កងទ្វារមាសគឺងាយស្រួលក្នុងការប្រើប្រាស់។ អ្វីដែលអ្នកត្រូវចងចាំគឺពេលណាដែលអ្នកត្រូវស៊កបញ្ចូល និងដកវាចេញវិញ។ អ្នកក៏គួរមានភាពស្រណុកជាមួយនឹងកងទ្វារមាសនេះនៅក្នុងរាងកាយរបស់អ្នកដែរ។ ប្រសិនបើអ្នកពិបាកក្នុងការដាក់ម្រាមដៃរបស់អ្នកនៅក្នុងខ្លួនអ្នក កងទ្វារមាសប្រហែលជាមិនមែនជាជម្រើសដ៏ល្អបំផុតសម្រាប់អ្នកទេ។ វាដូចជាការដាក់ tampon ពេលមករដូវអ៊ីចឹង។ ប្រសិនបើអ្នកអាចប្រើតមប៉ុងបាន អ្នកក៏អាចប្រើកងទ្វារមាសបានដែរ។
កងទ្វារមាសត្រូវបានស៊កបញ្ចូលនៅពេលណាក៏បាន អំឡុងពេលមានរដូវរបស់អ្នក។ ទោះជាយ៉ាងណាក៏ដោយ ការបញ្ចូលវានៅថ្ងៃដំបូងនៃវដ្តរដូវរបស់អ្នក នឹងនាំឲ្យកងទ្វារមាសមានប្រសិទ្ធភាពភ្លាមៗ។ ប្រសិនបើអ្នកចាប់ផ្តើមវានៅពេលណាមួយផ្សេងទៀតក្រៅពីពេលនេះ អ្នកនឹងត្រូវប្រើការវិធីសាស្រ្តពន្យារកំណើតបម្រុងណាមួយផ្សេងទៀតសម្រាប់រយៈពេលប្រាំពីរថ្ងៃដំបូងនៃការដាក់កងទ្វារមាស។
មុននឹងប្រើប្រាស់វិធីសាស្រ្តពន្យារកំណើតនេះ អ្នកចាំបាច់ត្រូវទៅជួបអ្នកផ្តល់សេវាថែទាំសុខភាពរបស់អ្នក សម្រាប់ការវាយតម្លៃស្ថានភាពសុខភាពរបស់អ្នក ដែលនឹងកំណត់ថាតើវិធិសាស្រ្តនេះសមស្របសម្រាប់អ្នកដែរឬទេ។ នៅក្នុងប្រទេសមួយចំនួន អ្នកនឹងត្រូវការវេជ្ជបញ្ជាមុនពេលអ្នកអាចទិញវាបាន។
ការស៊កកងទ្វារមាស
ដើម្បីចាប់ផ្តើម សូមលាងដៃជាមួយសាប៊ូ និងទឹក។ ទុកឲ្យដៃស្ងួត។ បន្ទាប់មក ជ្រើសរើសទីតាំងដែលស្រួលបំផុតសម្រាប់អ្នក ឧទាហរណ៍ ឈរឡើងជើងម្ខាង អង្គុយចោងហោង ឬដេកចុះ។ ដើម្បីដាក់កងទ្វារមាសចូល សូមច្របាច់វានៅចន្លោះមេដៃ និងម្រាមដៃចង្អុល ហើយបញ្ចូលវាដូចជា tampon អ៊ីចឹងឯង។ វានឹងមានទីតាំងទល់នឹងជញ្ជាំងទ្វារមាសរបស់អ្នក។ ទីតាំងពិតប្រាកដមិនសំខាន់ទេ ឲ្យតែអ្នកមានភាពស្រណុកស្រួលក្នុងរាងកាយ។ អ្នកប្រហែលជាចង់សាកល្បងវិធី «បង្វិល» ក៏បាន ដែលអ្នកបង្វិលកងទ្វារមាសដើម្បីស៊កបញ្ចូលវា។
មិនដូចគម្របមាត់ស្បូន ឬ ផ្ទាំងពាំងមាត់ស្បូនទេ កងទ្វារមាសមិនចាំបាច់បិទបាំងច្រកចូលស្បូនរបស់អ្នកទាំងមូល (មាត់ស្បូន) ដើម្បីមានដំណើរការនោះទេ។ ប្រសិនបើកងទ្វារមាសរបស់អ្នកធ្វើឲ្យអ្នកមានអារម្មណ៍មិនស្រួល អ្នកអាចរុញវាបន្ថែមទៀតចូលទៅក្នុងទ្វារមាសរបស់អ្នករហូតដល់អ្នកលែងមានអារម្មណ៍មិនស្រណុកក្នុងខ្លួន។
ការដកកងទ្វារមាសចេញក្នុងអំឡុងពេលរួមភេទគឺមិនចាំបាច់ ឬមិនត្រូវបានគេណែនាំឲ្យធ្វើទេ។ ទោះជាយ៉ាងណាក៏ដោយ ប្រសិនបើអ្នកចង់ដកវាចេញ អ្នកអាចយកវាចេញបាននៅពេលរួមភេទ យកចេញដើម្បីសម្អាត ឬហេតុផលណាផ្សេងទៀត ប៉ុន្តែត្រូវប្រាកដថាអ្នកនឹងដាក់វាចូលវិញក្នុងអំឡុងពេល ៤៨ ម៉ោងបន្ទាប់ពីការដកចេញ។
នៅពេលដែលអ្នកដាក់កងទ្វារមាសនោះចូល គេបានណែនាំឲ្យអ្នកទុកវានៅក្នុងទ្វារមាសអ្នករយៈពេលបីសប្តាហ៍។ អ្នកត្រូវដកវាចេញនៅដើមសប្តាហ៍ទីបួន [3] ។
តើគេដកកងទ្វារមាសតាមរបៀបណា?
