ផលរំខាននៃថ្នាំគ្រាប់ពន្យារកំណើតផ្សំ

ផលរំខានមិនមែនជាសញ្ញានៃការមានជម្ងឺនោះទេ ហើយខណៈពេលដែលវាជារឿងធម្មតា ស្ត្រីមួយចំនួនមិនជួបប្រទះវាទាល់តែសោះ។ ក្នុងករណីដែលមានផលរំខាន ពួកវានឹងថយចុះតាមកម្រិត ឬបាត់ទៅវិញក្នុងរយៈពេលពីរបីខែដំបូងនៃការប្រើថ្នាំគ្រាប់។ ផលរំខាននៃថ្នាំគ្រាប់ពន្យារកំណើតផ្សំមានដូចជា៖

– ការផ្លាស់ប្តូររបត់នៃការមករដូវ ដូចជាការមករដូវមិនទៀងទាត់ ឬមិនសូវមករដូវ ការមករដូវតិចជាងមុន ឬតិចថ្ងៃ ឬមិនមានរដូវទាល់តែសោះតែម្តង (ការធ្លាក់ឈាមតិចតួចនៅចន្លោះពេលមករដូវ គឺគ្មានអ្វីដែលត្រូវព្រួយបារម្ភនោះទេ ហើយអាការៈនេះត្រូវបានគេរំពឹងថានឹងលែងមាននៅចុងបញ្ចប់នៃការលេបថ្នាំបន្ទះទីបី ប៉ុន្តែ ប្រសិនបើវាមិនបាត់ទៅវិញទេ អ្នកគួរតែប្រាប់វេជ្ជបណ្ឌិតរបស់អ្នក)
ឈឺក្បាល
វិលមុខ
ការធ្លាក់ឈាមបន្តាកប្រឡាក់ខោក្នុង
ឈឺត្រង់សុដន់
បម្លាស់ប្តូរនៃទម្ងន់
មុនលើមុខប្រសើរជាងមុន ឬ កាន់តែយ៉ាប់ជាងមុន
បម្លាស់់ប្តូរចំណង់ផ្លូវភេទ
បម្លាស់ប្តូរអារម្មណ៍ឡើងចុះ
ចង្អោរ (ដើម្បីជៀសវាងការចង្អោរ ត្រូវលេបថ្នាំជាមួយអាហារ ឬ មុននឹងចូលគេង)។
ថ្នាំមួយចំនួនអាចបណ្តាលឱ្យមានការកើនឡើងសម្ពាធឈាម។ អ្នក​ដែល​លេប​ថ្នាំ​គ្រាប់ពន្យារកំណើតត្រូវ​បាន​ណែនាំ​ឱ្យ​ពិនិត្យ​សម្ពាធឈាម​របស់​ខ្លួន​ជា​រៀង​រាល់​ពីរ​ទៅបី​ខែម្តង។ ប្រសិនបើការកើនឡើងសម្ពាធឈាមដែលបណ្តាលមកពីថ្នាំគ្រាប់ខ្ពស់ពេក អ្នកគួរតែបញ្ឈប់ប្រើប្រាស់មធ្យោបាយពន្យារកំណើតនេះ។ ជាធម្មតាការលើសសម្ពាធឈាមនោះនឹងធ្លាក់ចុះបន្ទាប់ពីអ្នកឈប់លេបថ្នាំគ្រាប់ [8] ។

ផលវិបាកអវិជ្ជមាននៃថ្នាំគ្រាប់ពន្យារកំណើតផ្សំ

ផលវិបាកដែលកម្រខ្លាំង

ស្ត្រីដែលប្រើថ្នាំគ្រាប់មានការកើនឡើងហានិភ័យតិចតួចក្នុងការមានកំណកឈាម។ កំណកឈាមទាំងនេះអាចបណ្តាលឱ្យស្ទះសរសៃឈាមវ៉ែន ដែលអាចបណ្តាលឱ្យមានការស្ទះសរសៃឈាមវ៉ែនជ្រៅ ឬស្ទះសរសៃឈាមនៅសួត និងអាចបណ្តាលឱ្យគាំងបេះដូង ឬដាច់សរសៃឈាមខួរក្បាល។ ប្រសិនបើមានករណីនេះកើតឡើងមែន ភាគច្រើនវានឹងមានក្នុងអំឡុងពេលឆ្នាំដំបូងបង្អស់នៃការប្រើប្រាស់ថ្នាំគ្រាប់ពន្យារកំណើត។

