តើនៅពេលណាដែរដែលថ្នាំគ្រាប់ពន្យារកំណើតចាប់មានប្រសិទ្ធភាព?
រឿងដំបូងបង្អស់ដែលអ្នកត្រូវដឹងគឺថា ពេលវេលាដ៏ល្អបំផុតដើម្បីចាប់ផ្តើមលេបថ្នាំគ្រាប់ពន្យារកំណើតនោះគឺនៅថ្ងៃដំបូងនៃការមករដូវ។ នេះគឺដោយសារតែអ្នកទទួលបានការបង្ការពីការមានផ្ទៃពោះភ្លាមៗ។ ទោះជាយ៉ាងណាក៏ដោយ តាមពិតទៅអ្នកចាប់ផ្តើមប្រើនៅពេលណាក៏បានដែរ គ្រាន់តែអ្នកនឹងត្រូវប្រើវិធីសាស្រ្តពន្យារកំណើតណាមួយផ្សេងទៀតដើម្បីការពាររយៈពេលប្រាំពីរថ្ងៃដំបូង ដូចជាស្រោមអនាម័យជាដើម។
តើអ្នកចាំបាច់ត្រូវលេបថ្នាំគ្រាប់ពន្យារកំណើតឲ្យទៀងម៉ោងដែរឬទេ?
ដើម្បីទទួលបាននូវប្រសិទ្ធភាពនៃការការពារខ្ពស់បំផុតពីថ្នាំគ្រាប់ពន្យារកំណើតផ្សំបាននោះ វាត្រូវបានណែនាំអោយលេបថ្នាំជារៀងរាល់ថ្ងៃនៅម៉ោងពេលតែមួយ ជាដាច់ខាត ហើយចាប់ផ្តើមលេបបន្ទះថ្នាំថ្មីឲ្យទាន់ពេលវេលា។ ខណៈពេលដែលថ្នាំរបស់អ្នកអាចនៅតែមានប្រសិទ្ធភាព ទោះបីជាអ្នកលេបវានៅពេលផ្សេងគ្នានៅថ្ងៃផ្សេងៗគ្នាក៏ដោយ តែការលេបទៀងម៉ោងពេលតែមួយអាចកាត់បន្ថយផលរំខានមួយចំនួននៃថ្នាំគ្រាប់ និងជួយអ្នកឱ្យចងចាំលេបថ្នាំជារៀងរាល់ថ្ងៃ។ នៅពេលដែលខកខានបានលេបថ្នាំណាមួយ អ្នកគួរតែលេបឱ្យបានឆាប់តាមដែលអាចធ្វើទៅបាន។ ការខកខានលេបថ្នាំបង្កើនហានិភ័យនៃការមានផ្ទៃពោះ និងអាចធ្វើឱ្យផលរំខានកាន់តែខ្លាំង [3] ។ ប្រសិនបើអ្នកដឹងថាអ្នកជាមនុស្សឧស្សាហ៍ភ្លេចភ្លាំង អ្នកគួរតែដាក់ម៉ោងរោទិ៍ដើម្បីរំលឹកខ្លួនឯង ឬភ្ជាប់ការលេបថ្នាំទៅនឹងសកម្មភាពប្រចាំថ្ងៃរបស់អ្នក ដូចជាការដុសធ្មេញរបស់អ្នកជាដើម។ [4] ។
តើខ្ញុំគួរលេបថ្នាំគ្រាប់ពន្យារកំណើតផ្សំឲ្យទៀងម៉ោងពេលវេលាជារៀងរាល់ថ្ងៃដែរឬទេ?
