ការតមការរួមភេទ

ការតមការរួមភេទ ឬត្រូវបានគេស្គាល់ថាជាវិធីសាស្ត្រ «មិននៅពេលនេះទេ» គឺជាការពន្យារ ឬជៀសវាងសកម្មភាពផ្លូវភេទទាំងអស់ ឬសកម្មភាពផ្លូវភេទមួយចំនួន។ ប្រសិនបើអ្នកមិនរួមភេទតាមទ្វារមាសទេ អ្នកនឹងមិនអាចមានផ្ទៃពោះបានទេ។ ក្នុងន័យទូលំទូលាយ ពាក្យថា តមការរួមភេទ អាចមានន័យផ្សេងគ្នាចំពោះបុគ្គលផ្សេងៗគ្នា។

ប្រសិនបើអ្នកកំពុងពិចារណាការតមការរួមភេទក្នុងនាមជាវិធីសាស្រ្តពន្យារកំណើត វាត្រូវបានកំណត់ថាជាការជៀសវាងប្រភេទនៃការរួមភេទណាដែល​អាចនាំឲ្យមានការបញ្ចេញទឹកកាមចូលទៅក្នុងទ្វារមាស។ ទោះជាយ៉ាងណាក៏ដោយ និយមន័យនេះទទួលស្គាល់ថា ជម្ងឺកាមរោគ (STIs) មួយចំនួនអាចចម្លងបានតាមរយៈការប៉ះពាល់ផ្ទាល់ទៅលើស្បែក។

ការតមការរួមភេទ​បឋម​ត្រូវ​បាន​អនុវត្ត​នៅ​ពេល​អ្នក​ដែល​មិន​ធ្លាប់​មាន​សកម្មភាព​ផ្លូវ​ភេទទាល់តែសោះ សម្រេចចិត្ត​ពន្យារ​ការធ្វើសកម្មភាព​ផ្លូវ​ភេទ​ខ្លះ ឬ​ទាំង​ស្រុងតែម្តង។

ការតមការរួមភេទបន្ទាប់បន្សំ​ត្រូវ​បាន​អនុវត្ត​នៅ​ពេល​នរណា​ម្នាក់​ដែល​ធ្លាប់​មាន​សកម្មភាព​ផ្លូវ​ភេទ​ពី​រួចមកហើយ ​សម្រេច​ចិត្ត​ពន្យារ​ ឬ ជៀសវាងសកម្មភាពផ្លូវ​ភេទ​ទាំងអស់ ឬ​មួយ​ចំនួន។

ការតមការរួមភេទដែលមានកាលកំណត់ ត្រូវបានកំណត់ថាជាមនុស្សដែលសកម្មខាងផ្លូវភេទ ហើយសម្រេចចិត្តមិនរួមភេទតាមទ្វារមាសជាមួយនឹងលិង្គ អំឡុងពេលថ្ងៃដែលអាចមានកូនបានក្នុងវដ្តរដូវ (1)។

មនុស្ស​ម្នាក់​អាច​ជ្រើសរើស​តមការរួមភេទ​តាម​ទ្វារមាស​តែ​មួយប៉ុណ្ណោះ ប៉ុន្តែ​នៅតែមានសកម្មភាព​​រួមភេទ​ផ្សេងទៀត​។ ការអនុវត្ត​ទម្រង់​សកម្មភាព​ផ្លូវភេទ​ផ្សេងទៀត​ទាំងអស់នេះ​ត្រូវ​បាន​កំណត់​ដោយ Planned Parenthood ថាជាការរួមភេទខាងក្រៅ។

តើការតមការរួមភេទមានដំណើរការដូចម្តេច?

ប្រសិនបើអ្នកមិនរួមភេទតាមទ្វារមាសទេ អ្នកនឹងមិនអាចមានផ្ទៃពោះបានទេ។ វិធីសាស្រ្ត​នេះ​ជា​ការ​សម្រេច​ចិត្ត​ដោយ​ចេតនា​ និង ដោយសតិបញ្ញា ថានឹងមិន​មាន​ការ​រួម​ភេទ​តាម​ទ្វារមាសទេ។ វាគឺជាការសម្រេចចិត្តមួយដែលអ្នកនឹងត្រូវចងចាំជារៀងរាល់ថ្ងៃ។

ដើម្បី​ប្រកាន់ខ្ជាប់​នូវ​វិធីសាស្ត្រ​នេះ អ្នក​ត្រូវតែ​រំលឹក​ខ្លួនឯង​អំពីមូលហេតុដែល​អ្នក​ជ្រើសរើស​មិន​រួមភេទ​តាម​ទ្វារមាស។ វាក៏អាចជួយអ្នកផងដែរប្រសិនបើអ្នកគិតអំពីផលវិបាកដែលអាចកើតមានឡើងនៅពេលអ្នកផ្លាស់ប្តូរគំនិតរបស់អ្នក។ ប្រសិនបើអ្នកសម្រេចចិត្តរួមភេទ អ្នកត្រូវប្រាកដថាអ្នកបានការពារជាមួយនឹងវិធីសាស្រ្តពន្យារកំណើតដ៏មានប្រសិទ្ធភាពមួយផ្សេងទៀត។

តើគេប្រើប្រាស់វិធីសាស្រ្តតមការរួមភេទដូចម្តេច?

