តើអ្វីខ្លះជាវិធីសាស្រ្តពន្យារកំណើតដោយរាប់ថ្ងៃរួមភេទ?
វិធីសាស្ត្រពន្យារកំណើតដោយការរាប់ថ្ងៃរួមភេទ ដែលគេស្គាល់ផងដែរថាជា «ការធ្វើផែនការគ្រួសារតាមបែបធម្មជាតិ» «វិធីសាស្ត្រតាមដានវដ្តរដូវ» ឬ «ការតមការរួមភេទតាមថ្ងៃ» គឺជាទម្រង់នៃការពន្យាកំណើតដែលតម្រូវឲ្យអ្នកតាមដានវដ្តរដូវរបស់អ្នកដើម្បីកំណត់ថ្ងៃដែលអ្នកអាចមានផ្ទៃពោះបាន។ អ្នកមិនចាំបាច់ប្រើឧបករណ៍ ឬថ្នាំណាមួយឡើយ។ មានវិធីសាស្រ្តរាប់ថ្ងៃរួមភេទ ដែលអាចប្រើប្រាស់តែមួយគត់ ឬប្រើប្រាស់រួមគ្នាលើសពីមួយ ដើម្បីតាមដានការចាប់ផ្តើម និងចុងបញ្ចប់នៃរយៈពេលមានកូនរបស់អ្នក (1)។
វិធីសាស្ត្ររាប់ថ្ងៃរួមភេទ អាចជួយអ្នកក្នុងការទស្សន៍ទាយនៅពេលដែលអ្នកទំនងជាមានផ្ទៃពោះ (ថ្ងៃដែលអាចមានកូន) ហើយវិធីសាស្រ្តនេះពឹងផ្អែកលើការជៀសវាងការរួមភេទតាមទ្វារមាសដោយមិនបានការពារនៅចំថ្ងៃនោះ។ វិធីសាស្រ្តទាំងនេះតម្រូវឲ្យអ្នកដឹងពីការផ្លាស់ប្តូរនៅក្នុងខ្លួនរបស់អ្នក ឬការតាមដានថ្ងៃជាក់លាក់នៃវិធីសាស្ត្រដែលអ្នកបានជ្រើសរើស (2)។
អ្នកអាចមានផ្ទៃពោះនៅពេលអ្នករួមភេទនៅថ្ងៃដែលអ្នកអាចមានកូនបានក្នុងវដ្តរដូវ ដែលជារឿយៗអាចមានរយៈពេលពីប្រាំបីទៅប្រាំបួនថ្ងៃ។ ក្នុងអំឡុងពេលដែលអ្នកអាចមានកូនបាន អូវ៊ុលត្រូវបានបញ្ចេញចេញពីអូវែរ (ដំណើរការនេះគេហៅថាការបញ្ចេញអូវ៊ុល) ហើយវាអាចរស់នៅបានរហូតដល់ ២៤ ម៉ោង។ ទោះជាយ៉ាងណាក៏ដោយ មេជីវិតឈ្មោលអាចរស់នៅក្នុងប្រព័ន្ធបន្តពូជរបស់អ្នករហូតដល់ប្រាំពីរថ្ងៃ។ ប្រសិនបើមេជីវិតឈ្មោលមានវត្តមាននៅពេលដែលអូវ៊ុលត្រូវបានបញ្ចេញ មេជីវិតឈ្មោល និងអូវ៊ុលអាចបង្កកំណើតបាន ដែលអាចបណ្តាលឲ្យមានគភ៌។ វាជារឿងសំខាន់ដែលអ្នកត្រូវដឹងថា ប្រសិនបើអ្នករួមភេទដោយមិនបានការពារត្រឹមប្រាំពីរថ្ងៃមុនពេលបញ្ចេញអូវ៊ុល វានៅតែអាចនាំឲ្យអ្នកមានផ្ទៃពោះបាន (3)។
វិធីសាស្រ្តដែលផ្អែកលើការរាប់ថ្ងៃដើម្បីរួមភេទគឺសាមញ្ញនោះទេ។ អ្នកត្រូវតាមដានវដ្តរដូវរបស់អ្នក ហើយមិនគួររួមភេទនៅថ្ងៃដែលអ្នកអាចមានផ្ទៃពោះបាននោះទេ។ ប្រសិនបើអ្នករួមភេទនៅថ្ងៃទាំងនោះ សូមប្រើវិធីសស្រ្តពន្យារកំណើតជំនួស ដូចជាស្រោមអនាម័យ ខាងក្រៅ ឬខាងក្នុង ឬ សន្ទះពាំងមាត់ស្បូន
តើអ្វីខ្លះជាប្រភេទខុសៗគ្នានៃវិធីសាស្រ្តរាប់ថ្ងៃរួមភេទ?
