မအင်္ဂါအကွင်းကို ဘယ်လိုထည့်သွင်းရသလဲ?

အကွင်းဟာ အသုံးပြုရတာလွယ်ကူပါတယ်။ သင်မှတ်မိရမှာက ဘယ်အချိန်မှာ ထည့်သွင်းရမလဲ နှင့် ဘယ်အချိန်မှာ ဖယ်ရှားရမလဲတို့ပဲဖြစ်ပါတယ်။ သင့်ခန္ဓာကိုယ်နှင့်လည်း သက်တောင့်သက်သာရှိသင့်ပါတယ်။ သင့်ကိုယ်အတွင်းသို့ သင့်လက်ချောင်းများထည့်သွင်းခြင်းအတွက် အဆင်မပြေပါက အကွင်းဟာ သင့်အတွက် အကောင်းဆုံးရွေးချယ်စရာမဟုတ်နိုင်ပါဘူး။ ၎င်းဟာ tampon ထည့်သွင်းခြင်းနှင့် ပုံစံအတော်တူပါတယ်။ သင်ဒီဟာကို လုပ်နိုင်ပါက အကွင်းကို အသုံးပြုနိုင်ပါတယ်။

သန္ဓေတားမအင်္ဂါအကွင်းကို သင့်ဓမ္မတာကာလမည်သည့်အချိန်တွင်မဆိုထည့်သွင်းနိုင်ပါတယ်။ သို့သော်လည်း၊ သင့်ဓမ္မတာကာလပထမရက်အတွင်းထည့်သွင်းခြင်းဟာ ချက်ချင်းထိရောက်မှာဖြစ်ပါတယ်။ သင်ဟာ အခြားအချိန်များမှစတင်ရင်တော့၊ ပထမဆုံး ၇ ရက်အတွက် အရန်သန္ဓေတားနည်းလမ်းအသုံးပြုရမှာဖြစ်ပါတယ်။

ဒီသန္ဓေတားနည်းလမ်းကိုအသုံးမပြုခင်မှာ သင့်ရဲ့ ကျန်းမာရေးဝန်ဆောင်မှုပေးသူထံသွားရောက်ပြီး ဆေးစစ်ရပါမယ်။ ပြီးနောက် ဒီ နည်းလမ်းဟာ သင့်အတွက် ကောင်းမွန်တဲ့ နည်းလမ်းဟုတ်၊မဟုတ် ဆုံးဖြတ်ရပါမယ်။ အချို့နိုင်ငံများမှာ သင်ဟာ ဒီသန္ဓေတားနည်းလမ်းကိုဝယ်ယူနိုင်ဖို့ ဆေးစာလိုအပ်ပါတယ်။

မအင်္ဂါအကွင််းထည့်သွင်းခြင်း

စတင်ရန် သင့်လက်များကို ရေ၊ ဆပ်ပြာတို့နှင့် စင်ကြယ်စွာဆေးကြောပါ။ ပြီးနောက်၊ သင့်အတွက် သက်တောင့်သက်သာအဖြစ်ဆုံး အနေအထားကို ရွေးချယ်ပါ၊ ဥပမာ၊ ခြေထောက်တဖက်မြှောက်ပြီး မတ်တပ်ရပ်ခြင်း၊ ဆောင့်ကြောင့်ထိုင်ခြင်း သို့မဟုတ် လှဲအိပ်ခြင်းတို့ဖြစ်ပါတယ်။ အကွင်းကိုထည့်သွင်းရန် ၎င်းကို သင့်လက်မ၊ လက်ညှိးအကြား ဖိချေလိုက်ပါ၊ ပြီးနောက် tampon ကဲ့သို့ထည့်သွင်းပါ။ ၎င်းဟာ သင့်ရဲ့ မအင်္ဂါနံရံအတွင်း ကပ်နေမှာဖြစ်ပါတယ်။ သင် သက်တောင့်သက်သာဖြစ်တယ်ဆိုရင် အနေအထားအတိအကျဟာ သိပ်အရေးပါမှုမရှိပါ။ သင် အကွင်းကိုလှည့်ပြီး ထည့်သွင်းရတဲ့ “လှည့်သွင်း” နည်းလမ်းကိုလည်း စမ်းသုံးနိုင်ပါတယ်။

သားအိမ်ခေါင်းအစွပ် သို့မဟုတ် မအင်္ဂါထည့်အကာအကွယ်ပစ္စည်းများနှင့် မတူပဲ၊ မအင်္ဂါအကွင်း အလုပ်လုပ်ရန် သင့်ရဲ့ သားအိမ်ခေါင်းအပေါက်ကို ဖုံးထားစရာမလိုပါဘူး။ အကွင်းဟာ သက်တောင့်သက်သာမရှိဘူးဆိုရင်၊ သင့်ရဲ့ မအင်္ဂါအတွင်း သက်တောင့်သက်သာဖြစ်သည်အထိ တွန်းထည့်ထားနိုင်ပါတယ်။​

လိင်ဆက်ဆံစဥ်အတွင်း အကွင်းဖယ်ရှားခြင်းဟာ မလိုအပ်သလို အကြံလည်းမပြုပါဘူး။ သို့သော်လည်း၊ သင်ဖယ်ရှားလိုပါက၊ လိင်ဆက်ဆံခြင်း၊ သန့်ရှင်းရေးလုပ်ခြင်း၊ သို့မဟုတ် အခြားအကြောင်းပြချက်များအတွက် ဖယ်ရှားနိုင်ပါတယ်၊ သို့သော်လည်း ၄၈ နာရီအတွင်း ပြန်လည်ထည့်သွင်းတာသေချာပါစေ။

