IUD wey get hormone | Find My Method
  • You fit hide dis one make ordinary eye no see am. Na small plastic wey be like T. Dem go put am inside your uterus(womb) so dat e go produce hormone so that belle no go enter.
  • Shey e sure: IUD na sure bet. Even your village people sef no sure reach am. Inside 100 people way dey use dis method, 99 people of dem no dey carry belle.
  • E get any wahala: Your belle fit dey do you like say your period wan come, your period fit dey do like light wey no dey stable and your period fit come small small.
  • E hard: e no hard at all. Dem go just put am once, e go last like 3 to 5 years; but e depend on de one wey you use.
  • E no dey protect you against yamayama infections(STIs)
  • E no dey work as emergency contraception. If na wetin you dey find, use de IUD wey no get hormone instead.


IUD wey get hormone

De IUD (levonorgestrel intrauterine device) na de way wey get hormone. Na small plastic wey be like T wey dem go put inside the womb. Once e don dey for there, e go make the womb small pas as e be and de cervix go kon thick. Sperm no go fit enter so e no go turn to belle. IUD dey give 3, 4 or 5 years of confam protection (e depend on the type). If later belle kon dey hungry you, you fit commot the IUD.


Get am and forget am. If you no say you dey always forget to use de medicine/ package wey no go let belle enter, den, de IUS na for you. Once you don put am, you fit leave from 3 to 7 years sef.

No wahala. You no need to worry about medicine or one thing one thing wey you need to buy or something wey lost wey you need to remember.

E dey hide like spirit. Ordinary eye no fit know say you use IUS. No packaging, no lele. Just dey nack dey go, nothing dey shele!

You go dey tanda and your bodi go fine like mammy water. Na true talk o, whether you young, you neva get belle before or you never born pikin before.

People wey sabi know say if you dey kampe and you get womb, you suppose carry IUD matter for head like sign board. Na true talk o, whether you young, you never get belle before or you never born pikin before. E also sure die for women wey just born pikin (even if you dey give pikin breast suck).

Belle question: wen you nack once, you go carry belle sharp sharp wen you done remove de IUS. If you know say belle no dey hungry after you commot de IUS, den, make sure say you find anoda way take protect yourself.

E easy to get. Shey you go like try dis method? E dey yafunyafun for many countries. Just ask your local healthcare people.

How To Use

De first thing to do wen you wan get IUS na to gather liver talk to your healthcare people. Dem go ask you questions and dem go check your bodi well well to sabi whether IUS go good for you[8].
You fit use IUS anytime in a month. Some people go like put am wen dem dey do dia period. Anytime wey you wan put am dey ok as long as you sure say you neva carry belle. Sometimes, e go make sense make you put am during your period (dat time, your cervix just dey open like goal post) [6].
E common say bodi go dey do you one kain wen you don put the IUS, but e go disappear sharp sharp after you don rest and use medicine. Some women go dey feel like say dem wan faint too. Once you don put the IUS, you go see say one small thing wey be like rope, e go dey show small small inside your toto. So dat you go fit commot am later. (de thing wey be like rope no go hang come down like cloth for your toto o) [4].

Once e don dey there, you go need to dey check de thing wey be like rope sometimes in de year to make sure say e still dey there kampe. Dis na how dem dey take do am:

Wash your hand with soap and water, den sidon or bend down.

Put your finger inside your toto until you don touch your cervix. E go dey kampe like rubber and dey feel like de top of your nose.
See if de thing wey be like rope still dey there. If e still dey there, twale for you! Dat one mean say, your IUS dey kampe. But if say na de strong part of the IUS you touch wen you put your finger inside your toto, den, your healthcare people need to put am well or change am.

No go dey form James Bond kon go draw de thing wey be like rope o! if you draw am, de IUS go shift one time. No talk say we no tell you o

If bodi dey do you yamayama to check de thing wey be like rope, de let your healthcare people check am for you de month after you don put am and every year after dat one.

Side Effects

Everybody dey different. Wetin you go feel fit different from wetin anoda person go feel.

De good part: IUD dey do plenti good thing for de body. Even wen your toto dey collect prick sef, e go dey go sam sam [3]

E easy to use
E no go cause kasala wen you wan nack
You no need to worry, de protection dey kampe for long
E dey ok even if you dey smoke, you get hypertension or diabetes.
You fit use am even if you dey give pikin breast suck
E go make sure say e cover you and cancer no go show im wowo face for your side.
Any sign of endometriosis no go show face for your corner.
De side wey no pure: Plenti people dey worry say some side for IUD matter no pure. Many women no dey get any wahala with IUD, e dey always fit dem like new cloth, but sometimes, e dey reach like 7 months [7]
De kain complain wey full area pass:
Your period blood fit change colour, but that one no mean anything. Your period fit dey come small small or e no go come at all for some time
Your body fit dey do you one kain or your back fit dey pain you.
Acne fit join
Your mood fit dey change like weather
Other matter wey you need to look out for [3]:
IUD fit fall commot
IUD fit enter your uterus
If you hold bodi so tay for 3 months and de thing no gree you again, abeg commot am, go find anoda way to take protect yourself. No forget say different ways dey for everybody, no matter where you dey

*De side wey no pure fit serious for very few women.


We dey here to help you. If dis way no be am, we get anoda way wey you fit use. No forget say: if you talk say na anoda way you wan use, make sure say you protect yourself well wen you still dey try anoda way. E make sense make you use condom.

Shey IUD no go wound my partner?