មានវិធីសាស្រ្តជាច្រើនដែលអ្នកអាចប្រើដើម្បីតាមដានភាពមានកូនរបស់អ្នក និងកំណត់ថ្ងៃនៅក្នុងវដ្តរដូវរបស់អ្នកដែលអ្នកអាចមានផ្ទៃពោះបាន។ អ្នកនឹងត្រូវសង្កេតមើលការផ្លាស់ប្តូរនៅក្នុងខ្លួនរបស់អ្នក ដើម្បីគណនាថាអ្នកកំពុងស្ថិតនៅក្នុងរយៈពេលណាមួយនៅក្នុងវដ្តរដូវរបស់អ្នក។ នេះនឹងត្រូវការការខិតខំប្រឹងប្រែង និងការប្តេជ្ញាចិត្តជាខ្លាំង។ មុនពេលអ្នកជ្រើសរើសវិធីសាស្ត្រនេះ ត្រូវប្រាកដថាអ្នកយល់ពីអ្វីដែលអ្នកត្រូវធ្វើ។ ត្រៀមខ្លួនដើម្បីតមការរួមភេទរយៈពេលប្រាំពីរថ្ងៃជារៀងរាល់ខែ ឬប្រើវិធីសាស្រ្តពន្យារកំណើតនៅថ្ងៃដែលមិនអាចរួមភេទបាន។
វិធីសាស្ត្រផ្អែកលើការរាប់ថ្ងៃរួមភេទ ត្រូវបានចាត់ថ្នាក់ទៅជាការតាមដានប្រតិទិន និងវិធីសាស្ត្រតាមដានរោគសញ្ញា (4)។
វិធីសាស្រ្តរាប់់ថ្ងៃរួមភេទដោយអាស្រ័យលើប្រតិទិន?
វិធីសាស្ត្រតាមដានប្រតិទិនតម្រូវឲ្យអ្នកតាមដានវដ្តរដូវរបស់អ្នក និងកំណត់ថ្ងៃចាប់ផ្តើម និងថ្ងៃចុងបញ្ចប់នៃថ្ងៃដែលអ្នកអាចមានកូនបាន។
វិធីសាស្ត្រតាមដានប្រតិទិន៖
វិធីសាស្រ្តតាមដានរបត់វដ្តរដូវតាមប្រតិទិន។ វិធីសាស្ត្រតាមដានវដ្តរដូវតាមប្រតិទិនជួយទស្សន៍ទាយថ្ងៃដែលអ្នកអាចមានកូនបាន ដោយសិក្សាពីវដ្តរដូវរបស់អ្នករយៈពេលជាច្រើនខែ។ វដ្តរដូវមួយចាប់ផ្តើមនៅថ្ងៃដំបូងនៃការមករដូវរបស់អ្នក ហើយនេះគឺជាពេលដែលអ្នកចាប់ផ្តើមរាប់បាន។ ដើម្បីកំណត់ថ្ងៃមានកូនរបស់អ្នក អ្នកគួរតែកត់ត្រាយ៉ាងហោចណាស់ ៦ ទៅ ១២ វដ្តរដូវ មុនពេលប្រើប្រាស់វិធីសាស្រ្តនេះ បន្ទាប់មករាប់ថ្ងៃនៅចន្លោះថ្ងៃដំបូងនៃវដ្តរដូវនីមួយៗ។