អ្នកចាំបាច់ត្រូវទៅពិគ្រោះជាមួយវេជ្ជបណ្ឌិតជាបន្ទាន់ប្រសិនបើអ្នកមានរោគសញ្ញាដូចខាងក្រោម​៖
– ការដួលសន្លប់ ឬ ខ្យល់គដោយមិនមានមូលហេតុច្បាស់លាស់
– មានការពិបាកដកដង្ហើម
– មានការហើមជើងដែលឈឺចុកចាប់ខ្លាំង
– មានអារម្មណ៍ស្ពឹក ឬ ទន់គ្មានកម្លាំងនៅដៃឬជើង
– សុខៗមានបញ្ហាជាមួយនឹងការនិយាយ ឬ ការមើលឃើញ
– ក្អកចេញឈាម
– ចុកឈឺនៅទ្រូង ជាពិសេសឈឺនៅពេលដកដង្ហើមចូល និង
– មានការឈឺពោះកម្រិតខ្លាំងក្លា
រោគសញ្ញានេះអាចបង្ករឡើងដោយកំណកឈាម។

ផលវិបាកដែលកម្រខ្លាំងមែនទែន

ការស្ទះសរសៃឈាមក្នុងខួរក្បាល
ការគាំងបេះដូង
“ប្រសិនបើបន្ទាប់ពីរយៈពេល បីខែហើយ អ្នកនៅតែរងនូវផលរំខានទាំងអស់នេះ ហើយអ្នកមិនអាចទ្រាំទ្របាន អ្នកអាចធ្វើការផ្លាស់ប្តូរទៅប្រើប្រាស់មធ្យោយបាយពន្យារកំណើតណាមួយផ្សេងទៀត។
អ្នកត្រូវចងចាំថា ថ្នាំគ្រាប់ពន្យារកំណើតផ្សំមិនអាចការពារអ្នកពីជម្ងឺកាមរោគបាននោះទេ (STIs)។”

តើខ្ញុំត្រូវមានការព្រួយបារម្មណ៍ពីកំណកឈាមដែរឬទេ?

ហានិភ័យនៃការបង្កមានកំណកឈាមក្នុងពេលប្រើថ្នាំគ្រាប់ពន្យារកំណើតគឺទាបណាស់។ ហានិភ័យដែលអ្នកអាចស្លាប់ពីវានោះគឺកាន់តែទាប។ លក្ខខណ្ឌ ​នៃហ្សែន និងលក្ខខណ្ឌសុខភាពមួយចំនួនបង្កើនហានិភ័យនៃការមានកំណកឈាមបស់អ្នក។ ប្រសិនបើអ្នកមានប្រវត្តិនៃធ្លាប់មានកំណកឈាម ឬមានការព្រួយបារម្ភអំពីកំណកឈាម សូមសាកសួរ និងពិគ្រោះជាមួយអ្នកផ្តល់សេវាថែទាំសុខភាពរបស់អ្នក ដើម្បីកំណត់ថាតើថ្នាំគ្រាប់ពន្យារកំណើតនេះគឺជាវិធីសាស្រ្តពន្យារកំណើតដ៏ល្អបំផុតសម្រាប់អ្នកឬអត់។

តើការធ្លាក់ឈាមបន្តាកប្រឡាក់ខោនៅពេលប្រើប្រាស់ថ្នាំគ្រាប់ពន្យារកំណើតផ្សំជារឿងធម្មតាដែរឬទេ?

ការធ្លាក់ឈាមបន្តាកប្រឡាក់ខោក្នុងគឺជាផលប៉ះពាល់ទូទៅនៃថ្នាំគ្រាប់ពន្យារកំណើតផ្សំ។ ជាធម្មតាវានឹងកើតឡើងដោយសារហេតុផលផ្សេងៗ។ ប្រសិនបើអ្នកលេបថ្នាំដោយមិនមានថ្ងៃឈប់សម្រាកសោះតែម្តង អ្នកនឹងមានការធ្លាក់ឈាមតិចតួចដែលជំនួរការមករដូវនេះ។ វាគ្រាន់តែជាការធ្លាក់ឈាមបន្តាកប្រឡាក់ខោ ឬការធ្លាក់ឈាមកម្រិតតិច​ ដែលវាជំនួសឲ្យការមករដូវប្រចាំខែរបស់អ្នកប៉ុណ្ណោះ នេះមិនមែនជាសញ្ញានៃសុខភាពមិនល្អនោះទេ។ វាក៏មិនមានន័យថាថ្នាំគ្រាប់ពន្យារកំណើតរបស់អ្នកគ្មានប្រសិទ្ធភាពដែរ។

តើវាមានសុវត្ថិភាពទេក្នុងការប្រើប្រាស់ថ្នាំគ្រាប់ពន្យារកំណើតផ្សំជាប់គ្នាជាច្រើនឆ្នាំដោយមិនមានការសម្រាកសោះ?

