- Dis one dey easy to use and e dey work like de medicine. You go need to dey put am every week.
- E dey work: E dey work like magic wen you take am as you suppose take am, but many women no dey do am like dat. As people dey take use am, inside 100 women, 91 no carry belle.
- Wahala wey fit happen: dey do like say you wan vomit, period wey no dey come every month, make breast soft like akamu na dis ones common pass, but dem no dey last. Make your skin dey do you on kain too fit happen.
- E hard: you need to put anoda one every week
- E no go protect you against yamayama infection (STIs).
De one wey dem dey put on top bodi
De one wey dem dey put on top bodi na one small plastic wey resemble bandage. E small pass 5cm. You go put de thing on top your bodi and e go dey release hormone wey no go let your bodi make eggs. E also no go let sperm enter to turn to belle.
E wahala small well and e no require injection at all. If you no wan dey take medicine every day, den dis one go dey good for you. All you need na to dey remember am once every 7 days.
E dey work well well if you no weigh pass 90 kilos. E fit no sure well well if your weight pass 90 kilos. So if you weigh 90 kilos or pass, e go betta if you find anoda way.
You want period wey go dey come every month. If you like to dey see your period every month, and no shikini shikini blood even wen you no dey see your period, den dis one dey good for you.
If you dey smoke and you neva reach 35. If you be smoker wey neva reach 35 and you dey use dis method, e fit bring some kain gbege come your side. E go betta make you talk to your healthcare person for advice.
You wan stop de package to get belle sharp sharp? Belle fit enter sharp sharp if you stop to dey use dis package wey dem dey put on to bodi. But if you stop and belle neva dey hungry you, use anoda method.
How To Use
Dis one easy to use. De only part wey fit hard for you na to dey remember am every week. Use one every week for three weeks. No use am for de fourth week o.
You fit put am on top your yash, your belle, the top of your arm or for your chest area. No go put am on top your breast o.
Dat week wey you no go use am, your period fit come. And blood still fit to dey come out wen you don wan put am for bodi again. Dis dey normal. Put anoda new one for bodi.
Check make you see dis things wey go help you wen you dey use dis package.
Help 1: if you start to dey use am inside de first 5 day of your period, e no go let belle enter. If you kon start am later, you go need to wait 7 days before e go fit protect you. Inside dat 7 days, use anoda method shock bodi as back up.
Help 2: Reason am well about were you wan put am – because e go gas dey there for dat full one week o. No put am for where your skin dey peel or where your bodi dey fold.
Help 3: To put am for bodi, first peel half of de plastic, so dat you go see where to hold.
Help 4: no touch where de thing dey gum
Help 5: press am on top de part of your bodi where you wan put am. Hold am there for 10 seconds so dat e go dey there kampe.
Help 6: no use cream powder, oil or makeup on top de place where you put de thing. Because e no go let am gum well well.
Help 7: check am every day to make sure say e still dey there well well.
Help 8: you fit dey see something wey be like hair or wool around de thing.
Help 9: wen you commot am, fold am before you troway am. e no go let hormones enter inside de ground. No go flush am for toilet o.
Everybody dey different. Wetin you go feel fit different from wetin anoda person go feel.
De good part: De injection dey do plenti good thing for bodi. Even wen your toto go dey collect prick sef, e go dey go sam sam .
E dey easy to use – e be like make person dey put cello tape on top bodi.
E no go cause kasala wen you wan nack
You fit dey see your period every month but small small.
E fit commot acne for your face
E fit reduce pain during period and de sign of premenstrual syndrome (PMS)
E fit give protect you against health wahala like endometrial and ovarian cancer; iron deficiency anemia; ovarian cysts; and pelvic inflammatory disease.
De side wey no pure: Plenti people dey worry say some side for de matter no pure. Many women no dey get any wahala. If you dey see small small wahala, dem go commot last last. Because your bodi just jam something wey new dats why e dey fall your hand. No worry, after small time, e go stop, because your bodi go don master am.
Gbege wey dey shikini wey go commot after two or three months :
Make person dey see blood even wen e no dey do im period
Make breast soft anyhow
Make you feel like you wan vomit or vomit
Gbege wey fit tay:
Make de place wey you put de thing dey dey one kain
Make how your bodi dey do you for nack matter change
If after three months, de matter still no pure or bodi no gree you again, abeg commot am, go find anoda way to take protect yourself. Condom too dey kampe well well. No forget say different ways dey for everybody, no matter where you dey.
E hard to find.
De side wey no pure fit serious for very few women.
We dey here to help you. If dis way no be am, we get anoda way wey you fit use. No forget say: if you talk say na anoda way you wan use, make sure say you protect yourself well when you dey try anoda way. E make sense make you use condom. Condoms go give you confam protection before you go find anoda way wey you wan use.
Wat if de thing just dey fall up and down ?
De thing no dey fall every time. But if your own fall, no worry, just put am back if e neva reach 24 hours wey you first use am. But if e don pass use anoda one.
Abeg o, no put bandage, tape, or gum to take hold am. If de hormone wey dey for de thing kon mix with wetin you take hold am, e no go gum o and e no go work as e take suppose to.
Try dis: make sure say you no use cream, oil, powder, or any medicine rub de place where you put de thing. De cream or de oil after you don baff fit affect with am and e no go gum well.
E still no dey work? If e still dey fall commot anyhow, you go need to try anoda method wey dem dey put inside bodi. Like IUD, or de ring.