អ្នកដែលចង់ប្រើប្រាស់ថ្នាំគ្រាប់ពន្យារកំណើតត្រូវតែមានវិន័យខ្ពស់។ នេះមានន័យថាអ្នកត្រូវតែចងចាំលេបថ្នាំជារៀងរាល់ថ្ងៃនៅពេលវេលាម៉ោងដដែល។ ប្រសិនបើអ្នកមិនបានលេបថ្នាំបានទៀងពេលនោះទេ វាអាចនឹងមិនសូវមានប្រសិទ្ធភាពដូចការលេបទៀងទាត់។
មានវិធីសាស្រ្តជាច្រើនក្នុងការលេបថ្នាំគ្រាប់ពន្យារកំណើត៖
១. ក្នុងករណីអ្នកមករដូវទៀងពេលរាល់ខែ។
ជម្រើសនេះគឺសម្រាប់អ្នកដែលមករដូវទៀងថ្ងៃប្រចាំខែ។ ប្រសិនបើអ្នកប្រើប្រភេទថ្នាំដែលមាន ២៨ ថ្ងៃ លេបថ្នាំអរម៉ូនធម្មតាររយៈពេល ២១ ថ្ងៃ បន្ទាប់មកថ្នាំរំលឹក (គ្មានអរម៉ូន) ចំនួន ៧ គ្រាប់។ បន្ទាប់ពីប្រាំពីរថ្ងៃ ចាប់ផ្តើមថ្នាំបន្ទះថ្មីចុះ។ ប្រសិនបើប្រើប្រភេទថ្នាំ ២១ គ្រាប់ អ្នកគួរលេបថ្នាំអរម៉ូនរយៈពេល ២១ ថ្ងៃបន្ទាប់មកសម្រាក ៧ ថ្ងៃ ហើយចប់បន្ទះនេះហើយ បន្ទាប់ពីនេះអ្នកអាចលេបថ្នាំបន្ទះថ្មីបានហើយ។
អ្នកនឹងមានការមករដូវក្នុងពេលដែលអ្នកកំពុងលេបថ្នាំរំលឹក (គ្មានអរម៉ូន) ទាំងប្រាំពីរគ្រាប់ ឬក្នុងពេលដែលអ្នកសម្រាកមិនលេបថ្នាំក្នុងករណីថ្នាំ ២១ គ្រាប់។ សូមចំណាំថាពេលខ្លះការមករដូវរបស់អ្នកនឹងមកវិញនៅពេលក្រោយបន្តិច។ ការមករដូវរបស់អ្នកក៏អាចមានលំហូរស្រាលជាងមុនដែរ ហើយមានការរមួលចុកតិចជាងបើប្រៀបធៀបទៅនឹងការមករដូវទៀងទាត់របស់អ្នក។ ទោះបីជាយ៉ាងណាក៏ដោយ អ្នកនឹងត្រូវបានការពារពីការមានផ្ទៃពោះក្នុងអំឡុងពេលប្រាំពីរថ្ងៃដែលសម្រាកមិនលេបថ្នាំនោះ ប្រសិនបើអ្នកលេបថ្នាំបានត្រឹមត្រូវទៀតទាត់។ ហើយអ្នកចាំបាច់ត្រូវប្រើថ្នាំបន្ទះថ្មីបន្ទាប់ពីរយៈពេលប្រាំពីរឆ្នាំ ដោយគិតថាអ្នកកំពុងមករដូវឬក៏អត់នោះទេ។
ថ្នាំគ្រាប់ពន្យារកំណើតផ្សំនឹងមិនការពារអ្នកពីការមានផ្ទៃពោះទេ ប្រសិនបើអ្នកភ្លេចលេបថ្នាំ លើសពីពីរគ្រាប់ក្នុងមួយសប្តាហ៍។
២. ក្នុងករណីដែលអ្នកមករដូវមិនទៀងពេលវេលា។
