ការស៊កបញ្ចូលមិនមែនជាដំណើរការដែលពិបាកនោះទេ។ ទាំងនេះជាជំហានដែលត្រូវអ្នកត្រូវអនុវត្តតាម៖
– លាងដៃជាមួយសាប៊ូ និងទឹក។ ទុកឲ្យដៃរបស់អ្នកស្ងួតដោយមិនប៉ះពាល់អ្វីទាំងអស់។
– ឆែកមើលសន្ទះពាំងមាត់ស្បូនដើម្បីរកមើលរន្ធប្រហោង និងចំណុចដែលស្តើងនិងងាយរហែក។ ការដាក់ទឺកស្អាតចូលវាឲ្យពេញ គឺជាវិធីល្អក្នុងការពិនិត្យមើល ប្រសិនបើវាលេចឬធ្លាយ នោះវាមានការរហែក ឬ ប្រហោងហើយ។ ប្រសិនបើសន្ទះការពាររបស់អ្នកមានរន្ធនោះមានន័យថាវានឹងមិនអាចការពារអ្នកបានល្អនោះទេ ដែលអាចបណ្តាលឲ្យអ្នកមានផ្ទៃពោះបាន។
– ដាក់ថ្នាំសម្លាប់មេជីវិតឈ្មោលប្រហែលជា ៥មីលីលីត្រនៅក្នុងពែង (ផ្នែកខាងក្នុងនៃសន្ទះការពារ) ។ លាបវាបន្តិចនៅជុំវិញគែមផងដែរ (មិនច្រើនពេកទេឬវាអាចនឹងរអិលពេក) ។ជែលពន្យារកំណើត ឬថ្នាំសម្លាប់មេជីវិតឈ្មោលណាក៏បាន លើកលែងតែប្រភេទហ្វីល ឬថ្នាំស៊ុល ឬ។ កុំភ្លេចពិនិត្យមើលកាលបរិច្ឆេទផុតកំណត់នៃថ្នាំសំលាប់មេជីវិតឈ្មោល។
– នៅពេលអ្នកបញ្ចូលសន្ទះពាំងមាត់ស្បូនសូមប្រាកដថា ថ្នាំសម្លាប់មេជីវិតឈ្មោលផ្ទុកនៅខាងក្នុងផ្នត់ និង ពែងរបស់វា ដើម្បីឲ្យការការពារមានប្រសិទ្ធភាពបំផុត។
– អ្នកអាចអង្គុយ ឬឈរក៏បាន ហើយកន្ធែកជើងរបស់អ្នក។ វែកបបេរខាងក្រៅនៃទ្វារមាសដោយប្រើដៃម្ខាង។ ប្រើដៃម្ខាងទៀតច្របាច់គែមសាងខាងនៃសន្ទះពាំងមាត់ស្បូនចូលគ្នា រួចបត់វាជាពីរ។
– ដាក់ម្រាមដៃចង្អុលរបស់អ្នកនៅចំកណ្តាលផ្នត់ ដើម្បីចាប់ឲ្យជាប់ (ម្រាមដៃរបស់អ្នកនឹងប៉ះថ្នាំសម្លាប់មេជីវិតឈ្មោល)។
– រុញសន្ទះពាំងមាត់ស្បូនចូលឲ្យជ្រៅ ចូលទៅក្នុងទ្វារមាសរបស់អ្នកតាមដែលអ្នកអាចធ្វើបាន។ ត្រូវប្រាកដថាសន្ទះបានគ្របដណ្តប់មាត់ស្បូនរបស់អ្នកឲ្យជិត។ ប្រសិនបើអ្នកបានដាក់វាបានត្រឹមត្រូវ អ្នកគួរតែអាចស្ទាបដឹងពីរូបរាងមាត់ស្បូនរបស់អ្នកតាមរយៈការស្ទាបសន្ទះការពារដែលធ្វើឡើងពីជ័រកៅស៊ូនោះ។ ការបញ្ចូលសន្ទះមិនត្រឹមត្រូវនឹងធ្វើឲ្យអ្នកពិបាកក្នុងខ្លួន។ ប្រសិនបើវាមានអារម្មណ៍មិនស្រួល សូមដកវាចេញ ហើយព្យាយាមបញ្ចូលវាម្តងទៀត។