Try anoda way: de one wey dem dey put inside bodi; IUD; ring
What if I no remember to change am ?
Try dis: set reminder for your phone.
E still no dey work? If you still no remember even with reminder, den you go need to try anoda method wey you no go need to dey remember for many years or many months. Like de injection, de one wey dem dey put inside bodi, or de IUD.
Try anoda way: de one wey dem dey put inside bodi; IUD; injection
Wetin I go do if my bodi dey do me one kain because of the package wey I put on top am ?
Some women fit dey see something wey be like craw craw for de place wey dem put de thing because of de gum.
Try dis: commot de thing, put am for anoda place. You fit feel better. If you dey move am up and down before, try keep am for one place. If you still dey see something wey be like craw craw, use one cream wey dem dey call cortisone. E fit commot sharp sharp.
E still no dey work? If your skin still no dey betta, you go fit find anoda method wey no get gum: de injection, de one wey dem dey put inside bodi, de IUD, de ring
Try anoda way: de one wey dem dey put inside bodi; IUD; ring; injection
Wetin I fit do if I no like the gbege wey de hormone dey cause?
Use de one wey dem dey put on top bodi for de next few months. De gbege go disappear.
E still no dey work? De same gbege wey dis one bring fid different from the hormone method. If de wahala no disappear after some time, abeg find anoda way like de ring, de injection, de IUD, or de one wey dem dey put inside bodi.
Try anoda way: de one wey dem dey put inside bodi; ring; injection
Shey dis one wey dem dey pit on top bodi bad for de environment ?
Any way betta pass no way at all wen e concern de environment.
Some hormones for de medicine go enter de environment from de woman piss. E dey small pass other source of estrogen wey dey for the environment.
From things wey dem dey manufacture like fertilizer, the things wey dey kill mosquito and from de medicine wey dem dey give animals, estrogen dey enter the environment well well pass de one wey dey for the woman piss.
If you no wan hormone to your bodi or de environment, anoda way dey for you. Condom wey be like rubber and copper IUD good well well. Anything wey you decide, choose one way dey use.
E still do dey work? If you want dey one wey sure but e no get hormone, try de IUD wey no get hormone.
Shey make I dey fear about blood thickness?
E dey very possible make your blood no thick wen you dey use de medicine. Na only if you get health wahala or dem born you some type way na im go increase your of blood thickness. If say your blood don thick before on top another health matter, den before you go start to dey take dis medicine, e go betta if you go yarn with your healthcare people first.
Why dis thing dey leave one kain gum gum thing for my skin?
Nothing dey shele! E fit just be dirty or dust n aim just dey there. Wen you don commot de thing on top your bodi, rub small oil on top where you from commot am. Those things go commot sharp sharp.
E still no dey work? If de gum gum thing still dey bother you, and you wan change to anoda way wey you no go need to dey remember every time wey you wan nack, den check de one wey dem dey put inside bodi, de IUD, de ring and de injection.
Try anoda way: de one wey dem dey put inside bodi; IUD; ring; injection.
 Cornell Health. (2019). The Contraceptive Patch. Cornell University , New York . Retrieved from https://health.cornell.edu/sites/health/files/pdf-library/the-patch.pdf
 Contraceptive Choice Center . (2015). Contraceptive Patch FACT SHEET. Washington University in St. Louis School of Medicine, Department of Obstetrics & Gynecology, St. Louis. Retrieved from https://contraceptivechoice.wustl.edu/wp-content/uploads/2015/07/Contraceptive-Patch-Fact-Sheet.pdf
 Dr Marie Marie Stopes International. (2017). Contraception. Retrieved from http://www.mariestopes.org.au/wp-content/uploads/Contraception-brochure-web-200417.pdf
 FSRH The Faculty of Sexual & Reproductive Healthcare. (Amended 2019). FSRH Guideline: Combined Hormonal Contraception. Retrieved from https://www.fsrh.org/standards-and-guidance/documents/combined-hormonal-contraception/
 FPA the sexual health charity. (2019). Your guide to the contraceptive patch. Retrieved from https://www.fpa.org.uk/sites/default/files/contraceptive-patch-your-guide-2019_0.pdf
 Galzote, et al. (2017). Transdermal delivery of combined hormonal contraception: a review of the current literature. International Journal of Women´s Health. Retrieved from https://www.ncbi.nlm.nih.gov/pmc/articles/PMC5440026/
 Reproductive Health Access Project. (2015). THE PATCH. Retrieved from https://www.reproductiveaccess.org/wp-content/uploads/2014/12/factsheet_patch.pdf
 Society of Obstetricians and Gynaecologists of Canada. (2017). Canadian Contraception Consensus Chapter 9: Combined Hormonal Contraception. Retrieved from https://www.jogc.com/article/S1701-2163(16)39786-9/pdf
 World Health Organization Department of Reproductive Health and Research and Johns Hopkins Bloomberg School of Public Health Center for Communication Programs (2018) Family Planning: A Global Handbook for Providers. Baltimore and Geneva. Retrieved from https://apps.who.int/iris/bitstream/handle/10665/260156/9780999203705-eng.pdf?sequence=1
 World Health Organization. (2016). Selected practice recommendations for contraceptive use. Geneva. Retrieved from https://apps.who.int/iris/bitstream/handle/10665/252267/9789241565400-eng.pdf?sequence=1