ជម្រើសនេះគឺសម្រាប់អ្នកដែលចង់មករដូវយូរៗម្តងតែប៉ុណ្ណោះ។ ដើម្បីមិនសូវមករដូវ អ្នកត្រូវលេបថ្នាំអរម៉ូនបន្តបន្ទាប់គ្នាជារៀងរាល់ថ្ងៃ ហើយកុំលេបថ្នាំគ្មានអរម៉ូនឲ្យសោះ ក្នុងរយៈពេលច្រើនខែ។ អ្នកអាចលេបថ្នាំគ្មានអរម៉ូនទាំង ប្រាំពីរ គ្រាប់នោះបាននៅពេលដែលអ្នកចង់មានរដូវ។
៣. ប្រសិនបើអ្នកមិនចង់មករដូវសោះតែម្តង
ជម្រើសនេះគឺសម្រាប់អ្នកដែលមិនចង់មានការមករដូវសោះតែម្តង។ ដើម្បីបានលទ្ធផលនេះ ចូរលេបថ្នាំអរម៉ូនជាបន្តបន្ទាប់ជារៀងរាល់ថ្ងៃ ហើយកុំលេបថ្នាំគ្មានអរម៉ូន ឬ ឈប់លេបថ្នាំទាល់តែសោះ។ នេះអាចមានន័យថាលេបថ្នាំ នៅក្នុងបន្ទះថ្នាំ២១ គ្រាប់ជារៀងរាល់ថ្ងៃ ដែលមិនរំលងមួយថ្ងៃណានោះឡើយ។
ជាមួយនឹងជម្រើសនេះ អ្នកត្រូវបានការពារពីការមានផ្ទៃពោះ លុះត្រាតែអ្នកភ្លេចលេបថ្នាំគ្រាប់ច្រើនជាង ៨ គ្រាប់ជាប់ៗគ្នា។ អ្នកអាចធ្វើរបៀបនេះសម្រាប់ថ្នាំមានអរម៉ូនគ្រប់បន្ទះបានតាមដែលអ្នកចូលចិត្ត ហើយអ្នកក៏មានជម្រើសក្នុងការលេបថ្នាំដែលគ្មានអរម៉ូននៅពេលណាដែលអ្នកចង់មករដូវវិញ។
ការធ្វើរបៀបនេះ អាចនឹងនាំឲ្យអ្នកមានការមករដូវមិនទៀងទាត់ និងការធ្លាក់ឈាមបន្តាកប្រឡាក់ខោក្នុង ប៉ុន្តែនេះនឹងបាត់ទៅវិញតាមពេលវេលា។ [5]
មានប្រភេទថ្នាំគ្រាប់ច្រើនណាស់ដែលមាននៅលើទីផ្សារ ហើយវាអាចនឹងពិបាកក្នុងការជ្រើសរើសជម្រើសដែលល្អបំផុតសម្រាប់យើង. អ្នកផ្តល់សេវាថែទាំសុខភាព ឬ បុគ្គលិកសុខាភិបាលតាមសហគមន៍ដែលមានការបណ្តុះបណ្តាលត្រឹមត្រូវ អាចជួយអ្នកក្នុងការសម្រេចថាប្រភេទថ្នាំគ្រាប់ពន្យារកំណើតផ្សំមួយណាដែលសាកសមសម្រាប់អ្នកបំផុត។
តើមានរឿងអ្វីកើតឡើងប្រសិនបើខ្ញុំភ្លេចលេបថ្នាំ?
ប្រសិនបើអ្នកខកខានលេបថ្នាំមួយ ឬពីរគ្រាប់ សូមលេបថ្នាំអរម៉ូនដែលអ្នកមិនបានលេបនោះឱ្យបានឆាប់តាមដែលអាចធ្វើទៅបាន។ ប្រសិនបើអ្នកពន្យារការលេបថ្នាំរយៈពេល ៤៨ ម៉ោង បន្ទាប់ពីការលេបថ្នាំគ្រាប់ចុងក្រោយ វាអាចនឹងបណ្តាលឱ្យមានការមករដូវមិនទៀងទាត់។
ប្រសិនបើខ្ញុំភ្លេចលេបថ្នាំគ្រាប់ពន្យារកំណើតមួយគ្រាប់ តើខ្ញុំអាចលេបថ្នាំពីរគ្រាប់ក្នុងមួយថ្ងៃបានដែរឬទេ?
