អូសទៅឆ្វេង។ អូសទៅស្តាំ។ ភ្លេចៗខ្លួន ពេលវេលាជាច្រើនបានកន្លងផុតទៅដោយអ្នកបានអូសកាត់រូបភាពរាប់សិប ដើម្បីស្វែងរកអ្នកដែលអ្នកចង់បង្កើតទំនាក់ទំនងជាមួយ។ ដោយមានការទាក់ទងតាមអនឡាញ វាងាយស្រួលណាស់ ដោយអ្វីៗគឺគ្រាន់តែចុចប៉ុន្មានប៊ូតុងនោះទេ។
បើតាមការស្រាវជ្រាវរបស់ Statista ចំនួនអ្នកដែលប្រើប្រាស់ Tinder គឺរំពឹងថានឹងកើនឡើងហួស ៥៧លាននាក់នៅឆ្នាំ២០២១ ហើយអ្នក Millennial (អ្នកដែលកើតពីឆ្នាំ១៩៨១ ដល់១៩៩៦) គឺជាអ្នកប្រើប្រាស់ច្រើនជាងគេនៅទូទាំងពិភពលោក។ ទោះជាយ៉ាងណាក៏ដោយ Tinder មិនមែនជា App ទាក់ទងស្នេហាតាមអនឡាញតែមួយនោះទេ។ មាន App ជាច្រើនទៀត ដែលមួយៗគឺសុទ្ធតែព្យាយាមទាក់ទាញចំណាប់អារម្មណ៍អ្នកប្រើ ដោយសន្យាថានឹងជួយស្វែងរក «គូព្រេង»។
ប៉ុន្តែសម្រាប់មនុស្សជាច្រើន ការទំនាក់ទំនងតាមអនឡាញ គឺមិនសូវជាដើម្បីស្វែងរកមនុស្សម្នាក់ដើម្បីមករៀបការជាមួយទេ តែគឺដើម្បីស្វែងរកអ្នកមកចូលរួមសកម្មភាពផ្លូវភេទជាមួយ។ នេះបង្កើតឲ្យមានវប្បធម៌នៃការរួមភេទដោយមិនមានទំនាក់ទំនងស្នេហា។
វប្បធម៌នៃការរួមភេទដោយមិនមានទំនាក់ទំនងស្នេហា គឺសំដៅទៅលើការទទួលយកការជួបដើម្បីធ្វើការរួមភេទដោយមិនមានទំនាក់ទំនងស្នេហា ដែលនេះរួមមាន one-night-stand (ការរួមភេទជាមួយអ្នកដែលមិនស្គាល់គ្នាតែមួយយប់) និងការរួមភេទដោយមិនមានការរំពឹងថានឹងមានបង្កើតជាទំនាក់ទំនងជាប់លាប់។ ប៉ុន្តែសកម្មភាពបែបនេះមិនត្រូវបានទទួលយកដោយមហាជនទាំងអស់នោះទេ ដោយវប្បធម៌ខ្លះនៅតែគិតថា វាជារឿងមិនគួរធ្វើ ជាពិសេសវប្បធម៌ដែលមិនទទួលយកការរួមភេទមុនពេលរៀបការ និងធ្វើការបន្ទោសទៅលើស្រ្តីដែលបានចូលរួមសកម្មភាពផ្លូវភេទ។ នេះជាទូទៅគឺបណ្តាលមកពីបិតាធិបតេយ្យ និងការបន្ទាបតម្លៃមនុស្សស្រី។
ទោះជាមានទំនាស់បែបនេះក៏ដោយ ការអនុវត្តបែបនេះគឺនៅតែមាន ប៉ុន្តែការរួមភេទដោយមិនមានទំនាក់ទំនងស្នេហា និងវប្បធម៌នៃការរួមភេទដោយមិនមានទំនាក់ទំនងស្នេហា គឺលើសពីការចំណាយពេលសប្បាយមួយយប់ក្នុងរង្វង់ដៃរបស់អ្នកដែលមិនស្គាល់គ្នា។ មានហានិភ័យដែលអាចប្រឈម ហើយមួយក្នុងចំណោមនោះគឺការរំលោភ បំពាន។ បើតាមស្ថិតិរបស់ National Library of Medicine អត្រានៃការរំលោភក្នុងករណីជួបដើម្បីបង្កើតទំនាក់ទំនងស្នេហា (dating) គឺមានពី១៣%ទៅ២៧%ក្នុងចំណោមស្រ្តីចន្លោះអាយុរៀនសកលវិទ្យាល័យ។
នេះជាតួលេខដែលគួរឲ្យបារម្ភមួយ។