IUD no suppose wound your partner. You fit don hear say IUS thing wey be like rope go dey disturb your partner wen una dey nack, but na lie. Many men no go even fit feel the thing sef. Your healthcare people sef fit cut de thing wey be like rope small, so dat you go rest. On top dat level sef, de thing wey be like rope go soft well well later later [3]

What if de way wey my body dey do me during my period kon worse?

Hold bodi for some month, take ibuprofen de first few days of your perio

E still no dey work? If you like IUD, but de side effect kon be like say your village people sidon on top your matter, e go betta make you find anoda package to use.
Try anoda way: de one wey dem dey put inside bodi

Wat if to get belle kon dey hungry me?

If belle dey hungry you, tell your healthcare people say make dem commot your IUD. Your bodi go sharparly return to normal and you fit start to dey try to get belle

My IUS take im leg waka commot. Shey e fit happen again?

IUS wey dey wear koin koin shoe take cat-walk waka commot fit happen to very few women inside de first year wey dem use am. But e dey happen pass for women [6]:

Who never get belle before

Wey young pass 20 years

Wey dey get heavy or period wey dey pain

Put IUS immediately after dem born pikin or commot belle wey don reach 2nd-trimester.

If de IUS just do small shakara commot one leg for where e dey, e mean say dem no put am well: e fit be say dem put am too low den e kon vex waka commot. E fit be say e happen wen dem put am or e fit concern how de woman dey take piss or other matter like fibroid. For women wey dia IUS waka commot, we sure say if dem put another IUS e go waka commot too [10].

E still no dey work? If you like to dey use IUS, but e dey always waka commot, try use anoda way wey no get wahala at all.
Try anoda way: de one wey dem dey put inside bodi

Shey IUD go pain me wen dem dey put am?

IUD pain as dem dey put am dey different from one person to anoda. You gas gather liver like Voltron because no medicine dey wey no go make am pain you.

You fit try take ibuprofen before dem put de IUD and make sure say your cervix open like wen you dey do your period or you dey ovulate. Even if e still pain you, you go know say na investment you dey do to take enjoy correct nack wey go totori you and belle no go enter [4].

I wan commot my IUD. Shey I fit commot am by myself?

You fit don hear tori for internet about people wey commot dia IUD by dia self. No go try am o! We don warn you. Abi you be doctor? Shooo! See me o? If you want commot your IUD, just respect yourself, waka go back to your healthcare people make dem commot am for you and you fit talk about de things wey you fit do so dat belle no go enter. Or you fit talk if belle dey hungry you [8].

If you sure say you wan carry belle by force by fire, talk to your healthcare people about wetin you fit do to help you prepare.

Still no dey work? If you wan something wey go last and e dey easy to use, de one wey dem dey put inside bodi make sense.

Try anoda way: de one wey dem dey put inside bodi

If I get HIV, sey I fit use IUS?

HIV no reach for where IUD dey. Whether na small or confam disease you get or whether you dey use antiretroviral medicine, IUD pass dem [1].


  • [1] BATESON, D., & McNAMEE, K. (2016). Intrauterine contraception A best practice approach across the reproductive lifespan. Medicine Today. Retrieved from https://www.shinesa.org.au/media/2016/07/Intrauterine-contraception-A-best-practice-approach-Medicine-Today.pdf
  • [2] Dr Marie Marie Stopes International. (2017). Contraception. Retrieved from http://www.mariestopes.org.au/wp-content/uploads/Contraception-brochure-web-200417.pdf
  • [3] Faculty of Sexual & Reproductive Healthcare. (Amended 2019). Faculty of Sexual & Reproductive Healthcare Clinical Guidance: Intrauterine Contraception Clinical Effectiveness Unit. RCOG. Retrieved from https://www.fsrh.org/standards-and-guidance/documents/ceuguidanceintrauterinecontraception/
  • [4] Family Planning NT. (2016). Intra Uterine Contraceptive Device (IUD or IUCD). Retrieved from http://www.fpwnt.com.au/365_docs/attachments/protarea/IUD-46c2853c.pdf
  • [5] FSRH The Faculty of Sexual & Reproductive Healthcare. (Amended 2019). UK MEDICAL ELIGIBILITY CRITERIA. RCOG, London. Retrieved from https://www.fsrh.org/standards-and-guidance/documents/ukmec-2016/
  • [6] Nelson, A. L., & Massoudi, N. (2016). New developments in intrauterine device use: focus on the US. Retrieved fromhttps://www.dovepress.com/new-developments-in-intrauterine-device-use-focus-on-the-us-peer-reviewed-fulltext-article-OAJC
  • [7] Society of Obstetricians and Gynaecologists of Canada. (2016). Canadian Contraception Consensus: Chapter 7 Intrauterine Contraception. JOGC. Retrieved from https://www.jogc.com/article/S1701-2163(15)00024-9/pdf
  • [8] Tudorache, et al. (2017). Birth Control and Family Planning Using Intrauterine Devices (IUDs). Retrieved from
  • [9] World Health Organization Department of Reproductive Health and Research and Johns Hopkins Bloomberg School of Public Health Center for Communication Programs. (2018). Family Planning: A Global Handbook for Providers. Baltimore and Geneva. Retrieved from https://apps.who.int/iris/bitstream/handle/10665/260156/9780999203705-eng.pdf?sequence=1
  • [10] World Health Organization. (2016). Selected practice recommendations for contraceptive use. Geneva. Retrieved from https://apps.who.int/iris/bitstream/handle/10665/252267/9789241565400-eng.pdf?sequence=1

lang Naijá