– អ្នកអាចដាក់សន្ទះនេះចូលមុនពេលរួមភេទ។ អ្នកក៏អាចដាក់បញ្ចូលវាពីរទៅបីម៉ោងមុនពេលរួមភេទដែរ។ មិនថាអ្នកដាក់បញ្ចូលវាពេលណាទេ អ្នកត្រូវតែប្រាកដថាអ្នកទុកវាចោលក្នុងទ្វារមាសយ៉ាងហោចណាស់ប្រាំមួយម៉ោងបន្ទាប់ពីអ្នករួមភេទ។ ប្រសិនបើអ្នកនឹងរួមភេទម្តងទៀតនៅថ្ងៃដដែលនោះ អ្នកគ្រាន់តែទុកសន្ទះពាំងមាត់ស្បូននៅនឹងមាត់ស្បូនដដែល ហើយដាក់ថ្នាំសម្លាប់មេជីវិតឈ្មោលបន្ថែមទៀតជ្រៅចូលទៅក្នុងទ្វារមាសរបស់អ្នក។ ថ្នាំសម្លាប់មេជីវិតឈ្មោលមួយចំនួនត្រូវបានរចនាឡើងជាពិសេសសម្រាប់សន្ទះពាំងមាត់ស្បូនហើយវាអាចភ្ជាប់មកជាមួយឧបករណ៍ដែលអ្នកអាចប្រើប្រសិនបើអ្នកនឹងរួមភេទច្រើនជាងម្តងក្នុងរយៈពេលប្រាំមួយម៉ោង។ សន្ទះពាំងមាត់ស្បូនមិនគួរដកចេញពីទ្វារមាសនៅពេលដាក់់បន្ថែមថ្នាំសំលាប់មេជីវិតឈ្មោលនោះទេ (4) ។
– ប្រសិនបើអ្នកមានបញ្ហាក្នុងការបញ្ចូលសន្ទះពាំងមាត់ស្បូន ចូរសាកសួរអ្នកផ្តល់សេវាថែទាំសុខភាពរបស់អ្នកអំពីការប្រើប្រាស់ឧបករណ៍ដាក់បញ្ចូល ឬពិចារណាប្តូរទៅប្រើប្រាស់វិធីពន្យារកំណើតផ្សេងទៀត។
– ប្រសិនបើអ្នកមានការឆ្លងមេរោគនៅក្នុងទ្វារមាសរបស់អ្នក អ្នកមិនគួរប្រើសន្ទះពាំងមាត់ស្បូនទេ។ ចូរប្រើស្រោមអនាម័យរហូតដល់
លែងមានការឆ្លងមេរោគ។
តើដៃគូរបស់ខ្ញុំនឹងមានអារម្មណ៍ដឹងថាសន្ទះពាំងមាត់ស្បូននៅក្នុងទ្វារមាសពេលកំពុងរួមភេទដែរឬទេ?
ប្រសិនបើបានដាក់បញ្ចូលសន្ទះការពារបានត្រឹមត្រូវ អ្នកប្រើប្រាស់ភាគច្រើនរួមទាំងដៃគូរបស់ពួកគេនឹងមិនមានអារម្មណ៍ថាប៉ះសន្ទះនោះនៅពេលរួមភេទឡើយ។
ចុះបើខ្ញុំចង់រួមភេទច្រើនដង តើខ្ញុំត្រូវធ្វើដូចម្តេច?
អ្នកអាចទុកសន្ទះពាំងមាត់ស្បូននៅក្នុងទ្វារមាសរយៈពេល ៦ ទៅ ១២ ម៉ោងបន្ទាប់ពីរួមភេទ។ ប្រសិនបើអ្នករួមភេទម្តងទៀតក្នុងរយៈពេលមិនលើសពីប្រាំមួយម៉ោងនោះទេ អ្នកនឹងត្រូវបន្ថែមថ្នាំសម្លាប់មេជីវិតឈ្មោលចូលទៅក្នុងទ្វារមាសអ្នកទៀត។ នៅពេលអ្នករួមភេទម្តងទៀត វដ្តប្រាំមួយម៉ោងនេះនឹងចាប់ផ្តើមឡើងម្តងទៀត ដោយរាប់ចាប់ពីពេលរួមភេទចុងក្រោយ។ អ្នកមិនគួរទុកសន្ទះពាំងមាត់ស្បូនចោលក្នុងទ្វារមាសលើសពី ២៤ ម៉ោងនោះទេ។
តើនឹងមានអ្វីកើតឡើងប្រសិនបើសន្ទះពាំងមាត់ស្បូនខូចខាត ឬ ខុសទីតាំងនៅពេលកំពុងរួមភេទ?
ប្រសិនបើសន្ទះពាំងមាត់ស្បូនរបស់អ្នក រហែក ឬខុសពីទីតាំងក្នុងកំឡុងពេលប្រើប្រាស់ អ្នកគួរតែពិចារណាភ្លាមៗក្នុងការប្រើ ថ្នាំពន្យារកំណើតបន្ទាន់ ដើម្បីការពារហានិភ័យនៃការមានផ្ទៃពោះ។
តើសន្ទះពាំងមាត់ស្បូននឹងមានប្រសិទ្ធភាពពេលណាបន្ទាប់ពីការដាក់បញ្ចូល?
សន្ទះការពារមានប្រសិទ្ធភាពក្នុងការការពារការមានគភ៌ភ្លាមៗបន្ទាប់ពីការដាក់បញ្ចូល និងមិនប៉ះពាល់ដល់អរម៉ូននៅក្នុងខ្លួនរបស់អ្នក។