သင်အကွင်းကိုထည့်သွင်းပြီးတာနဲ့၊ သုံးပတ်ကြာထားရှိဖို့ အကြံပြုထားကြပါတယ်။ စတုတ္ထမြောက်အပတ်အစမှာ ၎င်းကိုထုတ်ယူလိုက်ပါ [3]။

မအင်္ဂါထည့်အကွင်းကိုဘယ်လိုဖယ်ရှားမလဲ

မအင်္ဂါထည့်အကွင််းကိုဖယ်ရှားရန်၊ အောက်ပိုင်းအစွန်းကို သင့်လက်ချောင်းဖြင့်ဖိပြီး ဆွဲထုတ်ပါ။ ဘူးနှင့်တခါတည်းပါလာသော သတ္တုအိတ်အတွင်းထည့်ပြီး အမှိုက်အိတ်ထဲစွန့်ပစ်ပါ – အိမ်သာထဲသို့ရေဆွဲချခြင်းမှ ရှောင်ကြဥ်ပါ။ တပတ်လောက်ထားထားပြီးနောက်၊ အကွင်းအသစ်ထည့်သွင်းကာ တလတာကာလကို ပြန်လည်စတင်ပါ။

အကွင််းမရှိတော့သည့်အခါ၊ သင့်ရဲ့ ဓမ္မတာပြန်လာနိုင်ပါတယ်။ သင် အကွင်းသစ်ထည့်သွင်းရမည့်အချိန်တွင် သွေးဆင်းနေဆဲ ဖြစ်ပါကလည်း မစိုးရိမ်ပါနှင့်။ ဒီဟာက ပုံမှန်ဖြစ်ပြီး သင့်ရဲ့ ဓမ္မတာဟာ မကြာခင်မှာ ရပ်သွားမှာဖြစ်ပါတယ်။

ကျွန်ုပ်၏ မအင်္ဂါထည့်အကွင်းကို ဖယ်ရှားရန်မေ့ပါက ဘာဖြစ်မလဲ?

သုံးပတ်ကြာပြီးနောက် သင့်ရဲ့ မအင်္ဂါထည့်အကွင်းကို ဖယ်ရှားရန် မေ့ပြီး လေးပတ်မြောက်အထိ ဆက်လက်ထားရှိပါက၊ အခြားအထူးလုပ်ဆောင်စရာများမလိုအပ်ပါ။ အကွင်းကိုဖယ်ရှားပြီးနောက် ပုံမှန်အတိုင်း အကွင်းအသစ်ကို ထည့်သွင်းပါ။

သန္ဓေတားမအင်္ဂါထည့်အကွင်းဟာ ရက်ပိုခုနှစ်ရက်ထက်ပိုပြီး ရှိနေပါက၊ မြန်နိုင်သမျှ မြန်မြန် ထုတ်ယူပါ၊ ပြီးနောက် အကွင်းသစ်ကို ချက်ချင်းထည့်သွင်းပါ။ ထို့နောက်တွင် ကွန်ဒုံးကဲ့သို့ အရန်သန္ဓေတားနည်းလမ်းကို နောက်ထပ်ခုနှစ်ရက်အတွင်းအသုံးပြုပါ။

အကွင်းရှိနေစဥ်အတွင်း သင်ဟာ လိင်ဆက်ဆံနိုင်၊ tampon အသုံးပြုနိုင်ပါတယ်။ သင့်လက်တွဲဖော်ဟာ လိင်ဆက်ဆံစဥ်အတွင်း အကွင်းကို ခံစားမိနိုင်သော်လည်း၊ ၎င်းဟာ သူ့ကို မည်သည့်ပုံစံနှင့်မျှ​ ထိခိုက်စေမှာမဟုတ်ပါဘူး [4]။

ကျွန်ုပ်၏ မအင်္ဂါထည့်အကွင််းကဘာကြောင့် ထွက်ထွက်ကျနေတာလဲ?

သင့်အကွင်းရှိနေမှုကို လက်ချောင်းများဖြင့် စစ်ဆေးနိုင်ပါတယ်။ သင့်အကွင်းထွက်ကျလာပါက၊ သင်မှန်ကန်စွာမထည့်သွင်းထားခြင်းကြောင့် ဖြစ်နိုင်ချေများပါတယ်။ အကွင်းထွက်ကျခဲ့ရင်၊ သန့်ရှင်းသော ရေဖြင့်ဆေးကြောပြီး ချက်ချင်းပြန်လည်ထည့်သွင်းပါ။

သင့်အကွင််းဟာ သင့်မအင်္ဂါအတွင်းရှိနေသော်လည်း ၎င်းကို မခံစားရပါက၊ သင့်ကျန်းမာရေးဝန်ဆောင်မှုပေးသူထံသွားရောက်ပြီး အကူအညီတောင်းခံပါ။ သန္ဓေတားမအင်္ဂါထည့်အကွင်း သင့်မအင်္ဂါအတွင်းတွင် ပျောက်ဆုံးနိုင်ချေလုံးဝမရှိပါ။