ដើម្បីកំណត់ការចាប់ផ្តើមនៃបង្អួចដែលអ្នកអាចមានកូនបាន អ្នកត្រូវដក ២០ ថ្ងៃពីរយៈពេលនៃវដ្តរដូវដែលខ្លីបំផុតរបស់អ្នក។ ដើម្បីកំណត់ថ្ងៃចុងបញ្ចប់នៃបង្អួចរយៈពេលដែលអ្នកអាចមានកូនបាន ដក ១០ ថ្ងៃពីរយៈពេលនៃវដ្តដែលវែងបំផុតរបស់អ្នក។ អ្នកគួរជៀសវាងការរួមភេទដោយមិនបានការពារក្នុងអំឡុងពេលថ្ងៃដែលអ្នកមានកូនបាន (5)។
អ្នកអាចប្រើឧបករណ៍ជំនួយការចងចាំ ដូចជាកម្មវិធីទូរស័ព្ទតាមដានរដូវ ឬកង់វដ្តរដូវ ឬគ្រាន់តែកំណត់ចំណាំថ្ងៃមករដូវរបស់អ្នកនៅលើប្រតិទិនរបស់អ្នកតាមធម្មតាក៏បានដែរ។
ប្រសិនបើអ្នករាប់ឃើញថ្ងៃរវាងវដ្តរដូវរបស់អ្នកតិចជាង ២៧ ថ្ងៃ វិធីសាស្ត្រនេះមិនត្រូវបានណែនាំសម្រាប់អ្នកទេ។ វាអាចប្រើបានតែចំពោះស្ត្រីដែលមករដូវទៀងទាត់តែប៉ុណ្ណោះ។
វិធីសាស្រ្តរាប់ថ្ងៃតាមវដ្តរដូវស្តង់ដារ (SDM) ។ វិធីសាស្រ្តនេះត្រូវបានណែនាំសម្រាប់ស្ត្រីដែលមានវដ្តរដូវចន្លោះពី ២៦ ទៅ ៣២ ថ្ងៃ។ អ្នកនឹងត្រូវតាមដានថ្ងៃនៃវដ្រដូវតរបស់អ្នក និងជៀសវាងការរួមភេទដោយមិនបានការពារចាប់ពីថ្ងៃទី ៨ ដល់ថ្ងៃទី ១៩ នៃវដ្តររដូវបស់អ្នក។ ស្ត្រីខ្លះប្រើអង្កាំដែលមានពណ៌ (ឧ. CycleBeads) ដើម្បីតាមដានវដ្តរដូវរបស់ពួកគេ ដោយអង្កាំពណ៌សបង្ហាញពីថ្ងៃដើម្បីជៀសវាងការរួមភេទដោយមិនមានការការពារ (ថ្ងៃដែលអាចមានកូន) ឬប្រើវិធីសាស្ត្រពន្យារកំណើតណាមួយ (6)។
របៀបក្នុងការតាមដានវដ្តរដូវរបស់អ្នកដោយប្រើប្រាស់អង្កាំ
វិធីសាស្រ្តតាមដានរោគសញ្ញា
វិធីសាស្ត្រតាមដានរោគសញ្ញា ផ្តោតសំខាន់លើការសង្កេតទៅលើសញ្ញានៃការមានកូន ដូចជាមានការបញ្ចេញទឹករំអិលពីមាត់ស្បូន និងបម្លាស់ប្តូរសីតុណ្ហភាពរាងកាយ។ បន្ទាប់មក អ្នកចាំបាច់ត្រូវជៀសវាងការរួមភេទនៅថ្ងៃដែលរោគសញ្ញាទាំងនេះស្តែងចេញមក វិធីសាស្រ្តប្រភេទនេះមានដូចជា
