ផលប៉ះពាល់នៃកងទ្វារមាសមិនមែនសុទ្ធតែជាសញ្ញានៃជម្ងឺនោះទេ ហើយភាគច្រើនវានឹងកាត់បន្ថយឬ បាត់ទៅវិញក្រោយពេលប៉ុន្មានខែក្រោយបន្ទាប់ពីប្រើប្រាស់កងទ្វារមាស។ ស្រ្តីខ្លះគឺមិនមានជួបប្រទះនឹងផលប៉ះពាល់អ្វីសោះតែម្តង។ ផលប៉ះពាល់ដែលឧស្សាហ៍ត្រូវបានរាយការណ៍មានដូចជា៖
- ការផ្លាស់ប្តូររបត់នៃការមករដូវ (វាអាចធ្វើឲ្យរដូវរបស់អ្នកមកមិនទៀង ឬ មិនសូវមកប្រចាំខែ មានបរិមាណតិចជាងមុន ហើយមករដូវថ្ងៃតិចជាងមុន ឬ មិនមករដូវសោះតែម្តង ការមានការធ្លាក់ឈាមតិចៗក្នុងចន្លោះពេលមករដូវជារឿងធម្មតា ហើយមិនមែនជាអ្វីដែលគួរតែបារម្មណ៍នោះទេ)
- ឈឺក្បាល
- ចង្អោរ និងក្អួត
- ហើមស្ពុលៗ
- ស្រគៀរសុដន់
- បម្លាស់ប្តូរនៃទម្ងន់
- មុនអាចប្រសើរឡើង ឬ កាន់តែយ៉ាប់ជាងមុន
- ហើមកែងជើងដោយសារតែមានការទប់ទឹកក្នុងរាងកាយ
- អារម្មណ៍ផ្លាស់ប្តូរឡើងចុះ និង
- រលាកទ្វារមាស (មានការរំខានលើស្បែកត្រង់កន្លែងនោះ ឡើងក្រហម ឬរលាកទ្វារមាស)។
ផលប៉ះពាល់ដែលមានរយៈពេលវែង៖
- បម្លាស់ប្តូរចំណង់ផ្លូវភេទ
- មានការកើនឡើងការធ្លាក់សពីទ្វារមាស ការរលាក ឬ ការបង្ករោគ និង
- អាចមានការកើនឡើងនៃសម្ពាធឈាមរបស់អ្នក។ អ្នកដែលប្រើកងទ្វារមាសត្រូវបានណែនាំឲ្យត្រួតពិនិត្យសម្ពាធឈាមរបស់ពួកគេរៀងរាល់ពីរបីខែម្តង។ ប្រសិនបើការកើនឡើងដែលបណ្តាលមកពីកងទ្វារមាសឡើងខ្ពស់ពេក អ្នកគប្បីគួរតែឈប់ប្រើវា។ ជាធម្មតាសម្ពាធឈាមនឹងធ្លាក់ចុះវិញ នៅពេលដែលអ្នកឈប់ប្រើវា។ [7]
ផលរំខាននៃកងទ្វារមាស
ផលរំខានដែលកម្រខ្លាំង
ស្ត្រីដែលប្រើកងទ្វារមាសពន្យារកំណើតអាចមានហានិភ័យកើនឡើងបន្តិចបន្តួចក្នុងការកើតកំណកឈាម (ដុំឈាមកក) ។ កំណកឈាមនេះអាចបណ្តាលឱ្យស្ទះសរសៃឈាមវ៉ែន ហើយនាំឱ្យស្ទះសរសៃឈាមវ៉ែនជ្រៅ ឬស្ទះសរសៃឈាមនៅសួត ឬក្នុងសរសៃឈាមអាកទែ ហើយចុងក្រោយអាចបណ្តាលឱ្យគាំងបេះដូង ឬស្ទះសរសៃឈាមខួរក្បាលបាន។ ជាធម្មតា កំណកឈាមនេះប្រសិនបើវាមាន វាកើតឡើងក្នុងអំឡុងឆ្នាំដំបូងនៃការប្រើកងទ្វារមាស។
អ្នកគប្បីគួរជួបវេជ្ជបណ្ឌិតជាបន្ទាន់ប្រសិនបើអ្នកមានបញ្ហាដូចខាងក្រោម៖
ការឈឺក្បាលខ្លាំង ឬ ឈឺក្បាលបង្កាំង
មានអារម្មណ័ពិបាកដកដង្ហើម
មានការហើម ហើយឈឺនៅជើង
មានអារម្មណ៍ស្ពឹក ឬខ្សោយនៅដៃឬជើង
ភ្លាមៗចាប់ផ្តើមមានបញ្ហាជាមួយនឹងការនិយាយ និង ការមើលឃើញ
ក្អកចេញឈាម
ឈឺទ្រូង ជាពិសេសពេលដែលដកដង្ហើមចូល
ការឈឺពោះយ៉ាងខ្លាំងក្លា និង
ការសន្លប់ ឬ ការដួលដោយគ្មានមូលហេតុ។
រោគសញ្ញាទាំងនេះអាចនឹងត្រូវបានបង្កដោយកំណកឈាម។
ផលរំខានដែលកម្រខ្លាំងបំផុត
- ការស្ទះសរសៃឈាមខួរក្បាល
- ការគាំងបេះដូង
ប្រសិនបើក្រោយរយៈពេលបីខែ អ្នកមានអារម្មណ៍ថា ផលរំខានគឺលើសពីអ្វីដែលអ្នកអាចទទួលយកបាន អ្នកគួរប្តូរវិធីសាស្រ្តពន្យារកំណើត និងបន្តការការពារឲ្យបានជាប់លាប់។ ស្រោមអនាម័យផ្តល់នូវការការពារដ៏ល្អ ខណៈពេលដែលអ្នកស្វែងរកវិធីសាស្ត្រដែលសាកសមនឹងតម្រូវការរបស់អ្នក។ សូមចងចាំថា កងទ្វារមាសមិនការពារអ្នកពីជម្ងឺកាមរោគនោះទេ។