ប្រសិនបើអ្នកភ្លេចលេបថ្នាំទាន់ពេល ហើយអ្នកនឹកឃើញវានៅពេលក្រោយនោះ អ្នកអាចលេបថ្នាំពីរគ្រាប់ក្នុងពេលមួយថ្ងៃបាន ឲ្យតែអ្នកលេបវារយៈពេលឃ្លាតគ្នា ១០ ម៉ោង។ ប្រសិនបើអ្នកលេបថ្នាំតិចជាងរយៈពេលឃ្លាតគ្នា ១០ ម៉ោងនោះ វាអាចនឹងធ្វើឲ្យអ្នកវិលមុខចង្អោរចង់ក្អួតបាន [6]។
តើខ្ញុំត្រូវធ្វើដូចម្តេចប្រសិនបើខ្ញុំក្អួតបន្ទាប់ពីបានលេបថ្នាំគ្រាប់ពន្យារកំណើត?
ប្រសិនបើអ្នកក្អួត ពីរម៉ោងបន្ទាប់ពីការលេបថ្នាំគ្រាប់ពន្យារកំណើត អ្នកគួរតែលេបថ្នាំមួយគ្រាប់ទៀត ហើយបន្ទាប់មកបន្តលេបថ្នាំតាមធម្មតាដដែល។
តើឱកាសនៃការមានផ្ទៃពោះនៅពេលដែលកំពុងប្រើថ្នាំគ្រាប់ពន្យារកំណើតនឹងកើនឡើងដែរឬទេ ប្រសិនបើខ្ញុំលេបថ្នាំប្រឆាំងនឹងបាក់តេរី?
ថ្នាំប្រឆាំងបាក់តេរីតែមួយគត់ដែលត្រូវបានគេដឹងថាអាចកាត់បន្ថយប្រសិទ្ធភាពនៃថ្នាំគ្រាប់ពន្យារកំណើតអរម៉ូន រួមទាំងថ្នាំផ្សំ គឺមានតែថ្នាំ Rifampin តែប៉ុណ្ណោះ ។ ឱសថនេះត្រូវបានគេប្រើប្រាស់ជាចម្បងដើម្បីព្យាបាលជម្ងឺរបេង វាមានមុខងាររំខានដល់អរម៉ូន estrogen និងកាត់បន្ថយប្រសិទ្ធភាពរបស់ estrogen ក្នុងការបង្ការការមានផ្ទៃពោះ។ ប្រសិនបើអ្នកត្រូវប្រើថ្នាំ Rifampin សូមពិភាក្សាជាមួយអ្នកផ្តល់សេវាថែទាំសុខភាពរបស់អ្នកអំពីការប្រើប្រាស់វិធីសាស្រ្តពន្យារកំណើតមួយផ្សេងទៀតក្នុងអំឡុងពេលនោះ។
តើខ្ញុំអាចប្រើថ្នាំគ្រាប់ពន្យារកំណើតជាមធ្យោបាយពន្យារកំណើតបន្ទាន់បានដែរឬទេ?
អាចប្រើបាន។ នៅពេលដែលអ្នកលេបថ្នាំគ្រាប់ពន្យារកំណើតក្នុងកម្រិតខ្ពស់ជាងធម្មតា អ្នកអាចប្រើវាជាវីធីសាស្រ្តពន្យារកំណើតបន្ទាន់បាន។ តែអ្នកត្រូវលេបវាមិនឲ្យហួស ប្រាំថ្ងៃបន្ទាប់ពីការរួមភេទដែលមិនបានការពារនោះទេ។ ប្រសិនបើវាមានរយៈពេល ២៤ ម៉ោងក្រោយអ្នកបានលេបថ្នាំគ្រាប់ពន្យារកំណើតប្រចាំថ្ងៃរបស់អ្នក អ្នកត្រូវប្រើមធ្យោបាយពន្យារកំណើតណាមួយដើម្បីបង្ការដូចជាស្រោមអនាម័យ រយៈពេលប្រាំពីរថ្ងៃក្រោយ។