ដើម្បីយកកងទ្វារមាសចេញ សូមទ្ពក់ម្រាមដៃស្អាតរបស់អ្នកនៅលើគែមខាងក្រោម ហើយទាញវាចេញ។ ដាក់វានៅក្នុងសំបកដែលវេចខ្ចប់មកជាមួយវា ហើយបោះវាទៅក្នុងធុងសំរាម ចូរអ្នកជៀសវាងការបោះវាចោលទៅក្នុងបង្គន់។ កុំធ្វើការស៊កអ្វីចូលរយៈពេលមួយសប្តាហ៍ បន្ទាប់មកដាក់បញ្ចូលកងថ្មីមួយទៀត ហើយចាប់ផ្តើមកាលវិភាគដាក់កងម្តងទៀត។
នៅពេលដែលដកកងទ្វារមាសចេញមក អ្នកប្រហែលជាមករដូវវិញហើយ។ កុំបារម្ភប្រសិនបើអ្នកនៅតែមករដូវនៅពេលវាដល់ពេលត្រូវដាក់កងទ្វារមាសឡើងវិញ។ នោះជារឿងធម្មតាទេ ហើយរដូវរបស់អ្នកគួរតែឈប់វិញនៅពេលឆាប់ៗ។
តើនឹងមានរឿងអ្វីកើតឡើងប្រសិនបើខ្ញុំភ្លេចដកកងទ្វារមាសចេញ?
ប្រសិនបើអ្នកភ្លេចដកកងទ្វារមាសចេញបន្ទាប់ពីបីសប្តាហ៍ ហើយទុកវារហូតដល់សប្តាហ៍ទីបួន នោះមិនចាំធ្វើអ្វីធំដុំនោះទេ គ្រាន់តែដកកងទ្វារមាសនោះចេញ ហើយបន្តវដ្តថ្មីតាមការគ្រោងទុក។
ប្រសិនបើកងទ្វារមាសពន្យាកំណើតត្រូវបានទុកចោលលើសពីប្រាំពីរថ្ងៃ អ្នកត្រូវយកវាចេញឲ្យបានឆាប់តាមដែលអាចធ្វើទៅបាន ហើយស៊កបញ្ចូលកងទ្វារមាសថ្មីភ្លាមៗ។ បន្ទាប់មកអ្នកត្រូវប្រើវិធីពន្យារកំណើតបម្រុង ដូចជាស្រោមអនាម័យ សម្រាប់រយៈពេលប្រាំពីរថ្ងៃបន្ទាប់ពីនោះ។
អ្នកនៅតែអាចរួមភេទបាន និងប្រើ tampon បាននៅពេលដែលដាក់កងទ្វារមាសចូល។ ខណៈពេលដែលដៃគូរបស់អ្នកអាចមានអារម្មណ៍ប៉ះបងទ្វារមាសអំឡុងពេលរួមភេទ វានឹងមិនបង្កគ្រោះថ្នាក់ដល់ដៃគូរបស់អ្នកតាមមធ្យោបាយណាមួយឡើយ [4] ។
តើហេតុអ្វីបានជាកងទ្វារមាសរបស់ខ្ញុំរបូតចេញរហូត?
អ្នកគួរតែអាចពិនិត្យមើលវត្តមានរបស់កងទ្វារមាសដោយប្រើម្រាមដៃរបស់អ្នក។ ប្រសិនបើអ្នកស្ទាបឃើញថាកងទ្វារមាសរបស់អ្នកចេញមកក្រៅ នោះមានឱកាសខ្ពស់ណាស់ដែលអ្នកដាក់ស៊កបញ្ចូលវាមិនត្រឹមត្រូវ។ ប្រសិនបើកងទ្វារមាសរអិលចេញ លាងវាក្នុងទឹកស្អាត ហើយបញ្ចូលវាចូលវិញភ្លាមៗ។
ប្រសិនបើអ្នកប្រាកដថាកងទ្វារមាសស្ថិតនៅក្នុងទ្វារមាសរបស់អ្នកនៅឡើយ ប៉ុន្តៃអ្នកមានអារម្មណ៍ថាវាមិននៅ សូមទៅជួបអ្នកផ្តល់សេវាថែទាំសុខភាពដើម្បីរកជំនួយពីអ្នកជំនាញ។ កងទ្វារមាសពន្យារកំណើតមិនអាចបាត់ចូលទៅក្នុងទ្វាមាសរបស់អ្នកឡើយ។
