• Shey e sure: UID na sure bet. Even your village people sef no sure reach am. Inside 100 people way dey use dis method, 99 people of dem no dey carry belle.
  • E get any wahala: Your belle fit dey do you like say your period wan come, and your period fit heavy.
  • E hard: e no hard at all. Dem go just put am once, e go last like 3 to 5 years.
    E no go protect you against yamayama infections (STIs).



De IUD na small plastic and copper wey be like T wey dem go put inside your Uterus. Once e don dey for there, de copper go change de womb and sperm no go fit enter so e no go turn to belle. IUD dey give 3 to 12 years of confam protection, e depend on de type. If later, to get belle kon dey hungry you, you fit commot the IUD.


Get am and forget am. If you no say you dey always forget to use de medicine/ package wey no go let belle enter, den, de IUD na for you. Once you don put am, you fit leave from 3 to 12 years sef.

No wahala. You no need to worry about medicine or one thing one thing wey you need to buy or something wey lost wey you need to remember.

E dey hide like spirit. Ordinary eye no fit know say you use IUD. (some men say dem fit feel d thing wey be like rope for de IUD, but nobody again fit know say e dey there) No packaging, no lele. Just dey nack dey go, nothing dey shele!

You go dey tanda and your bodi go fine like mammy water. People wey sabi know say if you dey kampe and you get womb, you suppose carry IUD matter for head like sign board. Na true talk o, whether you young, you neva get belle before or you neva born pikin before. E also sure die for women who just born pikin (even if you dey give pikin breast suck).

Belle question: wen you nack once, you go carry belle sharp sharp wen you done commot de IUD. If you know say to get belle no dey hungry after you commot the IUD, den, make sure say you find anoda way take protect yourself.

E easy to get. Shey you go like try dis method? E dey yafunyafun for many countries. Just ask de healthcare people for your area.

How To Use

De first thing to do wen you wan get IUD na to gather liver talk to your healthcare people. Dem go ask you questions and check your bodi well well to take sabi whether IUD go good for you.

You fit use IUD anytime in a month. Some people go like put am wen dem dey do dia period. Anytime wey you wan put am dey ok as long as you sure say you neva carry belle. Sometimes, e go dey make sense make you put am during your period (dat time, your cervix just dey open like goal post) [9].

E common say bodi go dey do you one kain wen you don put de IUD, but e go disappear sharp sharp after you don rest and use medicine. Some women go dey feel like say dem wan faint too. Once you don put the IUD, you go see one small thing we be like rope go dey show small small inside your toto. Dis na so dat you go fit commot am later. (de thing wey be like rope no go hang come down like cloth for your toto o) [7].

Once e don dey there, you go need to dey check de thing wey be like rope sometimes in de year to make sure say e still dey there kampe. Dis na how dem dey take do am [11]:

Wash your hand with soap and water, then sidon or bend down.

Put your finger inside your toto until you don touch your cervix. E go dey kampe like rubber and e go feel like de top of your nose.

See if de thing wey be like rope still dey there. If e still dey there, twale for you! Dat one mean say, your IUD dey kampe. But if say na de strong part of the IUD you touch wen you put your finger inside your toto, den, your healthcare people need to put am well or change am.

No go dey form James Bond kon go draw de thing wey be like rope o! if you draw am, de IUD go shift one time. No talk say we no tell you o.

If bodi dey do you yamayama to check de thing wey be like rope, den let your healthcare people check am for you de month after you don put am and every year after [13].

Side Effects

Everybody dey different. Wetin you go feel fit different from wetin anoda person go feel.

De good part: IUD dey do plenti good thing for the body. Even wen your toto go dey collect prick sef, e go dey go sam sam [5].

E easy to use

E no go cause kasala wen you wan nack

You no need to worry, de protection dey kampe for long

E dey ok even if you dey smoke, you get hypertension or diabetes.

IUDs no dey chage your hormone levels.

You fit use am even if you dey give pikin breast suck

De side wey no pure: Plenti people dey worry say some side for IUD matter no pure. Many women no dey get any wahala with IUD, e dey always fit dem like new cloth, but sometimes, e go take some months [6].

De kain complain wey full area pass:

Your period fit dey come small small or e no go come at all for some time (dis na especially de first few months wey you get your IUD)

Your period go heavy

Your belle or your back fit dey pain you.