វាមានសុវត្ថិភាព។ ប្រសិនបើអ្នកលេបថ្នាំជារៀងរាល់ថ្ងៃ ថ្នាំគ្រាប់ពន្យារកំណើតផ្សំនេះអាចការពារអ្នកពីការមានផ្ទៃពោះរយៈពេលជាច្រើនឆ្នាំ ដោយមិនចាំបាច់ ឈប់លេបថ្នាំនោះទេ។ គ្មានភស្តុតាងវេជ្ជសាស្រ្តណាមួយដែលបង្ហាញថាការសម្រាកមិនលេបថ្នាំគ្រាប់ពន្យារកំណើតនោះគឹជាការចាំបាច់នោះទេ។​ ការឈប់សម្រាកមិនលេបថ្នាំអាចបង្កជាហានិភ័យទៅវិញទេ ព្រោះអ្នកប្រឈមមុខនឹងការមានផ្ទៃពោះដោយមិនបានព្រៀងទុក។

ចុះបើសិនជាខ្ញុំមានការរាគរូសបន្ទាប់ពីការលេបថ្នាំគ្រាប់ពន្យារកំណើត តើយ៉ាងម៉េចវិញ?

វិធីសាស្រ្តពន្យារកំណើតអរម៉ូន រួមទាំងថ្នាំគ្រាប់ពន្យារកំណើតផ្សំផងដែរ អាចធ្វើអោយចលនាពោះវៀនរបស់អ្នកធ្វើទុក។ វាអាចបណ្តាលឲ្យរាគបាន។ ខណៈពេលដែលការរាគរូសវាមិនប៉ះពាល់ដល់ប្រសិទ្ធភាពនៃថ្នាំគ្រាប់ពន្យារកំណើតផ្សំនោះទេ ការរាគធ្ងន់ធ្ងរ (ការរាគចេញទឹក ៦​ ទៅ ៨ដង ក្នុងរយៈពេល ២៤ ម៉ោង) អាចមានន័យថាគ្រាប់ថ្នាំពន្យារកំណើតដែលលេបចុងក្រោយបង្អស់មិនត្រូវបានស្រូបចូលក្នុងខ្លួនរបស់អ្នកទេ។ ប្រសិនបើអ្នកមានអាការៈរាគធ្ងន់ធ្ងរ សូមបន្តលេបថ្នាំគ្រាប់ពន្យារកំណើតរបស់អ្នកដូចធម្មតា។ លើសពីនេះ អ្នកគប្បីគួរប្រើវិធីសាស្រ្តពន្យារកំណើតផ្សេងទៀតដើម្បីបម្រុងទុកការពារ ដូចជាស្រោមអនាម័យ នៅពេលដែលអ្នកកំពុងមានការរាគរូស ហើយប្រើវាបន្តពីរថ្ងៃបន្ទាប់ពីឈប់រាគ។

តើថ្នាំគ្រាប់ពន្យារកំណើតជាមធ្យោបាយពន្យារកំណើតដែលល្អសម្រាប់បរិស្ថានដែរឬទេ?

ខណៈពេលដែលអរម៉ូនមួយចំនួនដែលមាននៅក្នុងថ្នាំគ្រាប់ពន្យារកំណើតអាចនឹងចូលទៅក្នុងបរិស្ថានតាមរយៈទឹកនោមរបស់អ្នកដែលប្រើប្រាស់វា បរិមាណនេះគឺតូចជាងប្រភពផ្សេងទៀតដែលបញ្ចេញអរម៉ូន estrogen នៅក្នុងបរិស្ថាន។ ឧទាហរណ៍ អរម៉ូន estrogen ពីឧស្សាហកម្មផលិតកម្ម ថ្នាំសម្លាប់សត្វល្អិត ជី និងថ្នាំសម្រាប់សត្វ ចូលក្នុងប្រព័ន្ធអេកូសាស្រ្តក្នុងបរិមាណធំជាងបើប្រៀបធៀបទៅនឹងអរម៉ូន estrogen ដែលមនុស្សម្នាក់នឹងបញ្ចេញតាមទឹកនោមនោះ។

ប្រសិនបើអ្នកមានការព្រួយបារម្ភអំពីការចូលរួមបន្ថែមអរម៉ូនចូលក្នុងរាងកាយរបស់អ្នក ឬចូលទៅក្នុងបរិស្ថាននោះ មានជម្រើសពន្យារកំណើតផ្សេងទៀតដែលអ្នកអាចប្រើប្រាស់បាន។ កងស្ពាន់ដាក់ក្នុងស្បូន និងស្រោមអនាម័យជ័រឡាក់តិច (Latex condoms) គឺជាជម្រើសដ៏ល្អ។ អ្វីដែលសំខាន់បំផុតគឺត្រូវប្រើវិធីសាស្ត្រពន្យារកំណើតណាមួយរដែលនឹងជួយអ្នកក្នុងការបង្ការការមានផ្ទៃពោះ។