មានអត្ថបទ និងវីដេអូជាច្រើនដែលបង្ហាញ និងឲ្យយោបល់ផ្សេងៗទៅស្រ្តីដើម្បីជៀសវាងការរំលោភពេលទៅជួបដៃគូ ប៉ុន្តែទំនួលខុសត្រូវក្នុងការជៀសវាងការរំលោភមិនគួរធ្លាក់ទៅលើស្រ្តីនោះទេ ព្រោះបើអ្នករំលោភមិនធ្វើការរំលោភ ក៏មិនមានករណីរំលោភកើតមានឡើងដែរ។ នេះមានន័យថា ទំនួលខុសត្រូវគឺស្ថិតនៅលើអ្នកប្រព្រឹត្ត ដែលក្នុងករណីភាគច្រើន គឺជាមនុស្សប្រុស។
នេះហើយបានជាការព្រមព្រៀងគ្នាគឺសំខាន់ណាស់ដែលមនុស្សទាំងឡាយគួរដឹង។ ការព្រមព្រៀងគឺលើសពីការមិននិយាយថា «ទេ»។ វាគឺជាការឆ្លើយថា «យល់ព្រម» ដោយស្មគ្រចិត្ត និងមានការរំភើប! វាគឺជាការឆ្លើយយល់ព្រមដោយស្ថិតក្រោមឥទ្ធិពលនៃសារធាតុណាមួយ ឬឆ្លើយថាយល់ព្រមដោយមិនមានការភ័យខ្លាច។
នៅពេលដែលចូលរួមសកម្មភាពផ្លូវភេទ បើទោះជាជាមួយដៃគូរយៈពេលយូរ ឬអ្នកមិនស្គាល់គ្នាដែលទើបនឹងជួបនៅលើ app ក៏ដោយ អ្នកត្រូវតែសុំការព្រមព្រៀងរាល់ពេល និងរាល់សកម្មភាព។ ប្រសិនបើមិនមានការយល់ព្រមដោយស្មគ្រចិត្តនោះទេ សកម្មភាពផ្លូវភេទនោះនឹងក្លាយជាការរំលោភបំពាន។
ទោះជាយ៉ាងណាក៏ដោយ មនុស្សមួយចំនួនមិនបានគិតថា ការសុំការព្រមព្រៀងគឺរួមបញ្ចូលទាំងការប្រាប់ពីប្រវត្តិសុខភាពផ្លូវភេទរបស់អ្នក មានន័យថា តើអ្នកមានជំងឺកាមរោគដែរឬទេ។ ប្រសិនបើដៃគូរបស់អ្នកយល់ព្រមចូលរួមសកម្មភាពផ្លូវភេទជាមួយអ្នក ដោយមិនដឹងពីហានិភ័យនោះទេ វាមិនមែនជាការព្រមព្រៀងពេញលេញដោយមានព័ត៌មានក្នុងដៃនោះទេ។ នៅប្រទេសជាច្រើន វាគឺជាអំពើខុសច្បាប់ទៀត។ ប្រសិនបើអ្នកមានជំងឺកាមរោគ អ្នកត្រូវតែប្រាប់ដៃគូរបស់អ្នកដើម្បីឲ្យគេធ្វើការសម្រេចចិត្តដោយមានព័ត៌មានគ្រប់គ្រាន់។
វាគឺជាការនិយាយគ្នាដែលពិបាក ហើយក៏អាចគួរឲ្យខ្លាចដែរ ប៉ុន្តែវាចាំបាច់។ ជំងឺកាមរោគគឺកើតឡើងលើមនុស្សជាច្រើន ហើយវាមិនគួរត្រូវបានចាត់ទុកថាជារឿងអាក្រក់នោះទេ។ ជំងឺកាមរោគជាច្រើនគឺអាចព្យាបាលជាបាន។ ប៉ុន្តែប្រសិនបើអ្នកមិនប្រាប់ដៃគូនោះទេ នោះអ្នកកំពុងតែបង្កើនការឆ្លងដោយចេតនា។ លើសពីនោះទេ ប្រសិនបើអ្នក និងដៃគូរបស់អ្នកបានដឹងមុន នោះអ្នកអាចចាត់ចែងវិធីសាស្រ្តការពារ ដូចជាការប្រើប្រាស់ស្រោមអនាម័យជាដើម។
ទោះជាបែបនេះក៏ដោយ មានករណីខ្លះដែលស្រោមអនាម័យបែក។ ឬអ្នកភ្លេចលេបថ្នាំគ្រាប់ពន្យារកំណើត។ ឬអ្នកមិនប្រើប្រាស់វិធីសាស្រ្តពន្យារកំណើតទាល់តែសោះ។ ប្រសិនបើអ្នកស្ថិតក្នុងទំនាក់ទំនងស្នេហាភេទផ្ទុយគ្នា ការមានផ្ទៃពោះដោយមិនបានគ្រោងទុក អាចកើតឡើងបាន។
