខែបន្ទាប់ពីការវះកាត់បំពង់មេជីវិត និងលើកទីពីរនៅខែទីបីបន្ទាប់ពីការវះកាត់។ ប្រសិនបើគេរកឃើញមេជីវិតនៅក្នុងទឹកកាមរបស់អ្នក ក្នុងអំឡុងពេលពិនិត្យនៅខែទីបី សូមទៅជួបអ្នកផ្តល់សេវាថែទាំសុខភាពរបស់អ្នក ពីរទៅបួនសប្តាហ៍ក្រោយសម្រាប់ការធ្វើតេស្តរកមេជីវិតឈ្មោលម្តងទៀត។ វាត្រូវបានណែនាំផងដែរឲ្យអ្នកដែលទទួលការវះកាត់នេះ ធ្វើការត្រួតពិនិត្យមួយឆ្នាំម្តង ឬតាមកាលកំណត់ ដើម្បីធានាថា ការវះកាត់របស់អ្នកដំណើរការបានល្អ។

នៅក្នុងប្រទេសមួយចំនួន អ្នកអាចធ្វើការត្រួតពិនិត្យមេជីវិតដោយខ្លួនឯងនៅផ្ទះដោយប្រើឧបករណ៍ធ្វើតេស្តមេជីវិតឈ្មោលនៅផ្ទះ។ ប្រសិនបើអ្នកចូលចិត្តជម្រើសនេះ អ្នកគួរតែពិភាក្សាជាមួយអ្នកផ្តល់សេវាថែទាំសុខភាពរបស់អ្នក តើអ្នកអាចរកបានតេស្តនេះនៅប្រទេសរបស់អ្នកបានដែរឬទេ។