ទោះបីជាមិនមែនមានតែវិធីមួយគត់ក្នុងការអនុវត្តការតមការរួមភេទ ខាងក្រោមនេះគឺជាគន្លឹះដែលមានប្រយោជន៍មួយចំនួនដែលនឹងជួយអ្នកឲ្យអនុវត្តការតមការរួមភេទឲ្យកាន់តែមានប្រសិទ្ធភាព៖

– ជៀសវាងការយកខ្លួនអ្នកទៅដាក់ក្នុងស្ថានភាពដែលនឹងធ្វើឲ្យអ្នកពិបាកក្នុងការប្រកាន់ខ្ជាប់នូវការសម្រេចចិត្តរបស់អ្នក។
-​ សូមពិចារណាជៀសវាងការសេពគ្រឿងស្រវឹង និងការប្រើប្រាស់គ្រឿងញៀន ព្រោះវាអាចរំខានដល់ការវិនិច្ឆ័យរបស់អ្នក។
– ស្វែងរកមនុស្សដែលអ្នកអាចនិយាយជាមួយអំពីការសម្រេចចិត្តរបស់អ្នក ហើយពឹងផ្អែកលើពួកគេសម្រាប់ការគាំទ្រ និងជំនួយ។
– និយាយអំពីការសម្រេចចិត្តរបស់អ្នកជាមួយដៃគូរបស់អ្នកឲ្យបានត្រឹមត្រូវមុនពេលអ្នកធ្វើតាមអារម្មណ៍មួយឆាវរបស់អ្នក។
– និយាយឲ្យត្រង់ៗ និងច្បាស់លាស់ជាមួយដៃគូរបស់អ្នកអំពីដែនកំណត់នៃការរួមភេទរបស់អ្នក។
– ស្វែងរកជម្រើសបង្កើ​នភាពស្និទ្ធស្នាលផ្សេងទៀត ដែលអ្នកប្រហែលជាអាចយកមកជំនួសបាន។
-កុំភ្លេចការពារខ្លួនអ្នកពីជម្ងឺកាមរោគ ដែលមិនមែនចាំបាច់តែមានការរួមភេទតាមទ្វារមាសដើម្បីចម្លងនោះទេ។

តើការតមការរួមភេទមានប្រសិទ្ធភាពកម្រិតណា?

នៅពេលដែលការរួមភេទតាមទ្វារមាសត្រូវបានជៀសវាង ការតមអាចមានប្រសិទ្ធភាព 100% ក្នុងការការពារការមានផ្ទៃពោះ។ ប្រសិនបើអ្នកអាចប្រើវិធីសាស្រ្តនេះបានគ្រប់ពេលទាំងអស់ នោះនឹងអាចធានាថាមិនមានផ្ទៃពោះនោះទេ។ ទោះយ៉ាងណាក៏ដោយ វាទាមទារការគ្រប់គ្រងខ្លួនឯង ដូច្នេះហើយ មនុស្សមួយចំនួនប្រហែលជាពិបាកក្នុងការគ្រប់គ្រងអារម្មណ៍ខ្លាំងណាស់។ ប្រសិនបើអ្នកកំពុងប្រើប្រាស់វិធីនេះ និងកំពុងធ្វើសកម្មភាពផ្លូវភេទផ្សេងទៀត ការតមការរួមភេទតាមទ្វារមាសតែមួយគត់ប្រហែលជាមិនអាចការពារជម្ងឺកាមរោគមួយចំនួនបានទេ (2)។

តាមទ្រឹស្តី ទោះបីជាការតមការរួមភេទមានប្រសិទ្ធភាពខ្ពស់ក្នុងការការពារការមានផ្ទៃពោះ មនុស្សភាគច្រើនមិនអាចអនុវត្តវាបានត្រឹមត្រូវនោះទេ។ គួរកត់សម្គាល់ថា មិនមានភស្តុតាងណាមួយបង្ហាញថា កម្មវិធីអប់រំស្តីណែនាំមិនឲ្យរួមភេទដែលបង្រៀនទៅកាន់ក្មេងៗវ័យជំទង់អាចកាត់បន្ថយហានិភ័យនៃការមានផ្ទៃពោះដោយមិនបានគ្រោងទុក និងជម្ងឺកាមរោគបាននោះទេ។ វិធីសាស្រ្តតមការរួមភេទត្រូវបានគេដឹងថាមានប្រសិទ្ធភាពជាងនៅពេលដែលវាត្រូវបានអនុវត្តដោយគូស្វាមីភរិយាដែលមានវ័យចំណាស់ និងមានភាពចាស់ទុំ ហើយមិនសូវមានប្រសិទ្ធភាពនៅពេលដែលមានការប្រើប្រាស់គ្រឿងញៀន និងគ្រឿងស្រវឹងនោះទេ ឬនៅពេលដែលដៃគូនោះមានចំណង់ផ្លូវភេទ​ខ្ពស់(3)។

តើអ្នកគួរពិចារណាប្រើប្រាស់វិធីសាស្រ្តតមការរួមភេទនៅពេលណា?

– ប្រសិនបើសាសនារបស់អ្នកប្រឆាំងនឹងវិធីសាស្រ្តពន្យារកំណើតផ្សេងទៀត។
– ប្រសិនបើអ្នកបានយល់ព្រមជាមួយដៃគូរបស់អ្នកក្នុងការតមរួមភេទដោយហេតុផលសីលធម៌ សាសនា ឬវប្បធម៌។
– ប្រសិនបើអ្នកមិនអាចប្រើវិធីសាស្រ្តពន្យារកំណើតផ្សេងទៀតបាន។