– វិធីសាស្រ្តពីរថ្ងៃ (TDM) ។ អ្នកនឹងពិនិត្យសរបស់ទ្វារមាសជារៀងរាល់ថ្ងៃ ដើម្បីកំណត់ថាតើអ្នកមានទឹករំអិលមាត់ស្បូនឬអត់។ ដើម្បីជៀសវាងការមានផ្ទៃពោះ អ្នកត្រូវតែជៀសវាងការរួមភេទដោយមិនបានការពារនៅថ្ងៃដែលអ្នកឃើញមានទឹករំអិលមាត់ស្បូន និងថ្ងៃបន្ទាប់ពីនោះ។ ប្រសិនបើអ្នកសម្រេចចិត្តរួមភេទ អ្នកគួរតែប្រើវិធីពន្យារកំណើតផ្សេងទៀត ដូចជាស្រោមអនាម័យ រហូតដល់លែងមានធ្លាក់ទឹករំអិលមាត់ស្បូន។
– វិធីសាស្រ្តតាមដានសីតុណ្ហភាពរាងកាយ (BBT) ។ វិធីសាស្រ្តនេះតម្រូវឲ្យអ្នកកំណត់ចំណាំមើលសីតុណ្ហភាពរាងកាយរបស់ស្ត្រីដើម្បីឲ្យដឹងថានាងទំនងជាអាចមានកូនបាននៅពេលណា។ បន្ទាប់ពីការបញ្ចេញអូវ៊ុល សីតុណ្ហភាពរាងកាយធម្មតារបស់ស្ត្រីកើនឡើងបន្តិចបន្តួច។ អ្នកទំនងជាមិនមានគភ៌ក្នុងកំឡុងពេលបីថ្ងៃបន្ទាប់ពីការកើនឡើងនៃសីតុណ្ហភាពរាងកាយដល់ការចាប់ផ្តើមនៃវដ្តរដូវបន្ទាប់របស់អ្នក។ សម្រាប់វិធីសាស្ត្រនេះ អ្នកត្រូវតាមដានសីតុណ្ហភាពរាងកាយរបស់អ្នកជារៀងរាល់ព្រឹក ដើម្បីកំណត់ថាតើអ្នកកំពុងបញ្ចេញអូវ៊ុលឬអត់។ អ្នកនឹងវាស់សីតុណ្ហភាពរាងកាយរបស់អ្នករាល់ព្រឹក មុនពេលអ្នកក្រោកឈរ ហើយកត់ត្រាវានៅក្នុងកំណត់ហេតុរបស់អ្នក។ វិធីសាស្ត្រនេះមានប្រសិទ្ធភាពបំផុតនៅពេលប្រើរួមផ្សំជាមួយវិធីសាស្ត្រតាមដានរោគសញ្ញា ឬវិធីសាស្ត្ររាប់ថ្ងៃតាមវដ្តរដូវស្តង់ដារ (1)។
– វិធីសាស្រ្តតាមដានសញ្ញាបញ្ចេញអូវ៊ុល។ វិធីសាស្រ្តនេះត្រូវបានគេស្គាល់ផងដែរថាជាការមើលទឹករំអិលមាត់ស្បូន ឬវិធីសាស្រ្ត Billings វាពាក់ព័ន្ធនឹងការសង្កេតទឹករំអិលមាត់ស្បូនដើម្បីកំណត់ការចាប់ផ្តើម និងចុងបញ្ចប់នៃបង្អួចមានកូនរបស់ស្ត្រី។ ជាធម្មតា ទឹករំអិលមាត់ស្បូនរបស់ស្ត្រីមានសភាពខាប់ និងស្អិត ប៉ុន្តែនៅពេលដែលអ្នកបញ្ចេញអូវ៊ុល វាមានសភាពរាវ និងរលោង។ អ្នកត្រូវពិនិត្យទឹករំអិលមាត់ស្បូនជារៀងរាល់ថ្ងៃ។ អ្នកអាចមានផ្ទៃពោះចាប់ពីថ្ងៃចាប់ផ្តើមនៃការបញ្ចេញទឹករំអិលមាត់ស្បូនរបស់អ្នក (នៅពេលដែលទឹករំអិលមាត់ស្បូនរបស់អ្នកមានភាពថ្លា រលោង អន្តាយ និងសើម) រហូតដល់បីថ្ងៃបន្ទាប់ពីលែងមានទឹករំអិលលក្ខណៈបែបនេះ។ ការប្រើវិធីសាស្រ្តនេះរួមផ្សំជាមួយនឹងវិធីសាស្ត្រតាមដានសីតុណ្ហភាពរាងកាយ ឬវិធីសាស្ត្ររាប់ថ្ងៃតាមវដ្តរដូវស្តង់ដារនឹងបង្កើនប្រសិទ្ធភាពរបស់វិធីសាស្រ្តនេះផងដែរ (5) ។
– វិធីសាស្រ្តតាមដានរោគសញ្ញា និង សីតុណ្ហភាព។ វិធីសាស្រ្តនេះរួមបញ្ចូលគ្នានូវវិធីសាស្ត្ររាប់ថ្ងៃរួមភេទ ជាច្រើន ដើម្បីទស្សន៍ទាយថ្ងៃដែលអ្នកអាចមានផ្ទៃពោះបាន។ រាងកាយរបស់អ្នកអាចបង្ហាញជាសញ្ញាជាច្រើនដែលអាចចង្អុលបញ្ជាក់ថាអ្នកអាចមានផ្ទៃពោះ ហើយវិធីសាស្ត្របូកផ្សំការតាមដានសញ្ញាច្រើនក្នុងពេលតែមួយ។ នេះរាប់បញ្ចូលទាំងការស្ទាបមាត់ស្បូន ការតាមដានសីតុណ្ហភាពរាងកាយ និងការពិនិត្យមើលរំអិលមាត់ស្បូន។ ការប្រើវិធីសាស្រ្តពីរឬច្រើននឹងជួយអ្នកក្នុងការបង្ការការមានគភ៌ឲ្យកាន់តែប្រសើរជាងមុន (7) ។
តើវិធីសាស្រ្តរាប់ថ្ងៃរួមភេទមានប្រសិទ្ធភាពកម្រិតណា?
– វិធីសាស្ត្ររាប់ថ្ងៃរួមភេទ មិនសូវមានប្រសិទ្ធភាពទេ។ ពួកវាមានប្រសិទ្ធភាពល្អបំផុតនៅពេលដែលពួកវាត្រូវអនុវត្តបានយ៉ាងល្អឥតខ្ចោះ (8) ។
– ជាមួយនឹងការប្រើប្រាស់ដ៏ល្អឥតខ្ចោះ វិធីសាស្រ្តនេះមានប្រសិទ្ធភាព ៩៥-៩៩% ។ ជាមួយនឹងការប្រើប្រាស់ធម្មតា វាមានប្រសិទ្ធភាព ៧៦-៨៨% (9) ។
សូមមើលតារាងខាងក្រោមសម្រាប់ព័ត៌មានអំពីរបៀបដែលវិធីសាស្រ្តរាប់ថ្ងៃរួមភេទនីមួយៗអាចមានប្រសិទ្ធភាពបាន។
តើនៅពេលណាដែលការរាប់ថ្ងៃរួមភេទជាជម្រើសពន្យារកំណើតដ៏ល្អសម្រាប់អ្នក?