តែអ្នកមិនបាច់ភ័យខ្លាចទេ។ ប្រសិនបើអ្នកដឹងថា ស្រោមអនាម័យបានបែក ឬអ្នកភ្លេចប្រើប្រាស់ស្រោមអនាម័យ អ្នកអាចប្រើប្រាស់ថ្នាំគ្រាប់ការពារកំណើតបន្ទាន់។ ថ្នាំគ្រាប់ការពារកំណើតបន្ទាន់ គឺជាថ្នាំការពារការមានផ្ទៃពោះបន្ទាប់ពីការរួមភេទដោយមិនបានការពារ បានដល់ទៅ៥ថ្ងៃ។ ប្រសិទ្ធិភាពរបស់វា គឺដល់ទៅ៩៥% ប៉ុន្តែប្រសិនបើអ្នកចាំកាន់តែយូរ ប្រសិទ្ធិភាពនឹងកាន់តែថយចុះ អ៊ីចឹងអ្នកត្រូវតែលេបកាន់តែឆាប់កាន់តែល្អ។
ថ្នាំគ្រាប់ការពារកំណើតបន្ទាន់ គឺមានសុវត្ថិភាពក្នុងការប្រើ។ អ្នកអាចជួយប្រទះផលរំខានមួយចំនួនដូចជា វិលមុខ រដូវមិនទៀង ឬធ្លាក់ឈាមបន្តិចបន្តួច ប៉ុន្តែផលរំខាននេះនឹងបាត់ទៅវិញឆាប់ៗទេ។ វាមិនជាការដែលគួរឲ្យលើកទឹកចិត្តនោះទេ ប៉ុន្តែអ្នកអាចប្រើប្រាស់ថ្នាំគ្រាប់ការពារកំណើតបន្ទាន់បានច្រើនជាងម្តងក្នុងវដ្តរដូវមួយ តែត្រូវដឹងថា វាអាចនាំឲ្យផលរំខានច្រើនជាងមុនដោយសារតែកម្រិតជាតិអរម៉ូន។ ទោះជាបែបនេះក៏ដោយ មិនមានហានិភ័យសុខភាពអចិន្ត្រៃយ៍នឹងកើតឡើងនោះទេ។
មនុស្សគ្រប់គ្នាដែលមានស្បូន គឺអាចប្រើប្រាស់ថ្នាំគ្រាប់ការពារកំណើតបន្ទាន់បាននៅគ្រប់វ័យ។ អ្នកអាចទិញបានដោយមិនមានវេជ្ជបញ្ជានៅតាមហ្វាម៉ាស៊ីដែលនៅជិតអ្នក។ វាអាចមានមួយ ឬពីរគ្រាប់ អាស្រ័យទៅតាមម៉ាក ប៉ុន្តែវាមានប្រសិទ្ធិភាពដូចគ្នានោះទេ។
ថ្នាំគ្រាប់ការពារកំណើតបន្ទាន់គឺជាវិធីសាស្រ្តពន្យារកំណើតងាយស្រួលមួយសម្រាប់អ្នកដែលមិនមានដៃគូជាប់លាប់ ឬអ្នកដែលធ្វើការរួមភេទដោយមិនមានទំនាក់ទំនងស្នេហា ប៉ុន្តែវាមិនត្រូវបានលើកទឹកចិត្តឲ្យប្រើប្រាស់ជាវិធីសាស្រ្តជាប្រចាំនោះទេ។ ប្រសិនបើអ្នកសកម្មក្នុងការរួមភេទ អ្នកគួរគិតគូរជ្រើសរើសប្រើប្រាស់វិធីសាស្រ្តដូចជា ថ្នាំគ្រាប់ ថ្នាំចាក់ កងក្រោមស្បែក និងកងក្នុងស្បូន។
ត្រូវចាំថា ថ្នាំគ្រាប់ការពារកំណើតបន្ទាន់ត្រូវតែប្រើក្រោយពេលរួមភេទដោយមិនបានការពារ មិនមែនមុននោះទេ។ ហើយថ្នាំគ្រាប់ការពារកំណើតបន្ទាន់មិនអាចការពារពីជំងឺកាមរោគនោះទេ អ៊ីចឹងប្រសិនបើអ្នកមិនច្បាស់ពីស្ថានភាពសុខភាពរបស់ដៃគូ អ្នកត្រូវបានលើកទឹកចិត្តឲ្យប្រើប្រាស់ស្រោមអនាម័យដើម្បីការពារបន្ថែម។
មានការគិតមិនល្អជាច្រើនទៅលើវប្បធម៌នៃការរួមភេទដោយមិនមានទំនាក់ទំនងស្នេហា ជាពិសេសទៅលើស្រ្តី ប៉ុន្តែប្រសិនបើអនុវត្តក្នុងស្ថានភាពសុវត្ថិភាព និងមានការព្រមព្រៀង វាគឺជាវិធីសាស្រ្តមួយក្នុងការអនុវត្តស្វ័យភាពរាងកាយ និងជីវិតផ្លូវភេទ។ មិនមានអ្នកណាម្នាក់ដែលគួរត្រូវបានគេម៉ាកងាយ ឬស្តីបន្ទោសនោះទេ។
នៅពេលដែលអ្នកអូសទៅស្តាំលើកក្រោយ កុំភ្លេចសុំការព្រមព្រៀង ការពារ និងរក្សាសុវត្ថិភាពផង។