ស្ត្រីភាគច្រើនអាចប្រើប្រាស់កងទ្វារមាសបានដោយឥតបញ្ហា។ ប្រសិនបើអ្នកមានសុខភាពល្អ មិនជក់បារី មិនលើសទម្ងន់ និងមិនមានហេតុផលវេជ្ជសាស្ត្រណាមួយដែលរារាំងអ្នកពីការប្រើកងទ្វារមាសពន្យារកំណើតនោះទេ អ្នកអាចប្រើវាបានរហូតដល់អ្នកអស់រដូវ។ លក្ខខណ្ឌសមស្របនៃការដាក់កងទ្វារមាសបានគឺស្រដៀងគ្នាទៅនឹងលក្ខខណ្ឌនៃថ្នាំគ្រាប់ពន្យារកំណើតផ្សំដែរ។ កងទ្វារមាសប្រហែលជាមិនមែនជាវិធីសាស្ត្រត្រឹមត្រូវសម្រាប់អ្នកទេ ប្រសិនបើ [8]៖
- អ្នកជក់បារី ឬ មានអាយុច្រើនជាង៣៥ឆ្នាំ (ប្រសិនបើអ្នកមានអាយុលើស ៣៥ ឆ្នាំ អ្នកជក់បារីនៅពេលដែលកំពុងប្រើប្រាស់កងទ្វារមាស វានឹងបង្កើនហានិភ័យនៃការកើតឡើងនៃផលប៉ះពាល់មួយចំនួន អ្នកគប្បីគួរតែពិភាក្សាជាមួយនឹងអ្នកផ្តល់សេវាវេជ្ជសាស្រ្តរបស់អ្នកមុននឹងប្រើប្រាស់)
- អ្នកមានអាយុលើសពី ៥០ ឆ្នាំ ក្នុងករណីនេះអ្នកត្រូវពិគ្រោះរកជម្រើសពន្យាកំណើតផ្សេងជាមួយនឹងវេជ្ជបណ្ឌិតរបស់អ្នក
- មានឈឺក្បាលបង្កាំងធ្ងន់ធ្ងរជាមួយនឹងសញ្ញាឲ្យដឹងមុន (aura) (មានការបាត់បង់គំហើញនៅភ្នែកមុននឹងមានការឈឺក្បាលបង្កាំងជាសញ្ញាឲ្យដឹងមុន)
- អ្នកទើបតែបានសម្រាលកូនប្រមាណជាប្រាំមួយសប្តាហ៍មុន ហើយអ្នកកំពុងតែបំបៅដោះកូន (អ្នកអាចប្រើកងទ្វារមាសបន្ទាប់ពី ប្រាំមួយខែក្រោយសម្រាល ឬ នៅពេលដែលកូនលែងបៅទឹកដោះ)
- មានជម្ងឺទឹកនោមផ្អែមច្រើនជាង ២០ ឆ្នាំមកហើយដែលមានរួមជាមួយនឹងបញ្ហាសរសៃឈាមអាកទែ គំហើញ តម្រង់នោម ឬ ប្រព័ន្ធសរសៃប្រសាទ
- កំពុងតែមាន ឬ ធ្លាប់មានជម្ងឺមហារីកសុដន់
- អ្នកធ្លាប់មានការស្ទះសរសៃឈាមខួរក្បាល កំណកឈាមនៅក្នុងជើង ឬ សួត គាំងបេះដូង ឬ បញ្ហាបេះដូងធ្ងន់ធ្ងរផ្សេងៗទៀត
- មានជម្ងឺថ្លើមធ្ងន់ធ្ងរ ក្រិនថ្លើម ឬ ដុំសាច់ក្នុងថ្លើម
- អ្នកមានជម្ងឺថង់ប្រម៉ាត់ ឬ កំពុងតែទទួលការព្យាបាលដោយថ្នាំសម្រាប់ជម្ងឺថង់ទឹកប្រម៉ាត់ និង
- អ្នកកំពុងតែប្រើប្រាស់ថ្នាំប្រឆាំងនឹងប្រកាច់។
ប្រសិនបើអ្នកមានបញ្ហាដូចខាងលើនេះ ចូរពិគ្រោះជាមួយនឹងអ្នកផ្តល់សេវាថែទាំសុខភាពជំនាញដើម្បីរកនូវវិធីសាស្រ្តពន្យារកំណើតដែលសមស្របបំផុតសម្រាប់អ្នក។