Other matter wey you need to look out for:

IUD fit fall come out


IUD fit enter your uterus

If you hold bodi so tay for 3 months and de thing no gree you again, abeg commot am, go find anoda way to take protect yourself. No forget say different ways dey for everybody, no matter where you dey.

*De side wey no pure fit serious for very few women.


We dey here to help you. If dis way no be am, we get anoda way wey you fit use. No forget say: if you talk say na anoda way you wan use, make sure say you protect yourself well wen you dey try find anoda way. E make sense make you use condom.

Shey IUD no go wound my partner?

IUD no suppose wound your partner. You fit don hear say de IUD thing wey be like rope go dey disturb your partner wen una dey nack, but na lie. Many men no go even fit feel de thing sef. Your healthcare people sef fit cut de thing wey be like rope small so dat you go rest. On top dat level sef, de thing wey be like rope go soft well well later later.

Still no dey work: You fit get luck with de way wey dey give estrogen during your period. You fit try de medicine way, de one wey dem dey put on top bodi or de one wey be like ring.

Shey make I dey fear if I dey see shikini shikini blood?

You fit see shikini shikini blood for different methods, e no mean say your blood go finish even though sometimes e go be like say all your blood don finish [5].

What if de way wey my period kon heavy or my belle pain kon worse?

E dey normal with IUDs. Try hold bodi for some month, take ibuprofen de first few days of your period.

E still no dey work? If you like IUD, but de side effect kon be like say your village people sidon on top your matter, e go betta make you find anoda package like de one wey hormone dey or de one wey dem dey put inside bodi [15].

Another way: de one wey dem dey put inside bodi

Wat if to get belle kon dey hungry me?

If to get belle dey hungry you, tell your healthcare people say make dem commot your IUD. Your bodi go sharparly return to normal and you fit start to dey try to get belle [10].

My IUD take im leg waka commot. Shey e fit happen again?

IUD wey dey wear koin koin shoe take cat-walk waka commot fit happen to 2-10% women inside de first year wey dem use am. But e dey happen pass for women:

Wey young pass 20 years

Wey dey get heavy or period wey dey pain
Put IUD immediately after dem born pikin or commot belle wey don reach 2nd-trimester.

If de IUD just do small shakara commot one leg for where e dey, e mean say dem no put am well: e fit be say dem put am too low, den e kon vex waka commot. E fit be say e happen wen dem put am or e fit concern how de woman dey take piss or other matter like fibroid. For women wey dia IUD waka commot, we sure say if dem put anoda IUD e go waka commot too – dey happen 20% sometimes ( and up to 30% sef inside some research works) [5].

Still no dey work? If you like to dey use IUD, but e dey always waka commot, try use anoda one wey no get wahala at all.

Try anoda way: de one wey dem dey put inside bodi

Shey IUD go pain me wen dem dey put am?

IUD pain as dem dey put am dey different from one person to another. You gas gather liver like Voltron because no medicine dey wey no go make am pain you.

You fit try take ibuprofen before dem put de IUD and make sure say your cervix open like wen you dey do your period or you dey ovulate. Even if e still dey pain you, you go know say na investment wey you dey do to take enjoy correct nack wey go totori you and belle no go enter [15].

I wan commot my IUD. Shey I fit commot am by myself?

You fit don hear tori for internet about people wey commot their IUD by theirself. No go try am o! We don warn you. Abi you be doctor? Shooo! See me o? If you want commot your IUD, just respect yourself, waka go back to your healthcare people make dem commot am for you and you fit talk about de things wey you fit do so dat belle no go enter. Or you fit talk if belle dey hungry you [8].
If you sure say you wan carry belle by force by fire, talk to your healthcare people about wetin you fit do to help you prepare.

Still no dey work? If you wan something wey go last and e dey easy to use, de one wey dem dey put inside bodi make sense.

Try anoda way: de one wey dem dey put inside bodi

Shey I fit use dat pad wey dem dey shuk inside toto if I get IUD?