– ប្រសិនបើអ្នកព្យាយាមយល់ដឹងពីរាងកាយរបស់អ្នកឲ្យកាន់តែច្បាស់។ វិធីសាស្ត្ររាប់ថ្ងៃរួមភេទ គឺជាវិធីសាស្រ្តដ៏ល្អមួយដើម្បីស្វែងកំណត់របត់ និង វដ្តនៃរាងកាយរបស់អ្នក។ អ្នកនឹងអាចចាប់អារម្មណ៍ឃើញការផ្លាស់ប្តូរណាមួយ និងយល់កាន់តែច្បាស់អំពីវដ្តរដូវរបស់អ្នក។
– ប្រសិនបើអ្នកមិនព្រួយបារម្ភពីការមានផ្ទៃពោះ។ ប្រសិនបើអ្នកមិនប្រើវិធីសាស្រ្តទាំងនេះបានត្រឹមត្រូវទេ អត្រាបរាជ័យរបស់ពួកវាគឺមានកម្រិតខ្ពស់។ ប្រសិនបើអ្នកមានឆន្ទៈក្នុងការស្វែងយល់ពីវិធីសាស្ត្ររាប់ថ្ងៃរួមភេទ អ្នកនឹងត្រូវបានណែនាំឲ្យប្រើវិធីសាស្ត្របម្រុងទុក ដូចជាស្រោមអនាម័យ ខណៈពេលដែលអ្នកកំពុងសិក្សារបៀបនៃការតាមដានប្រតិទិន និង/ឬរោគសញ្ញារបស់អ្នក។ ប៉ុន្តែប្រសិនបើអ្នកមិនសូវពូកែក្នុងការតាមដានថ្ងៃដែលអាចមានកូន និង ថ្ងៃដែលអត់នោះទេ ការមានគភ៌នឹងក្លាយជាបញ្ហាសម្រាប់អ្នក សូមពិចារណាជ្រើសរើសវិធីសាស្រ្តពន្យារកំណើតផ្សេងទៀត។
– ប្រសិនបើអ្នកមានវិន័យយ៉ាងល្អក្នុងការគ្រប់គ្រងខ្លួនឯង។ ទាំងអ្នក និងដៃគូរបស់អ្នកត្រូវយល់ព្រមក្នុងការអនុវត្តតាមវិធីសាស្រ្តនេះ។ អ្នកក៏ត្រូវស្គាល់ពីរាងកាយរបស់អ្នកឲ្យបានច្បាស់ផងដែរ។
– ប្រសិនបើអ្នកយល់ព្រមជាមួយនឹងការតមការរួមភេទក្នុងរយៈពេលមានកំណត់មួយក្នុងវដ្តរបស់អ្នក ឬប្រើវិធីសាស្រ្តពន្យារកំណើតមួយផ្សេងទៀតក្នុងអំឡុងពេលដែលអ្នកអាចមានផ្ទៃពោះបាន។ ជាមួយនឹងវិធីសាស្រ្តនេះ អ្នកនឹងត្រូវតាមដានថ្ងៃដែលអ្នកអាចមានផ្ទៃពោះបានជារៀងរាល់ខែ។ នៅថ្ងៃនោះ អ្នកនឹងតម្រូវឲ្យជៀសវាងការរួមភេទ ឬប្រើវិធីពន្យារកំណើតដែលគា្មនអរម៉ូន។ ប្រសិនបើអ្នកមិនអាចធ្វើការតមការរួមភេទបានប៉ុន្មានថ្ងៃ ឬមិនអាចប្រើវិធីពន្យារកំណើតផ្សេងទៀតបាន សូមកុំប្រើវិធីសាស្ត្ររាប់ថ្ងៃរួមភេទអី។
– ប្រសិនបើអ្នកចង់បានវិធីសាស្រ្តដែលមិនមានផលប៉ះពាល់ទាល់តែសោះ។ វិធីសាស្រ្តនេះមិនបញ្ចូលអរម៉ូនបន្ថែមដល់រាងកាយរបស់អ្នកទេ។ មនុស្សជាច្រើនដែលប្រើវិធីនេះចង់បានអ្វីមួយដែលមិនប៉ះពាល់ដល់រាងកាយរបស់ពួកគេ។
