ការចងដៃស្បូនមិនមែនជាការវះកាត់ដ៏ស្មុគស្មាញនោះទេ។ វាជាការវះកាត់ដែលអ្នកអាចធ្វើបានគ្រប់ពេលដែលអ្នកចង់ធ្វើមាន រួមទាំងក្រោយពេលសម្រាលកូន ភ្លាមៗផងដែរ ដោយស្ត្រីមួយចំនួនចូលចិត្តនៅពេលកំពុងវះសម្រាលកូន។
មានបច្ចេកទេសផ្សេងៗគ្នាសម្រាប់ការចងដៃស្បូន៖
ការចងដៃស្បូនដោយធ្វើការចោះ និងឆ្លុះក្នុងពោះ
បច្ចេកទេសនេះពាក់ព័ន្ធនឹងការដាក់បញ្ចូលដងស្តើងវែងមួយ (laparoscope) ដែលមានកាមេរ៉ា ចូលទៅក្នុងពោះតាមរយៈស្នាមវះពោះតូចៗចំនួនពីរ។ បន្ទាប់មកពោះត្រូវបានបំប៉ោងដោយឧស្ម័នដើម្បីឲ្យកាម៉េរាចាប់រូបភាពខាងក្នុងពោះឲ្យកាន់តែច្បាស់។ Laparoscope អនុញ្ញាតឲ្យអ្នកផ្តល់សេវាថែទាំសុខភាពពិនិត្យខាងក្នុងលំហពោះ និងអាងត្រគាក មុននឹងចូលដល់ដៃស្បូនដើម្បីបិទផ្លូវវា ឬកាត់វា។ បន្ទាប់មកផ្នែកដែលកាត់ត្រូវបានចងគួចចុង ឬ គៀប។
ការវះកាត់នេះជាធម្មតាត្រូវបានធ្វើឡើងក្រោមការប្រើថ្នាំសន្លប់ ប៉ុន្តែការចាក់ថ្នាំស្ពឹក និងថ្នាំសណ្តំ ក៏អាចត្រូវបានប្រើផងក្នុងការវះកាត់នេះផងដែរ។ ការវះកាត់ដោយការឆ្លុះ laparoscopy មានប្រសិទ្ធភាពភ្លាមៗក្នុងការការពារការមានគភ៌ និងមានរយៈពេលខ្លី។
ការចងដៃស្បូនដោយការវះពោះ
នៅក្នុងបច្ចេកទេសនេះ គេនឹងវះពោះប្រមាណជា ២ ទៅ ៣ សង់ទីម៉ែត្រ ហើយបន្ទាប់មកគេទាញដៃស្បូនចេញមកខាងក្រៅស្បែកដើម្បីមើលឲ្យបានច្បាស់ ហើយធ្វើការកាត់ ឬបិទផ្លូវ។ ការវះពោះស្នាមធំអាចនឹងត្រូវធ្វើឡើងក្នុងករណីអ្នកជម្ងឺធាត់ដោយសារតែគេពិបាកចូលទៅកាន់ដៃស្បូនជាងអ្នកជម្ងឺធម្មតា។ បច្ចេកទេស laparotomy អាចត្រូវបានអនុវត្តនៅពេលណាក៏បាន ហើយជាទូទៅត្រូវបានធ្វើលើស្ត្រីដែលនឹងមានហានិភ័យខ្ពស់ប្រសិនបើពួកគេទទួលការចងដៃស្បូនដោយប្រើឧបករណ៍ចោះ និងឆ្លុះ។
laparotomy គឺជាការវះកាត់ទ្រង់ទ្រាយធំ ប៉ុន្តែវាក៏ជានីតិវិធីដែលគេមិននិយមប្រើប្រាស់ផងដែរ (លើកលែងតែអ្នកដែលកំពុងវះកាត់សម្រាលកូន និងចងដៃស្បូនក្នុងពេលតែមួយ)។
ការចងដៃស្បូនដោយការវះពោះតូច
បច្ចេកទេសនេះគឺជាទម្រង់ទ្រង់ទ្រាយតូច និងមានការឈ្លានពានតិចនៃការវះពោះ (laparotomy)។ គេនឹងធ្វើការវះពោះដែលមានប្រវែងតូចជាង ការវះកាត់ពោះធម្មតា ហើយវាត្រូវបានធ្វើជាទូទៅក្នុងអំឡុងពេល សម្រាល ឬក្រោយពេលសម្រាល (រយៈពេលក្រោយសម្រាល)។
ប្រសិនបើបច្ចេកទេសនេះត្រូវបានធ្វើឡើងក្នុងកំឡុងពេលវះពោះសម្រាល ពោះគឺត្រូវបានគេវះចំហររួចហើយ នៅពេលនោះអ្នកផ្តល់សេវាថែទាំសុខភាពនឹងកាត់ ឬបិទផ្លូវដៃស្បូន ដោយមិនចាំបាច់ប្រើថ្នាំសន្លប់បន្ថែម។ ប្រសិនបើវាត្រូវបានធ្វើភ្លាមៗបន្ទាប់ពីការសម្រាលតាមទ្វារមាស ម្ជុលចាក់ថ្នាំស្ពឺកឆ្អឹងខ្នងរបស់អ្នកអាចទុកនៅនឹងកន្លែងរបស់វាដដែល ដើម្បីផ្តល់ថ្នាំសណ្តំបន្ថែមតាមតម្រូវការ។ ប៉ុន្តែប្រសិនបើម្ជុលចាក់ថ្នាំស្ពឺកឆ្អឹងខ្នងត្រូវបានដកចេញ ឬអ្នកមិនមានវានោះទេ គេនឹងធ្វើការចាក់ថ្នាំស្ពឹកឆ្អឹងខ្នងម្តងទៀតមុនពេលវះកាត់លើដៃស្បូន (5) ។
ការចងដៃស្បូនដោយលូកកាម៉េរាតាមមាត់ស្បូន
បច្ចេកទេសនេះពាក់ព័ន្ធនឹងការដាក់បញ្ចូល ថ្នាំ ឬឧបករណ៏របុំទៅក្នុងដៃស្បូន តាមរយៈមាត់ស្បូន។ ការធ្វើបែបនេះបណ្តាលឲ្យមានស្នាម ឬបង្កឲ្យស្ទះដៃស្បូន។ អត្ថប្រយោជន៍នៃនីតិវិធីនេះគឺថាវាមិនសូវមានការឈ្លានពានលើរាងកាយ ហើយអាចត្រូវបានអនុវត្តនៅក្នុងការគ្លីនិកធម្មតាបាន។ វាត្រូវបានណែនាំសម្រាប់អ្នកដែលមិនអាចទទួលការវះកាត់បានដោយសារបញ្ហាណាមួយ (6) ។
តើអូវ៊ុលនឹងធ្លាក់ទៅណាវិញបន្ទាប់ពីការចងដៃស្បូន?
ការចងដៃស្បូនមិនបញ្ឈប់ការបញ្ចេញអូវ៊ុលដោយអូវែរនោះទេ (ដំណើរការបញ្ចេញអូវ៊ុល)។ វាគ្រាន់តែរារាំងអូវ៊ុលមិនឲ្យជួបមេជីវិតឈ្មោលតែប៉ុណ្ណោះ។ អូវ៊ុលដែលបានបញ្ចេញបន្ទាប់ពីការចងដៃស្បូនរួចត្រូវបានបំបែក និងស្រូបចូលទៅក្នុងរាងកាយវិញដោយសុវត្ថិភាព។ អ្នកក៏នឹងបន្តមានរដូវរហូតដល់វ័យអស់រដូវផងដែរ។