You fit use am, as long as you no go draw de IUD thing wey be like rope. Apart from dat sef, the IUD thing wey be like rope dey inside inside and de pad go dey near the mouth of your toto. (If yawa don gas and you see your IUD thing we be like rope near the pad, abeg, run like say fire dey burn you go see your healthcare people, because e fit be say your IUD do wear canvas stroll commot.) [6]


  • [1] Arrowsmith, et al. (2013). Strategies for improving the acceptability and acceptance of the copper intrauterine device. Cochrane Database of Systematic Reviews. Retrieved from https://www.cochranelibrary.com/es/cdsr/doi/10.1002/14651858.CD008896.pub2/abstract
  • [2] BATESON, D., & McNAMEE, K. (2016). Intrauterine contraception A best practice approach across the reproductive lifespan. Medicine Today. Retrieved from https://www.shinesa.org.au/media/2016/07/Intrauterine-contraception-A-best-practice-approach-Medicine-Today.pdf
  • [3] Dr Marie Marie Stopes International. (2017). Contraception. Retrieved from http://www.mariestopes.org.au/wp-content/uploads/Contraception-brochure-web-200417.pdf
  • [4] FSRH The Faculty of Sexual & Reproductive Healthcare. (Amended 2019). UK MEDICAL ELIGIBILITY CRITERIA. RCOG, London. Retrieved from https://www.fsrh.org/standards-and-guidance/documents/ukmec-2016/
  • [5] FPA the sexual health charity. (2017). Your guide to the IUD: Helping you choose the method of contraception that’s best for you. Retrieved from https://www.fpa.org.uk/sites/default/files/intrauterine-device-iud-your-guide.pdf
  • 6] IFPA Sexuality, Information, Reproductive Health and Rights. (2009). Copper intrauterine devices (IUCD). Dublin. Retrieved from https://www.ifpa.ie/sites/default/files/documents/media/factsheets/iucd.pdf
  • [7] Nelson, A. L., & Massoudi, N. (2016). New developments in intrauterine device use: focus on the US. Retrieved from https://www.dovepress.com/new-developments-in-intrauterine-device-use-focus-on-the-us-peer-reviewed-fulltext-article-OAJC
  • [8] Planned Parenthood. (2020). What are the benefits of IUDs? Retrieved from Planned Parenthood https://www.plannedparenthood.org/learn/birth-control/iud/what-are-the-benefits-of-iuds
  • [9] Pathfinder International. (2008). Intrauterine Devices (IUDs): Trainer’s Guide. Retrieved from http://www2.pathfinder.org/site/DocServer/IUD2E_combined.pdf?docID=11263
  • [10] Reproductive Health Access Project. (2017). IUD Information. Retrieved fromhttps://www.reproductiveaccess.org/wp-content/uploads/2014/06/IUD_facts.pdf
  • [11] Reproductive Health Access Project. (2015). Copper IUD. Retrieved from https://www.reproductiveaccess.org/wp-content/uploads/2014/12/factsheet_iud_copper.pdf
  • [12] Society of Obstetricians and Gynaecologists of Canada. (2016). Canadian Contraception Consensus: Chapter 7 Intrauterine Contraception. JOGC. Retrieved from https://www.jogc.com/article/S1701-2163(15)00024-9/pdf
  • [13] Shefras and Forsythe. (2019). Copper intrauterine device IUD. Oxford University Hospitals NHS Foundation Trust. Retrieved from https://www.ouh.nhs.uk/patient-guide/leaflets/files/43583Pcopper.pdf
  • [14] Sanders, et al. (2018). Bleeding, cramping, and satisfaction among new copper IUD users: A prospective study. PLOS. Retrieved from https://www.ncbi.nlm.nih.gov/pmc/articles/PMC6221252/
  • [15] Tudorache, et al. (2017). Birth Control and Family Planning Using Intrauterine Devices (IUDs). Retrieved from https://www.intechopen.com/books/family-planning/birth-control-and-family-planning-using-intrauterine-devices-iuds-
  • [16] World Health Organization Department of Reproductive Health and Research and Johns Hopkins Bloomberg School of Public Health Center for Communication Programs (2018) Family Planning: A Global Handbook for Providers. Baltimore and Geneva. Retrieved from https://apps.who.int/iris/bitstream/handle/10665/260156/9780999203705-eng.pdf?sequence=1
  • [17] World Health Organization. (2016). Selected practice recommendations for contraceptive use. Geneva. Retrieved from https://apps.who.int/iris/bitstream/handle/10665/252267/9789241565400-eng.pdf?sequence=1

lang Naijá